މިނިސްޓްރީ އޮފް ފިޝަރީޒް މެރިންރިސޯސަސް އެންޑް އެގްރިކަލްޗަރ މިނިސްޓްރީން ދެމުން އަންނަ ދަނޑުވެރިކަމާއި ގުޅުންހުރި ހިދުމަތްތައް އޮންލައިންކޮށް ދެވޭގޮތައް ތައްޔާރު ކުރި "އެގްރިކަލްޗަރ އޮންލައިން ސިސްޓަމް" (އޭއޯއެސް) ލޯންޗްކޮށް ހިދުމަތްދޭން ފަށައިފިއެވެ.
މިނިސްޓްރީންދޭ ހިދުމަތްތައް އެއްވިއުގައަކުން ލިބޭގޮތަށް އޭޑީބީގެ އެހީގައި ގާއިމްކުރި މި ސިސްޓަމް ރަސްމީކޮށް އިފްތިތާހު ކޮށްދެއްވީ ދަނޑުވެރިކަމާއި ބެހޭ މިނިސްޓްރީގައި ބޭއްވި ރަސްމިއްޔާތެއްގައި އިކޮނަމިކް މިނިސްޓަރ ފައްޔާޒު އިސްމާއިލެވެ.
މި ރަސްމިއްޔާތުގައި ވާހަކަ ދައްކަވަމުން ދަނޑުވެރިކަމާއި ބެހޭ މިނިސްޓަރ ޒަހާ ވަހީދު ވިދާޅުވީ އޭއޯއެސްއަކީ މިނިސްޓްރީ އޮފް އިކޮނަމިކް ޑިވަލަޕްމަންޓުން އޭޑީބީގެ އެހީގައި ހިންގާ ޕްރޮޖެކްޓެއް ކަމަށާއި، އޮންލައިން ސިސްޓަމަކީ މިނިސްޓްރީން ދޭ ހިދުމަތްތައް މިނިސްޓްރީއަށް ނުގޮސް ކޮންމެ ތަނެއްގައި ހުރެގެން ވެސް ލިބިވަޑައިގަންނަވާނެ ހިދުމަތްތަކެއް ކަމަށެވެ.
މީގެ ޓްރައަލް ޕީރިއަޑެއް ގޮސް ކާމިޔާބީއާއެކުގައި ރަސްމީކޮށް އޮންލައިން ހިދުމަތް މި ފަށަނީ. މީގެ ފަހުން މި ހިދުމަތް ހޯދަން މިނިސްޓްރީއަށް ވަޑައިގަންނަވަން ނުޖެހޭނެ. އަޅުގަނޑުމެން ރައްޔިތުންނަށްދޭ ހިދުމަތްތައް ވީހާވެސް ފަސޭހަކޮށް އަދި ކޮވިޑްގެ ހާލަތުގައި މިއީ ވަރަށް ރަނގަޅުކަމެއް އަދި ލުއިފަސޭހަ ގޮތަކަށް ރައްޔިތުންނަށް މި ހިދުމަތް ފޯރުކޮށްދިނުން. އުއްމީދުކުރަނީ ކުރިއަށް އޮތްތަނުގައި މިނިސްޓްރީގައި ހުރި ރައްޔިތުންނާއި ގުޅޭ އެހެން ހިދުމަތްތައްވެސް ސިންގަލް ވިންޑޯ ސިސްޓަމްގެ ތެރެއިން މަސައްކަތް ފެށިގެން ދިއުންދަނޑުވެރިކަމާއި ބެހޭ މިނިސްޓަރ ޒަހާ ވަހީދު
މި ހިދުމަތާއި ގުޅޭގޮތުން ވާހަކަ ދައްކަވަމުން މިނިސްޓަރ ފައްޔާޒު ވިދާޅުވީ އޮންލައިން ސިސްޓަމަކީ މިނިސްޓްރީގެ ފަރާތުން އެއްތަނަކުން ހިދުމަތްތައް ދިނުމަށް ގެންދެވޭ ސިންގަލް ވިންޑޯ ޕްރޮގްރާމުގެ ދަށުން އޭޑީބީގެ އެހީތެރިކަމާއެކު ކުރެވުނު މަސައްކަތުގެ ތެރެއިން ދަނޑުވެރިކަމާއި ބެހޭ މޮޑިއުލް ކަމަށެވެ. އަދި މަސްވެރިކަމާއި ބެހޭ މޮޑިއުލް ވެސް ތައްޔާރު ކުރެވެމުންދާ ކަމަށާއި، އެބައި ވެސް ވަރަށް އަވަހަށް ލޯންޗް ކުރެވޭނެ ކަމަށެވެ.
"މީގެ އިތުރުން އިމްޕޯޓްކުރުމާއި އެކްސްޕޯޓްކުރުމާއި ގުޅޭ ކަންކަން އެއް ވިއުގައަކުން ގުޅާލެވިގެން އޮންލައިންކޮށް ކަންކަން ކުރުމުގެ މަސައްކަތް ތަނަވަސްކޮށްދިނުން މި ސިންގަލް ވިންޑޯގެ އެއް މަގުސަދަކީ. އެކިއެކި މިނިސްޓްރީތަކާއި އެކު އެ މަސައްކަތް ކުރެވެމުން މިދަނީ. މިއަދު އޭގެ އެއްބައި ކުރިއަށް މިދިޔައީ. އަދި ކުރިއަށް އޮތްތަނުގައި ސިންގަލް ވިންޑޯ ފުޅާ ކުރުމުގެ ވިސްނުމުގައި ރައީސްގެ މަޝްރޫއެއް އަޅުގަނޑުމެން ކުރިއަށް އެބަގެންދަން. އެއީ ހިދުމަތް ލިބިގަންނަން ބޭނުންވާ ހުރިހާ ފަރާތްތަކަށް އެއް ސިންގަލް ވިންޑޯ މެދުވެރިކޮށް ހިދުމަތްތައް ދެވޭނެ ގޮތެއް ފަރުމާކުރުން،"އިކޮނަމިކް މިނިސްޓަރު ފައްޔާޒު އިސްމާއިލް
އަލަށް ތައާރަފް ކުރި މި ސިސްޓަމަށް ލޮގިން ވާން ޖެހެނީ އީފާސް މެދުވެރިކޮށް ކަމަށް އެގްރިކަލްޗަރ މިނިސްޓްރީން ބުނެއެވެ. މި ސިސްޓަމުން ފޯރުކޮށްދޭ ހިދުމަތްތަކުގެ ތެރޭގައި ދަނޑުވެރި ކަމަށް ބޭނުން ކުރާ ތަކެތި އެތެރެ ކުރުމުގެ ހުއްދައަށް އެދުމާއި، ހުއްދަ ދޫކުރުމާއި ދަނޑުބިން ރަޖިސްޓްރީ ކުރުމާއި ދަނޑުވެރިކަމާއި ބެހޭ ހުރިހާ ހިދުމަތެއް ހިމެނެއެވެ. އަދި މި ސިސްޓަމް އޮޕަރޭޓް ކުރުމަށް ހަމަޖެހިފައިވަނީ ކަމާއި ގުޅުން ހުރި އެކި މުއައްސަސާތަކާއި ގުޅިގެން ކަމަށް އެގްރިކަލްޗަރ މިނިސްޓްރީން ބުނެއެވެ.
