އަންނަ އަހަރު ޖެނުއަރީ މަހުން ފެށިގެން ސައުދީން އަނެއްކާ ވެސް ބައިނަލްއަޤުވާމީ ދަތުރުތައް ފަށަން ތައްޔާރު ވެއްޖެއެވެ.

ސައުދީގެ ދައުލަތުގެ މީޑިއާއާ ޙަވާލާދީ ބޭރުގެ ނޫސްތަކުން ރިޕޯޓް ކޮށްފައިވާ ގޮތުން ސައުދީގައި ކޮވިޑް-19 އާ ގުޅިގެން އަޅާފައިވާ ފިޔަވަޅުތަކަށް ލުއިދީ 2021 ވަނަ އަހަރުގެ ޖެނުއަރީ މަހުގެ 1 ވަނަ ދުވަހުގެ ފަހުން އެ ޤައުމުން އަލުން ބައިނަލްއަޤުވާމީ ދަތުރު ފަތުރުތައް ފެށުމަށް ދަނީ ތައްޔާރު ވަމުންނެވެ.

އެގޮތުން އެއްގަމު ދަތުރުތަކާއި، ކަނޑުގެ މަގުންނާއި، ވައިގެ މަގުން އެ ޤައުމަށް އެތެރެވުމާއި، އެ ޤައުމުން ބޭރުވުމުގެ ހުއްދަ ދިނުމަށް ނިންމާފައިވާއިރު، ރައްކާތެރި ކަމުގެ ފިޔަވަޅުތައް ކުރީ ބައިގައި ދަނީ އަޅަމުންނެވެ.

އޭގެ އިތުރުން، މިހާރު އަޅާފައިވާ ފިޔަވަޅުތަކަށް ލުއިދީ، އެކަން ތަންފީޒު ކުރަން ފަށާނެ ސީދާ ތާރީޚެއް އަންނަ އަހަރު ފެށުމުގެ 30 ދުވަސް ކުރިން އިއުލާނު ކުރާނެ ކަމަށް ވެސް ސައުދީގެ ދައުލަތުގެ މީޑީއާ އިން ރިޕޯޓް ކޮށްފައިވެއެވެ. އަދި އެކަމަށްޓަކައި، އަޅަންޖެހޭ ރައްކާތެރިކަމުގެ ފިޔަވަޅުތައް އަޅާފައިވޭތޯ ކަށަވަރު ކުރުމަށް އެ ޤައުމުގެ ސިއްޙަތާ ބެހޭ ވުޒާރާ އަށް ވެސް މިހާރު ވަނީ އަންގާފައެވެ.

ސައުދީން އަލުން ބައިނަލްއަޤުވާމީ ދަތުރުތައް ފަށަން ތައްޔާރުވި ނަމަވެސް، މައިގަނޑު ޝަރުތެއްގެ ގޮތުން، އެ ޤައުމަށް އެތެރެވާއިރު، ކޮވިޑް-19 އަށް ނެގެޓިވްކަން ކަށަވަރު ކުރަން ޖެހެއެވެ. އެގޮތުން ސައްޙަ އޭޖެންސީއަކުން ތައްޔާރު ކޮށްފައިވާ 48 ގަޑިއިރު ނުވާ ކޮވިޑް ނެގެޓިވް ނަތީޖާއެއް ހުށައަޅަންޖެހޭ ކަމަށް އެ ޤައުމުގެ ނޫސްތަކުން ރިޕޯޓް ކޮށްފައިވެއެވެ.

އޭގެ އިތުރުން، އެ ޤައުމުގެ ޙާލަތަށް ބަލައި، ކުރިއެކޭ އެއްގޮތަށް އުމްރާގެ އަޅުކަންތައް އަލުން ފެށުމާ ގުޅޭ އުސޫލުތައް ވެސް އެކުލަވާލާނެ ކަމަށް ރިޕޯޓްތައް ބުނެއެވެ.

ސައުދީން ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ބައިނަލްއަޤުވާމީ ދަތުރު ފަތުރުތައް ހުއްޓާލީ މި އަހަރުގެ މާރޗު މަހުގެ ކުރީކޮޅުއެވެ. އެހެން ނަމަވެސް މެއި މަހުގެ ތެރޭގައި އެތެރޭގެ އުދުހުންތައް އަލުން ފެށި ނަމަވެސް، މިހާތަނަށް ވެސް ބައިނަލްއަޤުވާމީ ދަތުރުތައް ފަށާފައެއް ނުވެއެވެ.

ސައުދީން މިހާތަނަށް ކޮވިޑް-19 އަށް ޕޮޒިޓިވްވެފައިވަނީ 325،651 މީހެކެވެ. އަދި ވައިރަސް ޖެހިގެން މަރުވެފައިވަނީ 4268 މީހުންނެވެ.