އެންޓި ކޮރަޕްޝަން ކޮމިޝަން (އޭސީސީ) ގެ ކުރީގެ ސެކްރެޓްރީ ޖެނެރަލް އެ ކޮމިޝަނުގައި ގިނަ ދުވަސްތަކެއް ވަންދެން މަސައްކަތް ކުރި މުވައްޒަފަކު ވަޒީފާއިން ވަކިކޮށް، އެކަމާ ގުޅޭ ލިޔެކިޔުންތަކެއް ފޯރޖް ކުރި މައްސަލައެއް ފެންމަތިވެއްޖެވެ.
ރާއްޖެއެމްވީއަށް އެނގިފައިވާ ގޮތުގައި އެ މުވައްޒަފު އެންޓި ކޮރަޕްޝަން ކޮމިޝަނުން ވަކިކުރިއިރު، އޭސީސީގައި މަސައްކަތް ކުރަމުންދާތާ 5 އަހަރަށްވުރެ ގިނަ ދުވަސް ވަނީ ވެފައެވެ. އަދި އެ މުވައްޒަފު ވަޒީފާއިން ވަކިކުރިއިރު، ވަޒީފާއާބެހޭ ޤާނޫނުގައި ބަޔާންކޮށްފައިވާ ވަޒީފާއިން މީހަކު ވަކިކުރާނަމަ ފުރިހަމަ ކުރަންޖެހޭ އިޖުރާޢަތުތައް ފުރިހަމަ ކޮށްފައެއްވެސް ނުވެއެވެ.
އޭގެ އިތުރުން، މި މައްސަލަ 21 އޭޕްރިލް 2019 ގައި ވަޒީފާއާބެހޭ ޓްރައިބިއުނަލްއަށް ހުށަހެޅުމުން އޭސީސީގެ އޭރުގެ ސެކްރެޓްރީ ޖެނެރަލް ވަނީ ލިޔުންތައް ފޯރޖުކޮށް ޓްރައިބިއުނަލްއަށް އެ ލިޔެކިޔުންތައް ހުށައަޅާފައެވެ. އެގޮތުން ޓްރައިބިއުނަލަށް ހުށަހަޅާފައިވާ ލިޔުމުގައި ސޮއި ކޮށްފައިވަނީ އެންޓި ކޮރަޕްޝަން ކޮމިޝަނުގެ ކުރީގެ ސެކްރެޓަރީ ޖެނެރަލް ޢަބްދުﷲ ރަޝީދުކަން އިތުބާރު ހުރި މަސްދަރަކުން ރާއްޖެއެމްވީއަށް ވަނީ ކަށަވަރު ކޮށްދެއްވާފައެވެ. އޭނާ އަކީ އޭސީސީގެ ކުރިގެ ދައުރުގައި ވެސް އަދި މި ދައުރުގެ މެންބަރުންނާއެކުވެސް މަސައްކަތް ކުރެއްވުމަށްފަހު، ދައުރު ހަމަކޮށް ވަކި ބޭފުޅެކެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އޭނާ ފޯރޖު ކޮށްފައިވަނީ ވަޒީފާއިން ވަކި ކުރި މުވައްޒަފަށް ލިޔުމުން އިންޒާރު ދިންކަމުގެ ލިޔުމެވެ. އެގޮތުން އެ ލިޔުމުގައި އެފަދަ އެހެން ލިޔުންތަކާ ތަފާތު އެތައްކަމެއް ފާހަގަވެސް ކުރެވިފައިވާއިރު، އެ ލިއުމާ ޙަވާލުވި މީހެއް ވެސް އެނގޭކަށް ނެތެވެ. އަދި އެ ލިޔުމުގެ ލެޓަރހެޑް ވެސް އެހެން ލިޔުންތަކާ ތަފާތެވެ.
މުވައްޒަފު ވަޒީފާއިން ވަކިކުރި މައްސަލައިގައި ވަޒީފާއާބެހޭ ޓަރައިބިއުނަލްއަށް ހުށަހެޅި ހިނގަމުންދާ މައްސަލައިގައި އޭސީސީގެ ފަރާތުން ވަކާލާތު ކުރުމަށް ޢަބްދުﷲ ރަޝީދު ވަޑައިގަތުމުން އެ މައްސަލައިގައި ޢަބްދުﷲ ރަޝީދަށް އޭސީސީ ތަމްސީލް ނުކުރެވޭނެ ކަމަށް 17 އޮކްޓޯބަރ 2019 ގައި ވަޒީފާއާބެހޭ ޓްރައިބިއުނަލުން ވަނީ ނިންމާފައެވެ.
