އެންޓި ކޮރަޕްޝަން ކޮމިޝަން (އޭސީސީ) އަށް މިހާރު އިތުބާރެއް ނެތް ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު ހަސަން މުހައްމަދު (ހަސަންޓޭ) ވިދާޅުވެއްޖެއެވެ.
ބުދަ ދުވަހު ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގެ ބައްދަލުވުމުގައި މެމްބަރު ޙަސަންއާއި ކޮމިޓީގެ ގިނަ މެމްބަރުން ވަނީ އޭސީސީގެ ތަހުޤީޤުތައް ލަސްވާ ސަބަބާ ގުޅޭގޮތުން ސުވާލު އުފައްދަވާފައެވެ. އެގޮތުން ރައްޔިތުންނާ ގުޅުން ހުރި ބޮޑެތި މައްސަލަތަކުގެ ތަޙުޤީޤު ލަސްވަމުންދާތީ މެމްބަރުން ވަނީ އެކަމުގެ ކަންބޮޑުވުން ފާޅު ކުރައްވާފައެވެ.
ކޮމިޓީގައި ވާހަކަ ދައްކަވަމުން މެމްބަރު ޙަސަން ވިދާޅުވީ، އޭސީސީން ސިޔާސަތުތައް އެކުލަވާލުމުގެ މަސައްކަތް ކުރާތާ އެތައް އަހަރެއް ވަމުންދާއިރު، ކުށް ކުރާ މީހުން އޭގެ ނާޖާއިޒު ފައިދާ ނަގައި، ހެއްކައް ނުފޫޒު ފޯރުވުން ފަދަ އެތައް ކަމެއް ހިނގާ ކަމަށެވެ. އަދި ބޮޑެތި ވައްކަމާއި ޙިޔާނާތުގެ ތުހުމަތު ކުރެވޭ މީހުން އެ ފައިސާއިން ވިޔަފާރި ކުރަމުންދާއިރު، އިންސާފުގެ ކުރިމައްޗަށް ނުގެނެވި ލަސްވަމުންދާކަން ފާހަގަ ކުރައްވައި މެމްބަރު ޙަސަން ވިދާޅުވ،ީ މިހާރު އޭސީސީގެ މައްޗަށް އޮތް އިތުބާރު ގެއްލިފައިވާ ކަމަށެވެ.
ޕޮލިސީ ހައްދަވާ ނިމޭއިރު ވައްކަންކުރި މީހާ އޭގެ ނާޖާއިޒު ފައިދާ ނަގައިގެން އަނެއްކާ އެހެން ވިޔަފާރިއެއް ކޮށްފައި، އަނެއްކާ ހެއްކަށް ނުފޫޒު ފޯރުވައި މުޅި ޤައުމުގައި މިނިވަންކަމާއެކު އޭނާ އުޅޭހާ ހިނދަކު ދެން ތިބޭފުޅުންނަށް ކޮން ކަމެއްތޯއޭ ކުރެވޭނީ، އަޅުގަނޑު ވަރަށް ހިތާމަޔާއެކު ދަންނަވަން އަޅުގަނޑުގެ އިތުބާރު ތިބޭފުޅުންނަށް މިވަގުތަކު ނެތް،އިނގުރައިދޫ ދާއިރާގެ މެމްބަރު ހަސަން މުހައްމަދު
އެކަމާ ގުޅޭގޮތުން އޭސީސީގެ ރައީސް މަރިޔަމް ޝިއުނާ ވިދާޅުވީ، އޭސީސީގެ އެތެރޭގައި ހުރި މައްސަލަތައް ދެނެގަތުމުގެ ދިރާސާކޮށް، އެކަންކަން ދެނެގަތުމުގެ މަސައްކަތް މީގެ ކުރިން އެކަމަނާ ކުރެއްވި ކަމަށާއި، އެހެން ނަމަވެސް، މަޤާމުގެ ޒިންމާއާ ޙަވާލުވެ، އެކަންކަމަށް ޙައްލު ހޯދުމުގައި އަމަލީ ގޮތުން މަސައްކަތް ކުރެއްވުން މުޅިން ތަފާތު ކަމަށެވެ.
އަޅުގަނޑު ކުރީގައި މަސައްކަތް ކުރިން އޭސީސީގެ އެތެރޭގައި ހުރި ގޮންޖެހުންތަކުގެ ދިރާސާތައްވެސް ހެދިން، އެކަމަކު އެއާ ވަރަށް ތަފާތު ދެއްތޯ އައިސް އަޅުގަނޑު އޭގެ ޒިންމާ އުފުލައިގެން އެތެރޭގެ ހުރި ކަންކަން ޕްރެކްޓިކަލީ އަޅުގަނޑު އެ މަސައްކަތް ކުރުމާ، އަޅުގަނޑު ރިސަރޗ ހަދާފައި ފައިންޑިންގސް އާ އެއީ ވަރަށް ތަފާތު ދެކަމެއް ދެއްތޯ، އެހެންވެ އެ ވާހަކަ މި ދެންނެވީ، މަސައްކަތާ ޙަވާލުވާއިރު އެތެރޭގައި ހުންނަ އެކަހަލަ ގޮންޖެހުންތައް، އެއީ ސޮލިއުޝަންސް ޕްރޮވައިޑް ކޮށްދެން ޖެހޭނީ މިހާރު އަޅުގަނޑު ދެއްތޯ، ކުރީގަ އަޅުގަނޑު އިޝޫސް މި އައިޑެންޓިފައި ކުރީއޭސީސީގެ ރައީސް މަރިޔަމް ޝިއުނާ
އޭގެ އިތުރުން، އޭސީސީން ކޮށްފައިވާ މަސައްކަތްތަކާ ގުޅޭގޮތުން މެމްބަރަކު ކުރެއްވި ސުވާލަކަށް ޖަވާބު ދެއްވަމުން ޝިއުނާ ވިދާޅުވީ، އޭސީސީން ބަލަމުންދާ 8 މައްސަލައެއްގައި ދައުވާ ކުރަން ފޮނުވާފައިވާނެ ކަމަށެވެ. އަދި 28 މައްސަލައެއް މިވަގުތު ޑިއުޓީ ޕްރޮސެކިއުޝަން މަރުޙަލާގައި ވާކަން ޝިއުނާ ފާހަގަ ކުރެއްވިއެވެ.
ކޮމިޓީގައި ވާހަކަ ދައްކަވަމުން އޭސީސީގެ މެމްބަރު އަލީ އަޝްރަފް ވިދާޅުވީ، 9 ސެޕްޓެމްބަރު 2019 ގައި އޭސީސީގެ 5 މެމްބަރުން މަޤާމާ ޙަވާލުވިއިރު ކޮމިޝަނުން ތަހުޤީޤު ކުރަމުންދާ (ޕެންޑިންގ) މައްސަލަތަކުގެ އަދަދަކީ 548 ކަމަށެވެ. އަޝްރަފް ވިދާޅުވީ، އޭގެ ތެރޭގައި 2010ށް ނިސްބަތްވާ 7 މައްސަލައަކާއި، 2011ށް ނިސްބަތްވާ 7 މައްސަލަ، 2012ށް ނިސްބަތްވާ 17 މައްސަލައާއި، 2013ށް ނިސްބަތްވާ 27 މައްސަލައާއި، 2014ށް ނިސްބަތްވާ 37 މައްސަލައާއި، 2015ށް ނިސްބަތްވާ 33 މައްސަލައާއި، 2016ށް ނިސްބަތްވާ 37 މައްސަލައާއި، 2017ށް ނިސްބަތްވާ 61 މައްސަލައާއި، 2018ށް ނިސްބަތްވާ 169 މައްސަލައާއި، 2019 ގައި ކޮމިޝަނާ ޙަވާލުވުމުގެ ކުރިން ހުށައެޅިފައިވާ 3 މައްސަލައެއް ހިމެނޭ ކަމަށެވެ.
އޭގެ އިތުރުން، މިއަދު އޭސީސީއަށް ދިމާވެފައިވާ އެންމެ ބޮޑު އެއް ގޮންޖެހުމަކީ މިފަދައިން މައްސަލަތައް ޕެންޑިންގ ގައި ހުރިކަން އަޝްރަފްގެ ވާހަކައިގައި ފާހަގަ ކުރެއްވިއެވެ.
