ސްޕެނިޝް ލީގުގައި އާދީއްތަ ދުވަހުގެރޭ ކުޅުނު މެޗުން ބާސެލޯނާ އެއްވަރުވިއިރު، ލެވާންޓޭ އަތުން ހޯދި މޮޅާއެކު އެންމެ ފަހުގެ ޗެމްޕިއަން ރެއާލް މެޑްރިޑް ތާވަލުގެ އެއްވަނައަށް ޖެހިލައިފިއެވެ.

އަމިއްލަ ދަނޑުގައި އާދީއްތަ ދުވަހުގެރޭ ކުޅުނު މެޗުން ބާސާ އެއްވަރުވީ ސެވިއްޔާއާ 1-1 ންނެވެ.

މުޅި މެޗުގައިވެސް ދެ ޓީމުގެ ފަރާތުން އާދައިގެ ކުޅުމެއް ފެނިގެންދިޔައިރު، މި މެޗުގައި ފެނިގެންދިޔަ ދެ ލަނޑުވެސް ދެ ޓީމުން ޖަހާފައިވަނީ މެޗުގެ ފުރަތަމަ 10 މިނެޓުގެ ތެރޭގައެވެ.

އެގޮތުން މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ސެވިއްޔާއިންނެވެ. މެޗުގެ އަށްވަނަ މިނެޓުގައި މި ލަނޑު ސެވިއްޔާއަށް ކާމިޔާބުކޮށްދިނީ ފޯވާޑް ލޫކް ޑި ޔޯނެވެ. އެކަމަކު ސެވިއްޔާއަށް މެޗުގައި ލީޑު ހިފަހައްޓާލެވެނީ އެންމެ ދެ މިނެޓަށެވެ. އެގޮތުން މެޗުގެ 10 ވަނަ މިނެޓުގައި މިޑްފީލްޑަރު ފިލިއްޕޭ ކުޓީނިއޯ ވަނީ ބާސާއަށް ނަތީޖާ އެއްވަރުކޮށްދީފައެވެ. މިއީ މިދިޔަ ސީޒަނުގައި ލޯނު އެއްބަސްވުމެއްގެ ދަށުން ބަޔާން މިއުނިކަށް ކުޅުމަށްފަހު މި ސީޒަނުގައި އެނބުރި ބާސާއާ ގުޅުމަށްފަހު ކުޓީނިއޯ ކާމިޔާބުކޮށްދިން ފުރަތަމަ ލަނޑެވެ.

މި ދެ ލަނޑަށްފަހު ދެ ޓީމުގެ ފަރާތުން އާދައިގެ ކުޅުމެއް ފެނިގެންދިޔައިރު، ދެ ޓީމަށްވެސް މުޅި މެޗުގައި ނުރައްކާތެރި ގިނަ ހަމަލާތަކެއް އުފެއްދިފައެއް ނުވެއެވެ.

މީގެ އިތުރުން ސްޕެނިޝް ލީގުގެ އެންމެ ފަހުގެ ޗެމްޕިއަން ރެއާލް ތާވަލުގެ އެއްވަނައަށް ޖެހިލީ އާދީއްތަ ދުވަހުގެރޭ ކުޅުނު މެޗުން ލެވާންޓޭ އަތުން 2-0 ން މޮޅުވެގެންނެވެ.

ރަށުން ބޭރުގައި ކުޅުނު މި މެޗުގެ ފުރަތަމަ ހާފުގައި ރެއާލުން ވަނީ ލީޑު ނަގާފައެވެ. މެޗުގެ 16 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ވިނީޝިއަސް ޖޫނިއާއެވެ.

އަދި މި މެޗުގައި ރެއާލުން ލީޑު ފުޅާކޮށްފައިވަނީ މެޗުގެ އިތުރު ވަގުތުގައެވެ. އިތުރު ވަގުތުގެ ފަސްވަނަ މިނެޓުގައި މި ލަނޑު އެ ޓީމަށް ޖަހައިދިނީ ތަޖުރިބާކާރު ފޯވާޑް ކަރިމް ބެންޒެމާއެވެ. މިއީ ރެއާލުގެ ޖާޒީގައި ބެންޒެމާ ކާމިޔާބުކުރި 250 ވަނަ ލަނޑެވެ.

މި މޮޅާއެކު ރެއާލް އެއްވަނައަށް ޖެހިލީ ކުޅުނު ހަތަރު މެޗުން ލިބުނު 10 ޕޮއިންޓާއެކުއެވެ. އަދި ސެވިއްޔާ އަތުން ޕޮއިންޓެއް ހޯދި ވާދަވެރި ބާސާ އޮތީ ތާވަލުގެ ފަސްވަނައިގައި ތިން މެޗުން ހަތް ޕޮއިންޓާއެކުއެވެ. ބާސާގެ ފުލުން ހަވަނައިގައި އޮތް ސެވިއްޔާއަށްވެސް ވަނީ ތިން މެޗުން ހަތް ޕޮއިންޓް ލިބިފައެވެ.