އިނގިރޭސިވިލާތުގައި އަވަސް އާންމު އިންތިޚާބެއް ބޭއްވުމަށް އެގައުމުގެ ބޮޑުވަޒީރު ތެރެސާ މޭ ބުދަ ދުވަހު ގޮވާލައްވައިފިއެވެ.
މިއަހަރުގެ ޖޫން މަހުގެ 8 ވަނަ ދުވަހު އަވަސް އިންތިޚާބެއް ބޭއްވުމަށް ތެރެސާ މޭ ކުއްލި ގޮތަކަށް ގޮވާލެއްވުމުގެ ސަބަަބުން އިނގިރޭސިވިލާތަށް ހައިރާންކަން ލިބިގެން ގޮސްފައިވެއެވެ.
އަވަސް އިންތިޚާބަކަށް ގޮވާލައްވައި އެކަމަނާ ވިދާޅުވީ ޔޫރަޕިއަން ޔޫނިއަން (އީޔޫ) އިން ވަކިވުމަށް އިނގިރޭސިން ނިންްމި ނިންމުމާ ގުޅިގެން އިނގިރޭސިވިލާތަށް ޔަގީންކަމާއި، ހަމަޖެހުމާއި އަދި ވަރުގަދަ ލީޑާޝިޕެއް ބޭނުންވާ ކަމަށެވެ. ބޮޑުވަޒީރު މޭ އިތުރަށް ވިދާޅުވީ "ގައުމުގެ އެންމެން އެއްބައިވަންތަ ވަަމުންދާ ކަމަށާއި އެހެންނަމަވެސް ވެސްޓްމިނިސްޓާ (ގާނޫނުހަދާ މަޖިލިސް) އެއްބައިވަންތަ ނުވާ" ކަަމަށެވެ.
އަވަސް އިންތިޚާބަކަށް ގޮވާލެއްވި މައިގަނޑު ސަބަބާ ގުޅޭގޮތުން ބޮޑުވަޒީރު މޭ ވިދާޅުވީ ކުރިއަށް އޮތް އަހަރުތަކަކީ ގައުމަށް ރައްކާތެރި އަހަރުތަކަކަށް ހެދުމަށްޓަކައި، އަވަސް އިންތިޚާބެއް ބޭއްވުމަށް އެކަމަނާ ނިންމެވީ ކަމަށެވެ.
އަވަސް އިންތިޚާބެއް ބޭއްވުމަށް ބޮޑުވަޒީރު މޭ ގޮވާލެއްވިއިރު، އިނގިރޭސިވިލާތް މިހާރު ތައްޔާރުވަމުން ދަނީ އީޔޫ އިން ވަކިވުމުގެ ނާޒުކު މަޝްވަރާތަކަށެވެ.
އިނގިރޭސިވިލާތުގެ ގާނޫނުހަދާ މަޖިލީހުގައި ތެރެސާ މޭގެ އިންތިޚާބީ ޕްލޭނަށް ވޯޓަށް އެހުން ބުދަ ދުވަހު އޮންނާނެއެވެ.
