އޮމާން އެއާވޭސްގެ ފަސިންޖަރުންނަށް ކޮވިޑް-19 އިންޝޫރަންސް ފޯރުކޮށްދޭން އެ އެއަރލައިނުން ނިންމައިފިއެވެ.

އޮމަރު އެއާވޭސްއިން ދަތުރުކުރާ ފަސިންޖަރުންނަށް ކޮވިޑް-19 އިންޝުރަންސް ދޭން ނިންމާފައި ވަނީ މި ހާލަތުގައި ދަތުރުކުރާ ފަރާތްތަކުން އެ އެއަރލައިން އިހްތިޔާރު ކުރުމަށް ބާރު އެޅުމުގެ ގޮތުން ކަމަށްވެސް އެ އެއަރލައިނުން ވަނީ ބުނެފައެވެ.

އެގޮތުން މި އިންޝޫރެންސް ސްކީމްގެ ދަށުން ކޮވިޑް-19 އާއި ގުޅިގެން ބޭސްފަރުވާ ކުރަންޖެހިއްޖެ ނަމަ އެކަމަށް ހަރަދުކޮށްދިނުމުގެ އިތުރުން، ކަރަންޓީން ނުވަތަ އައިސޮލޭޝަނަށް ދާން ޖެހިއްޖެ ނަމަވެސް އެކަމުގެ ހަރަދުތައް އެ އެއަރލައިން ހަމަޖައްސައިދޭނެއެވެ.

އޮމާން އެއާވޭސްއިން މިގޮތަށް ނިންމާފައި މިވަނީ ކޮވިޑް-19 ގެ ސަބަބުން އެއަރލައިންގެ ދަތުރުތައް މެދުކަނޑާލުމަށް ފަހު އަލުން ދަތުރުތަށް ފެށުމާއި އެކުއެވެ. އެ އެއަރލައިންގެ ދަތުރުތައް ވަނީ ޔޫއޭއީއަށް ވެސް ފަށާފައެވެ.

ކޮވިޑް-19 ގެ ސަބަބުން އެއަރލައިންތަކަށް ބޮޑެތި ގޮންޖެހުންތަކަކާއި ކުރިމަތިލާން ޖެހިފައިވާ އިރު، ގިނަ އެއަރލައިންތަކަކުން ވަނީ ވަގުތީ ގޮތުން ދަތުރުތައް މެދު ކަނޑާލުމަށް ފަހު މިހާރު އަލުން ދަތުރުތައް ފަށާފައެވެ. އަދި ބައެއް އެއަރލައިންތަކުން ވަނީ ހިންގުމުގެ ހަރަދު ހަމަޖެއްސުމުގެ ގޮތުން ސަރުކާރުތަކާއި މާލީ އިދާރާތަކުން ބޮޑެތި އަދަދުތަކުން ލޯނު ނަގާފައެވެ.

ބައިނަލްއަގުވާމީ ވައިގެ ދަތުރުފަތުރާ ބެހޭ ޖަމިއްޔާ، އަޔާޓާއިން ހާމަކޮށްފައިވާ ގޮތުގައި ކުރިން ދަތުރުކުރި އަދަދާ ގާތަށްވެސް ފަސިންޖަރުންގެ އަދަދުތައް އުފުލެން ދެ އަހަރު ވަރު ނަގާނެކަމަށް ބުނެފައެވެ. ނަމަވެސް، ވެކްސިނެއް ލިބިއްޖެ ހާލަތެއްގައި އަނެއްކާވެސް އެއަރލައިން އިންޑަސްޓްރީ ހަމައަކަށް އެޅޭނެ ކަމަށް ލަފާކުރެވޭ ކަމަށް އަޔާޓާއިން ވަނީ ފާހަގަކޮށްފައެވެ.