މި ޓްރާންސްފާ ބާޒާރު ބަންދުވުމުގެ ކުރިން އާސެނަލުން ބޮޑު ޓްރާންސްފާއެއް ފެނިދާނެ ކަމުގެ އިޝާރާތެއް އެ ޓީމުގެ ކޯޗު މިކޭލް އާޓެޓާ ދީފިއެވެ.
މިފަހަރުގެ ޓްރާންސްފާ ބާޒާރު ބަންދުވަން ދެން އޮތީ އެންމެ ދުވަހެކެވެ.
އިނގިރޭސި މީޑިއާއަކަށް ދިން އިންޓަވިއުއެއްގައި އާޓެޓާ ބުނީ ހޯމަ ދުވަހު ޓްރާންސްފާ ބާޒާރު ބަންދުވާއިރު، އާސެނަލުން އިތުރު ކުޅުންތެރިއެއް ގެނައުމަށް މަސައްކަތް ކުރަމުން އަންނަ ކަމަށާއި، އަދި އެއީ ބޮޑު ޓްރާންސްފާ އަކަށް ވެދާނެ ކަމަށެވެ.
ރިޕޯޓުތައް ބުނާ ގޮތުން އާސެނަލުން އަންނަނީ ފްރާންސްގެ ލިޔޯނަށް ކުޅެމުން އަންނަ ހޫސެމް އޯވާ ހޯދުމަށް މަސައްކަތް ކުރަމުންނެވެ. މީގެ އިތުރުން އެތުލެޓިކޯ މެޑްރިޑުގެ ތޯމަސް ޕާޓޭ ހޯދުމަށްވެސް އާސެނަލުން އަންނަނީ މަސައްކަތް ކުރަމުންނެވެ.
އާސެނަލުން ލިޔޯނުގެ ހޫސެމް އޯވާ ހޯދުމަށް މަސައްކަތް ކުރަމުން އައި ނަމަވެސް، އޭނާ ވިއްކަން ލިޔޯން ދެކޮޅު ކަމަށް ދާދި ފަހުން މީޑިއާތަކުން ވަނީ ރިޕޯޓުކޮށްފައެވެ.
އެކަމަކު އާޓެޓާ ބުނީ ޓްރާންސްފާ ބާޒާރު ބަންދުވުމުގެ ކުރިން ބޮޑެތި ޚަބަރުތަކެއް ލިބުމުގެ ފުރުސަތު އެބައޮތް ކަމަށާއި، އާސެނަލަށް އަދި މި ޓްރާންސްފާ ބާޒާރު ނުނިމޭ ކަމަށެވެ. ނަމަވެސް އާޓެޓާ ވަނީ މިހާރު އާސެނަލުގައި އޮތް ސްކޮޑާއި މެދުވެސް ހިތްހަމަޖެހޭ ކަމަށްވެސް ބުނެފައެވެ. އޭނާ ބުނީ މިހާރު އޮތް ސްކޮޑާއެކުވެސް ތަށި ހޯދުމުގެ ފުރުސަތު އާސެނަލަށް އެބައޮތް ކަމަށެވެ. އަދި މި ސީޒަނުގައި އާސެނަލުގެ ފުރަތަމަ ޓާގެޓަކީ އަންނަ ސީޒަނުގެ ޔުއެފާ ޗެމްޕިއަންސް ލީގުން ޖާގައެއް ހޯދުން ކަމަށްވެސް އާޓެޓާ ބުންޏެވެ.
އާސެނަލުން މި ޓްރާންސްފާ ބާޒާރުގައި އަދި މިހާތަނަށް މާ ބޮޑު ޚަރަދެއް ކޮށްފައި ނުވި ނަމަވެސް، މީގެ ކުރިން އެ ޓީމުން ވަނީ ޗެލްސީއަށް ކުޅެމުން އައި ބްރެޒިލުގެ ފޯވާޑް ވިލިއަން އާއި ލިލްއަށް ކުޅެމުން އައި ބްރެޒިލުގެ ޒުވާން ޑިފެންޑަރު ގަބްރިއެލް މަގަލްހައެސްގެ ސޮއި ހޯދާފައެވެ. އަދި ވަނީ ސްޕެއިން މިޑްފީލްޑަރު ޑެނީ ސެބާޔޯސްގެ ލޯނު މުއްދަތުވެސް އިތުރުކޮށްފައެވެ.
