އެމެރިކާގެ ރައީސް ޑޮނަލްޑް ޓްރަމްޕް ކޮވިޑް-19 ގެ ފަރުވާ ހޯއްދެވުމަށް ފަހު އެނބުރި އާންމު އެއްވުންތަކަށް ވަޑައިގަތުމަށް ތައްޔާރަށް ހުންނެވި ކަމަށް އެ މަނިކުފާނުގެ ޑޮކްޓަރުންގެ ޓީމުން ބުނެފިއެވެ.

ޓްރަމްޕްގެ ފިޒިޝަންއާ ޙަވާލާދީ ބީބީސީގައި ރިޕޯޓް ކޮށްފައިވާ ގޮތުން އެމަނިކުފާނު ވަނީ ކޮވިޑް-19 ގެ ފަރުވާ ފުރިހަމަ ކުރައްވާފައެވެ. އެއާއެކު މި ހަފްތާ ބަންދުން ފެށިގެން އެމަނިކުފާނު އާންމު އެއްވުންތަކަށް ވަޑައިގަންނަވަން ތައްޔާރަށް ހުންނެވިކަމަށް ޑރ. ޝޯން ކޮންލޭ ވަނީ ވިދާޅުވެފައެވެ.

ޑރ ޝޯން ވިދާޅުވީ، ރައީސް ޑޮނަލްޑް ޓްރަމްޕްގެ ޙާލަތު މިހާރު ސްޓޭބަލް ކަމަށާއި، ކޮވިޑަށް ދިން ފަރުވާގެ ރަނގަޅު އަސަރު މިހާރު ފެންނަމުންދާ ކަމަށެވެ. އެކަމާ ގުޅިގެން ޓްރަމްޕް ވިދާޅުވީ، ހުކުރު ދުވަހު އެމަނިކުފާނު ކޮވިޑަށް ޓެސްޓު ކުރުމަށް ވިސްނަވަމުންދާ ކަމަށާއި، އެއަށްފަހު ހަފްތާ ބަންދުގައި ކެމްޕެއިން ރެލީއެއް ކުރިއަށް ގެންދަވާނެ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ، ބަލިން މުޅިން ރަނގަޅު ނުވަނީސް ހޮސްޕިޓަލުން ނުކުމެވަޑައިގަންނަވާފައެވެ. އެގޮތުން ޓްރަމްޕް ވަނީ އެމެރިކާގެ މިލިޓަރީ ހޮސްޕިޓަލެއްގައި ފަރުވާ ހޯއްދެވުމަށް ފަހު ވައިޓް ހައުސްއަށް ވަޑައިގެން، މާސްކު ނަންގަވާ ފޮޓޯ އަދި ވީޑިއޯއެއް ނަންގަވާފައެވެ. މިކަމާއި ގުޅިގެން ޓްރަމްޕަށް ގިނަ ބަޔެއްގެ ފާޑުކިޔުން ވަނީ އަމާޒުވެފައެވެ.

އޭގެ އިތުރުން، ޓްރަމްޕްގެ ބަލި ފަސޭހަ ނުވަނީސް ރިޔާސީ ބަހުސްގެ ދެވަނަ މަރުޙަލާގައި ބައިވެރިވެވަޑައިނުގަންނަވާނެ ކަމަށް އިދިކޮޅު ކެނޑިޑޭޓް ޖޯ ބައިޑެން ވަނީ ވިދާޅުވެފައެވެ. އަދި ބަހުސް އިންތިޒާމު ކުރާ ފަރާތްތަކުން ވަރޗުއަލްކޮށް ބަހުސް ކުރިޔަށް ގެންދަން ނިންމާފައިވާއިރު، މިހެން ބާއްވާ ބަހުސެއްގައި ބައިވެރިވެވަޑައިގެން "ވަގުތު ބޭކާރުކޮށް ނުލައްވާނެ" ޓްރަމްޕް ވަނީ ވިދާޅުވެފައެވެ.

އެމެރިކާގެ ސެންޓަރ ފޯރ ޑިޒީސް ކޮންޓްރޯލްގެ ގައިޑްލައިންތަކުގައި ވާގޮތުންނަމަ، އެންމެ ފުރަތަމަ ބަލީގެ އަލާމަތްތައް ފެންނަން ފަށާތާ މަދުވެގެން 10 ދުވަސް ވަންދެން ޓްރަމްޕް އައިސޮލޭޝަންގައި ހުންނަވަން ޖެހޭނެއެވެ. އެހެންނަމަވެސް ޓްރަމްޕް މިހާރު ގެންދަވަނީ އޭނާ އަކީ ބައްޔަށް އިމިއުން މީހެއް ކަމަށް ދޭހަވާ ގޮތަށް ވާހަަކަފުޅު ދައްކަވަމުންނެވެ.