އެމް ސެވަން ޕްރިންޓުން 2021 ވަނަ އަހަރަށް ދިވެހިވަންތަ ކަލަންޑަރެއް ނެރެފިއެވެ.
ދިވެހި ތަރިކަ އާއި ފަންނުވެރިކަން ފުރިހަމައަށް ދައްކުވައިދީފައިވާ މި ކަލަންޑަރުގައި އަލަށް ތައާރަފު ކުރާ 12 ވައްތަރެއްގެ ދިވެހި ފޮންޓު ވެސް ހިމެނެ އެވެ.
އެމް ސެވަން ގްރޫޕްގެ މެނޭޖިންގ ޑިރެކްޓަރު މުހައްމަދު އަބްދުއްސައްތާރު ވިދާޅުވީ ކަލަންޑަރު ފަރުމާ ކޮށްފައިވަނީ ތަރިކައަށް ވެސް އަހައްމިއްޔަތުކަން ދިނުމުގެ ގޮތުން ކަމަށެވެ.
މިފަދަ ކަލަންޑަރެއް އަޅުގަނޑުމެން ފަރުމާ މިކުރީ ދިވެހި ތަރިކައަށް ވެސް އަހައްމިއްޔަތުކަން ދިނުމުގެ ގޮތުން. ފަންނުވެރިންނަށް އެ ބޭފުޅުންގެ މަސައްކަތް އެކި ވަސީލަތްތަކުން ދެއްކޭނެ ފުރުސަތު އޮތްކަން މި ކަލަންޑަރު ވެސް އެނގިގެން އެ ދަނީއެމް ސެވަން ގްރޫޕްގެ މެނޭޖިންގ ޑިރެކްޓަރު މުހައްމަދު އަބްދުއްސައްތާރު
ފާރުގައި އަޅުވާ މި ކަލަންޑަރު ފަރުމާ ކޮށްފައިވަނީ ދިވެހި ބަހުން ލިޔެފައިވާ ޙިކުމަތުގެ ބަހާއި، ނަމާދު ވަގުތާއި މީލާދީ އަދި ޙިޖުރީ ތާރީޚާއި ނަކަތާއި ސަރުކާރު ބަންދު ދުވަސްތައް އަދި މުހިންމު ތާރީޚުތައް އެނގޭ ގޮތަށެވެ. މި ކަލަންޑަރު ޑިޒައިންކޮށްފައި ވަނީ ވިޝުވަލް އާޓްސްގެ ދާއިރާއިން، ލިޔުމާއި ކުރެހުމާއި ފަރުމާ ކުރުމުގެ ރޮނގުން ހިތްވަރު ދިނުމުގެ ޤައުމީ އިނާމު ލިބިވަޑައިގެންފައިވާ ފަރުހާދު އިބްރާހިމެވެ. ފަރުހާދު ބުނީ މި ކަލަންޑަރު ފަރުމާ ކުރުމަށް ގިނަ މަސައްކަތެއް ކޮށްފައިވާނެ ކަމަށެވެ.
ކުރީގެ ކަލަންޑަރުތަކުގައި ހުންނާނީ އަރަބި ކެލަގްރަފީ. މިހާރު މިއީ މުޅިން ވެސް ތާނަ ކެލަގްރަފީ. ތިން އަހަރުގެ މި ޕްރޮޖެކްޓް ނިމޭއިރު 36 ފޮންޓެއް ނުކުންނާނެ. މިފަހަރުގެ 12 ފޮންޓުން، ކޮންމެ މަހަކަށް ބާރަ ނަސޭހަތުގެ ބަސް ހިމަނާފައިވާނެފަރުހާދު
ކަލަންޑަރު ޑިޒައިން ކުރިއިރު، ބަހާފައިވަނީ މައިގަނޑު ތިން ބަޔަކަށް ކަމަށް ފަރުހާދު ބުންޏެއެވެ. އެއީ އިސްލާމީ މަރުކަޒުގެ އާކް އާއި ދިވެހި ލިޔެލާޖެހުމުގެ ކުރެހުންތަކަށް އަދި ހިރިގަލުގެ ކުރެހުންތައް ރަމްޒުކޮށް ދިނުމަށެވެ.
އަޅުގަނޑުމެން ފަރުހަދުއާ ގުޅިގެން މިފަދަ ހާއްސަ ކަލަންޑަރެއް މި ނެރުނީ، ދިވެހި ފަންނުވެރިންނަށް ފުރުސަތު ދިނުމަށްޓަކައި. އެމް7 އަކީ ހަމައެކި ޕްރިންޓްކުރާ ތަނެއް ނޫން. ދިވެހި ފަންނުވެރިންގެ ހުނަރު ދެއްކުމަށް ވަރަށް ބޮޑު މަސައްކަތެއް އަޅުގަނޑުމެން ކުރަން. އެ ފުރުސަތު އަބަދު ވެސް އޮންނާނެ. ދިވެހި ތާރީޚާއި ސަގާފަތާއި ދިވެހި ފަންނުވެރިކަން ކުރިއެރުވުމަށް އަޅުގަނޑުމެން އަބަދުވެސް މަސައްކަތް ކުރާނެއެމް ސެވަން ގްރޫޕްގެ މެނޭޖިންގ ޑިރެކްޓަރު މުހައްމަދު އަބްދުއްސަައްތާރު
އެމް7 ގެ ކަލަންޑަރުގެ އަގަކީ އެންމެ 28 ރުފިޔާއެވެ. މި ކަލަންޑަރު އެހެން ފަރާތަކަށް ހަދިޔާ ކުރެއްވުމަށް ބޭނުންފުޅުވާނަމަ، ލިޔެލާޖެހި ކުރެހުން ދައްކުވައިދޭ ގޮތަށް ފަރުމާކޮށްފައިވާ ފޮއްޓެއްގައި ބަންދު ކޮށްފައި ދޭނެ ކަމަށް އެމް7 އިން ބުނެއެވެ.
