މާލޭގެ ޕާކިން މައްސަލައެއް ހައްލެއް ހޯދުމަށް މާލޭގެ 7 ސަރަހައްދެއްގައި މަލްޓިސްޓޯރީ ޕާކިން ބިލްޑިންގ އިމާރާތް ކުރުމަށް ހަމަޖެހިފައިވާ ކަމަށް ޓްރާންސްޕޯޓް މިނިސްޓްރީން ބުނެފިއެވެ.
ބުރާސްފަތި ދުވަހު އޮތް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ވާހަކަ ދައްކަވަމުން އެ ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ޝިމާޒު އަލީ ވިދާޅުވީ ގަރާޖު ސިޓީގެ ކަންތައްތަކުގައި ނުރަނގަޅު ކަންތައްތަކެއް ހިނގާފައި އެބަހުރި ކަމަށާއި، އަދިވެސް ހިނގަމުންދާ ކަމަށެވެ. އެހެންނަމަވެސް ހުއްދަތައް ދޫކުރަނީ މާލެ ސިޓީ ކައުންސިލުން ގަރާޖުތަކެއްގެ ގޮތުގައި ރަޖިސްޓްރީކޮށްފައި އެތަނަށް ދޫކުރާ ހުއްދައެއްގެ މައްޗަށް ބިނާކޮށް އެތަނަކީ ރަނގަޅު ގަރާޖެއްތޯ ބެލުމަށްފަހު ކަމަށާއި، ނަމަވެސް ސަރުކާރުގެ މިވަގުތުގެ ސިޔާސަތަކީ ދައުލަތަށް އެކަމުން އާމްދަނީއެއް ލިބޭނެ ގޮތަކަށް އެކަން ކުރުން ކަމަށެވެ.
ޝިމާޒު ވިދާޅުވީ އަންނަ އަހަރުގެ ޖެނުއަރީ މަސް ތެރޭގައި އެކަމަށްޓަކައި ކުރަން ޖެހޭ މަސައްކަތްތައް ކުރައްވަމުން ގެންދަވާ ކަމަށާއި، މާލޭގެ ވަކި ސަރަހައްދުތަކެއް ޕްލޭނިންގެ މިނިސްޓްރީގެ މަޝްވަރާގެ މަތިން މިވަގުތުވެސް ބަލާފައިވާ ކަމަށެވެ. އަދި އެތަންތަނުން ޕާކިންއަށް ސްލޮޓްތައް ދޫކުރަނީ ވެހިކަލް ރަޖިސްޓްރީ ކުރެވޭ ގޮތަށް ކަމަށާއި، އެ އިސްލާހު އެގޮތަށް އައުމުން މިކަމަށް ހައްލު ލިބިގެންދާނެ ކަމަށެވެ.
މާލޭގެ މަލްޓްސްޓޯރީ ބިލްޑިންގެ އިމާރާތް ކުރުމަށް ނިންމާފައިވާތީ އެކަމާއި ގުޅިގެން ޝިމާޒު ވިދާޅުވީ 7 ސަރަހައްދެއްގައި އިމާރާތްތައް ކުރުމަށް ހަމަޖެހިފައިވާ ކަމަށާއި، ފުރަތަމަ 2 ތަނެއްގެ މަސައްކަތް ކުރުމަށް ޕްލޭނިންގެ މިނިސްޓްރީއާއި އިކޮނަމިކް މިނިސްޓްރީ އާއި މަޝްވަރާ ކުރަމުންދާ ކަމަށެވެ.
"ޕްލޭނިންގ މިނިސްޓްރީން އިކޮނަމިކް މިނިސްޓްރީއާއި ގުޅިގެން މާލޭގެ 2 ސަރަހަހައްދެއްގައި މަލްޓިސްޓޯރީ ޕާކިން ބިލްޑިންގެ މަސައްކަތްތައް ކުރިއަށް އެބަދޭ. އަޅުގަނޑުމެންނަށް މައުލޫމާތު ލިބިފައިވާގޮތުން މި އަހަރުގެ ތެރޭގައި ފުރަތަމަ ތަނެއްގެ ގޮތުގައި ހީނާމާގޭގައި 4 ބުރީގެ ޕާކިން ބިލްޑިންއެއް އެޅުމުގެ މަސައްކަތް ކުރެވިގެންދާނެ. އެ މަސައްކަތް ކުރިއަށް އެބަދޭ. މައުލޫމާތު ލިބިފައިވާ ގޮތުގައި މާލޭގެ 7 ސަރަހައްދެއްގައި މަލްޓިސްޓޯރީ ޕާކިން ބިލްޑިންތަކެއް އެޅިގެންދާނެ،"ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ޝިމާޒު އަލީ
ޝިމާޒު ވިދާޅުވީ މި ތަންތަނުން ދައުލަތަށް އާމްދަނީ ލިބޭނެ ގޮތް ހެދިގެންދާނެ ކަމަށާއި، ގަރާޖު ސިޓީގެ މައްސަލައިގެ އިތުރުން ޕާކިން މައްސަލަ އަށް ވެސް ހައްލު ލިބިގެންދާނެ ކަމަށެވެ. ޓްރާންސްޕޯޓުގެ ތަފާސް ހިސާބުތައް ދައްކާ ގޮތުން މާލޭގައި 4 ފޮޅުލީ 7000 އުޅަނދު ބޭނުން ކުރަމުންދެއެވެ.
އެހެންކަމުން އުޅަނދު އެތެރެ ކުރުމުގެ މައްސަލައަށް ވެސް ހައްލެއް ގެނައުމުގެ މަސައްކަތް ކުރަމުންދާ ކަމަށެވެ.
ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވީ، ތޮއްޖެހިފައިވާ މާލޭގެ މަގުތަކަށް ފަސޭހަ ބަދަލުތަކަށް ގެނައުމަށް މި ސަރުކާރުން މަސައްކަތް ކުރަމުންދާ ކަމަށެވެ. އެގޮތުން މި އަހަރުގެ ތެރޭގައި ސައިކަލް ތަކަށް 1000 އާއި 1500 ދޭތެރޭގެ ޕާކިން ޒޯންތަކެއް ހެދުމަށް ނިންމާފައިވާ ކަމަށާއި، ހަތަރު ފުރޮޅުލި އުޅަނދުތަކަށް 100 އަށް ވުރެ ގިނަ ޕާކިން ސްލޮޓް ހަމަޖެހިގެން ދާނެ ކަމަށް ވިދާޅުވި އެވެ.
މާލޭގައި މިހާތަނަށް ޕާކިންގ ޒޯންގެ ގޮތުގައި ތައްޔަރު ކޮށްފައިވާ ތަންތަނަކީ، މަޖީދިއްޔާ ސްކޫލް ކުރިމަތި، ފިނޭންސް މިނިސްޓްރީ ކައިރީ ޕާކިން ޒޯން، އެމްއެމްއޭ ކައިރީ އޮންނަ ޕާކިން ޒޯންގެ އިތުރުން މާފަންނު ސަހަރާ ކައިރި އޮތް ޕާކިންގ ޒޯނެވެ.
