މެލްބަރންގެ ލޮކްޑައުން މުއްދަތު ދެ ހަފްތާއަށް އިތުރު ކޮށްފިއެވެ.

މެލްބަރންގެ ލޮކްޑައުން މުއްދަތު ދެ ހަފްތާއަށް އިތުރުކޮށްފައިވާއިރު ވިކްޓޯރިއާ ސްޓޭޓްގެ ޕްރެމިއަރ ޑެނިއަލް އެންޑްރިއުސް ވިދާޅުވީ ކުދި ލުއިތަކާއެކު 28 ސެޕްޓެމްބަރ އާ ހަމައަށް ލޮކްޑައުންގެ މުއްދަތު އިތުރު ކޮށްފައިވާ ކަމަށެވެ.

އެ ޤައުމުގެ ސަރުކާރުން ވަނީ އޮކްޓޯބަރ މަހުން ފެށިގެން އިތުރު ލުއި ތަކެއް ދިނުމަށް ވެސް ނިންމާފައެވެ.

އޮސްޓްރޭލިއާ އިން 26،000 މީހުންނަށް ވުރެން ގިނަ މީހުން ކޮވިޑް-19 އަށް ޕޮޒިޓިވް ވެފައިވާއިރު ވައިރަސް ޖެހިގެން އެ ގައުމުން 750ށްވުރެން ގިނަ މީހުން ވަނީ މަރުވެފައެވެ.

މިއީ މެލްބަރން ލޮކްޑައުން އަކަށް ދިޔަ ދެވަނަ ފަހަރެވެ. އެންމެ ފުރަތަމަ އެ ގައުމު ލޮކްޑައުން އަކަށް ގޮސްފައިވަނީ ކޮވިޑް-19 އަށް ގިނަ ބަޔަކު ޕޮޒިޓިވްވުމާއި ގުޅިގެން 9 ޖުލައި ގައެވެ.

މި ވައިރަސްއެއްގެ ތިންވަނަ ވޭވް އަކަށް އެގައުމު ގޮސްދާނެ ކަމަށް ލަފާ ކުރެވޭ، މިވަގުތަކީ ލޮކްޑައުން އުވާލަން އެންމެ އެކަށީގެންވާ ވަގުތު ނޫން ކަމަށް އެ ގައުމުގެ ސަރުކާރުން ވަނީ ހާމަކޮށްފައެވެ.