އައިސްލެންޑްގެ ކަރަންޓީން ގަވާއިދުތަކާ ޚިލާފުވުމުން އިންގްލެންޑްގެ ގައުމީ ފުޓްބޯޅަ ޓީމުގެ ސްކޮޑުން މެންޗެސްޓާ ސިޓީގެ މިޑްފީލްޑަރު ފިލް ފޯޑެން އާއި މެންޗެސްޓާ ޔުނައިޓެޑްގެ ފޯވާޑް މޭސަން ގްރީންވުޑް ބާކީކޮށްފިއެވެ.

ޔުއެފާ ނޭޝަންސް ލީގުގައި އައިސްލެންޑް އަތުން 1-0 ން އިންގްލެންޑް މޮޅުވި މެޗުގައި ޒުވާން ދެ ތަރިން ކަމަށްވާ ފޯޑެން އާއި ގްރީންވުޑް ވަނީ އިންގްލެންޑްގެ ޖާޒީގައި ފުރަތަމަ ފަހަރަށް ކުޅެފައެވެ.

ރިޕޯޓުތައް ބުނާ ގޮތުން އައިސްލެންޑްގައި ކުޅުނު މި މެޗަށްފަހު އެ ދެ ކުޅުންތެރިން ވަނީ ކަރަންޓީން އުސޫލުތަކާ ޚިލާފުވެފައެވެ. އެއާއެކު އިނގިރޭސި އެފްއޭއިން އަންނަނީ އެ ދެ ކުޅުންތެރިންގެ މައްސަލަ ބަލަމުންނެވެ.

ހޯމަ ދުވަހު ނޫސްވެރިންނަށް މައުލޫމާތު ދެމުން އިންގްލެންޑްގެ ކޯޗު ގެރެތު ސައުތުގޭޓް ބުނީ ކޮވިޑް-19 އާ ގުޅިގެން އައިސްލެންޑުން އެކުލަވާލާފައިވާ ކަރަންޓީން އުސޫލުތަކާ ޚިލާފަށް ފޯޑެން އާއި ގްރީންވުޑް އަމަލުކޮށްފައިވާ ކަމަށެވެ. އެކަމަކު އެ ދެ ކުޅުންތެރިން ގަވާއިދުތަކާ ޚިލާފަށް ކުރި ވަކިކަމެއް ހާމަކޮށްފައެއް ނުވެއެވެ. ސައުތުގޭޓް ބުނީ ގަވާއިދުތަކާ ޚިލާފުވުމުން އެ ދެ ކުޅުންތެރިން މިހާރު އިންގްލެންޑްގެ ސްކޮޑުން ބާކީކޮށްފައިވާ ކަމަށާއި، އެހެންކަމުން އެ ދެ ކުޅުންތެރިން ކަނޑައަޅާފައިވާ ޕްރޮޓޮކޯލްތަކުގެ ދަށުން އެނބުރި އިންގްލެންޑަށް ދާނެ ކަމަށެވެ. އެކަމަކު މި މައްސަލައިގައި އެ ކުޅުންތެރިން މާފަށް އެދެފައިވާ ކަމަށްވެސް ސައުތުގޭޓް ބުންޏެވެ.

ރިޕޯޓުތައް ބުނާ ގޮތުން އިންގްލެންޑްގެ ސްކޮޑުން ފޯޑެން އާއި ގްރީންވުޑް ބާކީކުރިއިރު، އިނގިރޭސި އެފްއޭއިން އިތުރަށް މި މައްސަލަ ބެލުމަށްފަހު އެ ދެ ކުޅުންތެރިންނަށް ފިޔަވަޅު އަޅާނެއެވެ.

އިންގްލެންޑްގެ ސްކޮޑުން ފޯޑެން އާއި ގްރީންވުޑް ބާކީކުރިއިރު، މީގެ ކުރިން ނޭޝަންސް ލީގު ފެށުމުގެ ކުރިން މެންޗެސްޓާ ޔުނައިޓެޑްގެ ކެޕްޓަން ހެރީ މެގުއާވެސް ވަނީ ސްކޮޑުން ބާކީކޮށްފައެވެ. އެފަހަރު މެގުއާ ސްކޮޑުން ބާކީކުރީ ގްރީސްގެ ޖަޒީރާ ރަށެއް ކަމަށްވާ މައިކޯނޯސްގައި ޗުއްޓީ ހޭދަކުރިއިރު ހިނގާދިޔަ މާރާމާރީއާ ގުޅިގެން މެގުއާއާ ދެކޮޅަށް ކުރި ދައުވާ، އޭނާގެ މައްޗަށް ސާބިތުވުމާ ގުޅިގެންނެވެ.

ނޭޝަންސް ލީގު އިންގްލެންޑް ވާދަކުރަމުން އަންނައިރު، އެޓީމުން ދެން މެޗެއް ކުޅޭނީ އަންގާރަ ދުވަހުގެރޭއެވެ. އެރޭ އިންގްލެންޑް ނުކުންނާނީ ޑެންމާކާ ދެކޮޅަށެވެ.