ގެސްޓް ހައުސްތައް ހުޅުވަން އޮތް މުއްދަތަށްވުރެ ލަހުން ހުޅުވުނީ އެކަމަށް ވާންޖެހޭ ފުރިހަމަ ތައްޔާރީތަކަށްފަހު މަސައްކަތް ފަށައި ގަތުމަށް ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ގެސްޓް ހައުސްތައް ބުދަ ދުވަހު ރަސްމީކޮށް ހުޅުވުމާއި ގުޅޭގޮތުން ވާހަކަ ދައްކަވަމުން، އެޗްއީއޯސީގެ ފަތުރުވެރިކަމުގެ ކަންކަމާއި ގުޅޭ ބައިގެ އިސްކޮށް ހުންނަވާ ހަސަން މުހައްމަދު ވިދާޅުވީ ގެސްޓް ހައުސްތައް ހުޅުވުމަށްޓަކައި ހަދާފައިވާ އުސޫލުތައް އަދި ގައިޑްލައިންތަކަކީ މިކަމާއި ގުޅުން ހުރި އިދާރާތަކުގައި މަޝްވަރާ ކުރެވިގެން އެއްކޮށް ނިންމާލެވިފައިވާ އުސޫލުތަކެއް ކަމަށެވެ. އަދި މި ގައިޑްލައިންގައި ހުރި ކަންތައްތަކަކީ ޑްރާފްޓް ކުރުމުގެ މަރުހަލާގައި އެކިއެކި ފަރާތްތަކާއި މަޝްވަރާ ކުރެވިގެން އިސްލާހުތައް ގެނެވިފައިވާ ކަންކަން ކަމަށެވެ.
ގެސްޓް ހައުސްތައް ހުޅުވުމުގެ ކުރިން އަޅުގަނޑުމެންނަށް އަންދާޒާކުރެވުނު ތާރީހުގެ ފަހުން މި ހުޅުވެނީ. ސަބަބަކަށް ވަނީ އަޅުގަނޑުމެން ވަކިކަހަލަ މިންގަނޑުތަކަށް ބަލާފައި ތައްޔާރުވެގެން މިކަން ކުރުމަށް. މި ގައިޑްލައިންގައި މިހުރި ހުރިހާ ކަންކަމަކީ ވެސް މިއާއި ގުޅުންހުރި ހުރިހާ ފަރާތްތަކުން ވެސް ވަރަށް ބޮޑަށް ސަމާލުކަންދީގެން ކުރިއަށް ގެންދަން ޖެހޭ ކަންތައްތައް. އަޅުގަނޑުމެން މި ވާހަކަތައް ދައްކާތާ ވަރަށް ގިނަ ދުވަސް ވެއްޖެ. ގައިޑްލައިންތަކަށް ހުރިހާ ފަރާތްތަކުން އިހުތިރާމްކުރަން ޖެހޭނެ. އެ ގައިޑްލައިންގައި ރާއްޖެއަށް މީހުން އަންނަ އިރުގައި 10 ސެޕްޓެމްބަރުން ފެށިގެން ޕީސީއާރު ނެގެޓިވް ޓެސްޓަކާއި އެކީގައި މި އަންނަނީ. އޭގެ ފަހުގައި އެއަރޕޯޓުން ވެސް އަދި ސްކްރީން ކުރެވިގެން ނުވަތަ ދަތުރުފަތުރުގެ ނިޒާމުގެ ތެރެއިން ވެސް ވަރަށް ގިނަ ރައްކާތެރިކަމުގެ ފިޔަވަޅުތަކާ އެއްކޮށް ރަށްރަށަށް މީހުން ދާނީ،އެޗްއީއޯސީގެ ފަތުރުވެރިކަމުގެ ކަންކަމުގައި އިސްކޮށް ހުންނަވާ ހަސަން މުހައްމަދު
ހަސަން ވިދާޅުވީ ރައްކާތެރިކަމުގެ ފިޔަވަޅުތަކާއެކު ވެސް ރަށްރަށަށް ގެސްޓުން ދިޔަ ނަމަވެސް އެހިސާބުން އެ މީހުންނަށް ހިދުމަތްދޭ ފަރާތްތަކުން އަމަލު ކުރަންވީ މުހިންމު ކަންތައްތަކެއް ހިމެނޭ ކަމަށެވެ. އަދި އިލްތިމާސް އަކީ ގައިޑްލައިންގައި ހުރި ކަންތައްތަކަށް އަހުލުވެރިވެ އޭގައި ހުރި ކަންތައްތަކާއި އެއްގޮތަށްތޯ ތައްޔާރުވެ މަސައްކަތް ކުރުން ކަމުގައި އޭނާ ވިދާޅުވިއެވެ.
"މީގެ ތެރޭގައި އެބަހުރި ގެސްޓް ހައުސްގައި މުވައްޒަފުން އަމަލުކުރަންވާ ގޮތާއި ގެސްޓް ހައުސްގައި ގާއިމްވެފައި ހުންނަންޖެހޭ ވަސީލަތްތަކާއި އަދި ރަށުގައި ހިދުމަތްދޭ ފަރާތްތަކުން ކަންކަން ބަހައްޓަންވާ ގޮތާއި އާންމު ރައްޔިތުން ރައްކާތެރިވުމަށް ކުރަންޖެހޭ ކަންތައްތަކާއި ސިއްހީ ދާއިރާއިން ފުރިހަމަވެފައި ހުންނަންޖެހޭ ކަންތައްތައް. މި ހުރިހާ ކަންތައްތަކެއް އެކުގައި ދާނަމަ އަޅުގަނޑުމެންނަށް ޔަގީންކަމެއް މި ދެވެނީ އަޅުގަނޑުމެންގެ އިޖްތިމާއީ ގުޅުންތަކާއި އުޅުންތަކާއި އެކުގައި މާބޮޑު ތަކުލީފުތަކެއް ނެތި އިގްތިސާދީ ހަރަކާތްތައް ވެސް ރަށްރަށުގައި ކުރިއަށް ގެންދެވޭނެ،"އެޗްއީއޯސީގެ ފަތުރުވެރިކަމުގެ ކަންކަމުގައި އިސްކޮށް ހުންނަވާ ހަސަން މުހައްމަދު
ހަސަން ވިދާޅުވީ ގައިޑްލައިނާ އެއްގޮތަށް ކަންކަން ކުރެވޭނެނަމަ އިގްތިސާދީ ހަރަކާތްތައް ހުއްޓާލަން ޖެހޭ ހިސާބަށް ނުދާނެ ކަމަށެވެ. އަދި ރިސޯޓްތަކުގެ ތަޖުރިބާ އަކީ ވެސް ގައިޑްލައިނާ އެއްގޮތަށް ކަންކަން ކުރިއަށް ގެންދިއުމުން ރަނގަޅަށް އެކަންވުން ކަމަށާއި، ރިސޯޓްތަކުގައި ފަތުރުވެރިންގެ ކޭސްތައް މަދު އަދި އައުޓްބްރޭކެއް ނެތް ކަމަށެވެ. އަދި ރަށްރަށުގައި ވެސް ގައިޑްލައިނާ އެއްގޮތަށް ކަންކަންދާނަމަ، ކަންކަން ރަނގަޅުވާނެ ކަމަށެވެ.
