މާލޭ ސިޓީގެ ސްކޫލްތަކުގައި ގްރޭޑް 8 އަދި 7 ގެ ކިޔެވުން ފެށުމަށް އެޑިއުކޭޝަން މިނިސްޓްރީން ނިންމައިފިއެވެ.

އެޑިއުކޭޝަން މިނިސްޓްރީން ބުނީ ކޮވިޑް-19 ގެ މިހާރުގެ ހާލަތަށް ރިޢާޔަތްކޮށް، އެޗްޕީއޭގެ ލަފާގެ މަތިން، އޮކްޓޫބަރު މަހުގެ 19 އިން ފެށިގެން މާލޭ ސިޓީގެ ސްކޫލްތަކުގައި ގްރޭޑް 8 ގެ ކިޔެވުން ފެށުމަށް މި މިނިސްޓްރީން ނިންމާފައިވާ ކަމަށެވެ. އަދި އޮކްޓޫބަރު މަހުގެ 25 އިން ފެށިގެން މާލޭ ސިޓީގެ ސްކޫލްތަކުގައި ގްރޭޑް 7 ގެ ކިޔެވުން ވެސް ފަށާނެ ކަމަށް އެ މިނިސްޓްރީން ބުންޏެވެ.

ގްރޭޑް 7 އަދި 8 ގެ ކިޔެވުން ފެށުމަށް އެޑިއުކޭޝަން މިނިސްޓްރީން ނިންމާފައިވާއިރު މިހާރު ގްރޭޑް 9ން 12ގެ ކިޔެވުން ވެސް ވަނީ ފަށާފައެވެ.

މާލެ ސިޓީގެ ސްކޫލުތަކުގައި މިހާރު ކިޔަވައިދޭން ފަށާފައިވާ ގްރޭޑްތަކުގެ އިތުރުން އެހެން ގްރޭޑްތަކަށް ކިޔަވައިދޭން ފެށި ނަމަވެސް އިތުރު ނުރައްކަލެއް ނެތް ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގް ވިދާޅުވެފައިވެއެވެ. ސްކޫލުތަކުގެ ކިޔެވުން ފަށަނީ އެޗްޕީއޭގެ ގައިޑްލައިންތަކާ އެއްގޮތަށް ރައްކާތެރިކަމުގެ ގިނަ ފިޔަވަޅުތަކާއެކުއެވެ.

އެގޮތުން ސްކޫލުތަކުގައި ދަރިވަރުން އަތް ދޮވެވޭނެ އިންތިޒާމް ހަމަޖައްސާފައިވާއިރު، މާސްއެޅުމާއި، ހުން ޗެކްކުރުމުގެ އިތުރުން އިޖްތިމާއީ ގައިދުރުކަމަށް ވަނީ ޚާއްސަ ސަމާލުކަމެއްދީފައެވެ.

މިނިސްޓްރީން ބުނީ އަބަދުވެސް އެންމެ އިސްކަމެއްދޭނީ ދަރިވަރުންގެ ސިއްހަތަށް ކަމަށެވެ. ގޭގައި ދަރިވަރުން ތިބޭއިރު، އާންމު ސާފުތާހިރުކަމަށް ސަމާލުކަން ދިނުމަށާއި، ހެލްތް ޕްރޮޓެކްޝަން އެޖެންސީއާއި ކަމާގުޅޭ އެހެނިހެން މުއައްސަސާތަކުންދޭ ލަފައާއި އިރުޝާދުތަކާ އެއްގޮތަށް އަމަލު ކުރުމަށް ދަރިވަރުންނާއި މުދައްރިސުން އަދި ބެލެނިވެރިންނަށް ހަނދާކޮށްދޭ ކަމަށް މިނިސްޓްރީން ބުނެއެވެ.