ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ޕީއެސްޖީއާ ދެކޮޅަށް މެންޗެސްޓާ ޔުނައިޓެޑް ކުޅޭ މެޗުގައި އެ ޓީމުގެ ކެޕްޓަން ބޭންޑް އަޅަން ބްރޫނޯ ފެނާންޑޭސް ހަމަޖައްސައިފިއެވެ.

މިއީ މި އަހަރު ޖެނުއަރީ މަހު ޔުނައިޓެޑާ ގުޅުނު އުމުރުން 26 އަހަރުގެ ފެނާންޑޭސް ޔުނައިޓެޑުގެ ކެޕްޓަން ބޭންޑް އަޅާނެ ފުރަތަމަ ފަހަރެވެ. އޭނާ އަންނަނީ ޔުނައިޓެޑަށް ބަދަލުވުމަށްފަހު އެ ޓީމުގައި ތަފާތު މޮޅު ކުޅުމެއް ދައްކަމުންނެވެ.

ޕީއެސްޖީ މެޗުގެ ކުރިން ޔުނައިޓެޑުގެ ކޯޗު އޮލެ ގުނަ ސޯލްޝެއާ ބުނީ ފެނާންޑޭސްއަށް ކެޕްޓަން ބޭންޑް ދިނީ އެއީ މި ވަގުތަށް ޓީމަށް އެންމެ ރަނގަޅު ނިންމުން ކަމަށްވާތީ ކަމަށާއި، ކެޕްޓަނެއްގެ ދައުރު އަދާކުރެވޭނެ ފެންވަރު ފެނާންޑޭސްގެ ކިބައިގައި އެބަހުރި ކަމަށެވެ.

ފެނާންޑޭސް ބުނީ ޔުނައިޓެޑުގެ ކެޕްޓަންކަން ކުރުމަކީ ލިބޭ ޝަރަފެއް ކަމަށާއި ބޭނުންވަނީ ޓީމުގެ އެހެން ކުޅުންތެރިންނަށް މިސާލެއް ދައްކައި ސަޕޯޓަރުން ބޭނުންވާ ފަދަ ހިސާބަކަށް ކުލަބު ގެންދިއުމަށް ކަމަށެވެ.

ޕީއެސްޖީ މެޗުގައި ކެޕްޓަން ބޭންޑް އަޅަން ފެނާންޑޭސްއާ ހަވާލުކުރީ އަނިޔާގެ ސަބަބުން ކެޕްޓަން ހެރީ މެގުއާ ޓީމާއެކު ދަތުރުކޮށްފައި ނުވާތީއެވެ. މެގުއާގެ އިތުރުން މި މެޗަށް ފްރާންސަށް ދިޔަ ސްކޮޑާއެކު ޔުނައިޓެޑުގެ ޒުވާން ފޯވާޑް މޭސަން ގްރީންވުޑް އަދި ދާދި ފަހުން ޔުނައިޓެޑާ ގުޅުނު ޕީއެސްޖީގެ ކުރީގެ ފޯވާޑް އެޑިންސަން ކަވާނީވެސް ދަތުރުކޮށްފައެއް ނުވެއެވެ.

މެޗުގެ ކުރިން ޕީއެސްޖީގެ ކޯޗު ތޯމަސް ޓުޗެލް ބުނީ މި މެޗުން ޕީއެސްޖީއަށް މޮޅުވެވޭނީ ޔުނައިޓެޑުގެ ކައުންޓާ އެޓޭކުތައް ހުއްޓުވައިގެން ކަމަށެވެ. އަދި ޕީއެސްޖީން ވަރަށް ބޮޑަށް ޔުނައިޓެޑުގެ މެދުތެރެއަށް ކުޅޭ ކުޅުންތެރިންގެ ފަރާތުން އުފައްދާ ނުރައްކާތެރި ހަމަލާތަކަށް ސަމާލުވާން ޖެހޭނެ ކަމަށްވެސް ޓުޗެލް ބުންނެވެ.

މި ސީޒަނުގެ ޗެމްޕިއަންސް ލީގުގެ އެއް ގްރޫޕެއްގައި ޔުނައިޓެޑާއި ޕީއެސްޖީ ހިމެނޭއިރު، މިދިޔަ ސީޒަނުގައި ޔުނައިޓެޑުން ވަނީ ޗެމްޕިއަންސް ލީގުގެ ނޮކައުޓް ބުރުން ޕީއެސްޖީ ކަޓުވާލާފައެވެ.

ޕީއެސްޖީގެ ދަނޑުގައި އަންގާރަ ދުވަހުގެރޭ ޔުނައިޓެޑާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 12:00 ގައެވެ.