އަންހެން ފުޓްބޯޅައަށް ހާއްސަ އިސްކަމެއް ދީގެން މުޅި ރާއްޖޭގައި އަންހެން ފުޓްބޯޅަ ކުރިއެރުވުމަށް މަސައްކަތް ކުރާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަމުން ބައްސާމް ވިދާޅުވީ ފުރަތަމަ ދައުރުގައިވެސް އަންހެން ފުޓްބޯޅަ ކުރިއެރުވުމަށް މަސައްކަތްތަކެއް ކުރެވުނު ނަމަވެސް، އެ މަސައްކަތާ މެދު ހިތްހަމަނުޖެހޭ ކަމަށެވެ. އެހެންކަމުން މި ދައުރުގައި އަންހެން ފުޓްބޯޅައަށް ވަރަށް ބޮޑު އިސްކަމެއް ދޭނެ ކަމަށާއި، ރާއްޖޭގައި ގަވާއިދުން ކުޅޭނެ އަންހެން ފުޓްބޯޅަ ލީގެއް އަންނަ އަހަރު ފެށުމަށް ނިންމާފައިވާ ކަމަށް ބައްސާމް ވިދާޅުވިއެވެ.
ބައްސާމް ވިދާޅުވީ އެފްއޭއެމުން ކޮންމެ އަހަރަކު ކުލަބުތަކަށް ފައިސާ ދޫކުރާއިރު، އެ ކުލަބުތަކާއެކު އެއްބަސްވުމެއް ހެދޭ ކަމަށާއި، އެ އެއްބަސްވުމުގައިވެސް ކޮންމެ ކުލަބަކުންވެސް އަންހެން ޓީމެއް ހެދުމަށް ލާޒިމުކޮށްފައިވާނެ ކަމަށެވެ.
އަޅުގަނޑުމެން ފުރަތަމަ ދައުރުގައިވެސް ވަރަށް މަސައްކަތް ކުރިން އަންހެން ލީގެއް ބޭއްވުމަށް. ވަރަށް ބޮޑަށް އެ މަސައްކަތްކުރެވި ލީގެއްގެ މަސައްކަތްވެސް ވަރަށް ބާރަށް ކުރިއަށްދިޔަ. އެހެން ނަމަވެސް ކޮންމެވެސް ސަބަބަކާ ހުރެ އެކަން ނުވެ ދިޔައީ. އައު ދައުރުގައި އަންނަ އަހަރު އަންހެން ލީގެއް ފެށުމަކީ އެފްއޭއެމްގެ އެންމެ ބޮޑު އެއް އަމާޒު. އެގޮތުން ކޮންމެ ކުލަބަށް މިހާރު ލާޒިމުވާނެ އަންހެން ޓީމެއް ބޭއްވުން.އެފްއޭއެމްގެ ރައީސް ބައްސާމް އަދީލް ޖަލީލް
ބައްސާމް އިތުރަށް ވިދާޅުވީ ފަސް ޑިވިޝަނުގެ ލީގެއްގެ ގޮތުގައި އަންހެން ފުޓްބޯޅަ ލީގެއް ފެށުމަށް އަންނަ އަހަރު ނިންމާފައިވާއިރު، އަންހެން ފުޓްބޯޅަ ކުރިއެރުވުމަށް ބޮޑު ހޭދައެއް ކުރުމަށްވެސް އެފްއޭއެމުން އޮތީ ތައްޔާރަށް ކަމަށެވެ.
ފީފާ އާއި އޭއެފްސީން އަންހެން ފުޓްބޯޅަ ކުރިއެރުވުމަށް ބޮޑު ހޭދަތަކެއް ކުރަމުންދާއިރު، އަންހެން ފުޓްބޯޅަ ރާއްޖޭގައި ފެށިގެންދިޔުމަކީ އަންހެން ކުޅުންތެރިންނަށް ފުޓްބޯޅައިން ކުރިއަށް ދިޔުމަށް ގިނަ ފުރުސަތުތަކެއް ތަނަވަސް ވެގެންދާނެ ކަމެކެވެ.
އެގޮތުން އުމުރުފުރާތަކާއި އަދި ވައިޑީޕީ ޕްރޮގްރާމުތަކުގައި ފިރެހެން ފުޓްބޯޅައަށް ދީފައިވާ އިސްކަން، އަންހެން ފުޓްބޯޅައިގެ އެކި އުމުރުފުރާތަކަށް ތަނަވަސްކޮށްދޭނެ ކަމަށާއި، ލީގެއް ފެށުމުން ފިރިހެން ފުޓްބޯޅަ ކުރިއަށްދާ ގޮތަށް އަންހެން ފުޓްބޯޅަ ކުރިއަށް ގެންދިޔުމަށްވެސް ބޮޑު ކުރިއެރުމެއް ލިބިގެންދާނެ ކަމަށް ބައްސާމް ވިދާޅުވިއެވެ.
އައު ޕްލޭންގައި އަޅުގަނޑުމެން ވަރަށް ބޮޑު އިސްކަމެއްދޭނެ އަންހެން ފުޓްބޯޅައަށް. ސަރުކާރުގެ ފަރާތުންވެސް އަންހެން ފުޓްބޯޅަ ކުރިއަށްގެންދިޔުމަށް އެހީތެރިކަން ލިބިގެންދާނެ ކަމުގެ ޔަގީންކަން ވަޒީރުވެސް ވަނީ ދެއްވާފައި. ފިރިހެން ފުޓްބޯޅައެކޭ އެއްގޮތަށް އަންހެން ފުޓްބޯޅަ އެއް ހަމައެއްގައި އިސްކަން ދީގެން ގެންދިޔުން އެއީ އަޅުގަނޑުމެންގެ އަމާޒު. އޭގެ ތެރޭގައި އަންހެން ފުޓްބޯޅަ ދިރުވާ އާލާ ކުރުމާއި، ފިރިހެން ކުޅުންތެރިންނެކޭ އެއްގޮތަށް އެކެޑަމީ ސްޓައިލަށް ކުރިއަށް ގެންދާނަން.އެފްއޭއެމްގެ ރައީސް ބައްސާމް އަދީލް ޖަލީލް
އެފްއޭއެމްގެ މިހާރުގެ ލީޑަޝިޕާއެކު އަންހެން ފުޓްބޯޅައަށް ކުރިއެރުންތަކެއް ލިބުނުން ނަމަވެސް، ރާއްޖޭގެ އަންހެން ފުޓްބޯޅަ ކުރިޔަށްދަނީ ގައުމީ ޓީމަށް ކުޅެން އެއްވެލާ ގޮތަށް އޮންނަ ޓީމެއްގެ ގޮތުގައި އެކަންޏެވެ.
"ކުޅިވަރު ފައިލް" ޕްރޮގްރާމުގައި ވާހަކަ ދައްކަމުން ބައްސާމް ވަނީ ރާއްޖޭގެ ފުޓްބޯޅައަށް ކުރިޔަށް އޮތް ދައުރުގައި އަންނާނެ ކުރިއެރުމާ ބެހޭ ގޮތުން ވާހަކަ ދައްކާފައެވެ. އެގޮތުން ފުޓްބޯޅައިގެ ވަސީލަތަށް ބޮޑު ކުރިއެރުމެއް ލިބި އެފްއޭއެމަށް ލިބޭ އާއްމުދަނީ އެތައް ގުނައެއް ކުރިއަށް އޮތް ދައުރުގައި އިތުރު ކުރެވޭނެ ކަމަށް ބައްސާމް ވިދާޅުވިއެވެ.
