ކޭސްތައް އިތުރުވެ ފްރާންސުގައި ދެވަނަ ވޭވެއްގެ އިންޒާރު އެގައިމުގެ ސައިންސްވެރިން ދީފިއެވެ.

ފްރާންސުގެ ސައިންޓިފިކް ކައުންސިލުން ބުނެފައިވަނީ ޖުލައި މަހުގެ ނިމުމަކާ ހަމައަށް އައިރު އެގައުމުގެ ހާލަތު ނާޒުކު ކަމަށާއި، ކޮންޓްރޯލް ނުކުރެވިއްޖެ ނަމަ ސްޕެއިންގައި ދިމާވިގޮތަށް އިތުރު ވޭވެއް އައިސްދާނެ ކަމަށެވެ. މިކަމާއި ގުޅިގެން ސައިންސްވެރިން ވަނީ އެގައުމުގެ ސަރުކާރުން އަންގާފައިވާ އެންގުންތަކަށް ފުރިހަމައަށް ބޯލެނބުމަށް އިލްތިމާސްކޮށްފައެވެ.

ސައިންސްވެރިން ބުނެފައިވަނީ ކޮވިޑް-19 ގެ ދެވަނަ ވޭވެއް އައުމުގެ ސިގްނަލްތަކެއް ފެންނަމުން އަންނައިރު އެކަން ކޮންޓްރޯލް ކުރެވެނީ ފަރުދުންނަށް ކަމަށެވެ. އަދި ދީފައިވަ އިރުޝާދުތަކަށް ބޯލެނބުމުގެ އިތުރުން އިހްތިމާއީ ގައިދުރުކަން ބެހެއްޓުމާއި މާސްކު އެޅުމާއި ސެނިޓައިޒާ ބޭނުންކުރުމަށް ވަނީ އެދިފައެވެ.

ބަލިމަޑުކަމުގެ ދެވަނަ ވޭވެއް އައުމުގެ އިޝާރާތާއެކު ސައިންވެރިންގެ އިރުޝާދަކީ ޕްރޮޓޮކޯލްތަކަށް ބޯލެބުމެވެ. އެގޮތުން އިޖްތިމާއީ ގައިދުރުކަން ބެހެއްޓުމާއި، އަލާމާތެއް ފެނިއްޖެ ނަމަ ވަގުތުން ޓެސްޓް ހެދުމާއި، ރިސްކް ގްރޫޕުގައި ހިމެނޭ ފަރާތްތައް އަމިއްލައަށް އައިސޮލޭޓްވުމާއި ނަރސިން ހޯމްތައް ރައްކާތެރި ކުރުމުގެ އިތުރުން ނާޒުކު އަބާދީތަކުން ސަމާލުވުމަށް ވަނީ އެދިފައެވެ.

މީގެ އިތުރުން ކޮންޓެކްޓް ޓްރޭސިންގެ މަސައްކަތާއި ސަރުކާރުން ކޮވިޑް ހުއްޓުވުމަށް ތައާރަފްކޮށްފައިވާ ޓްރޭސިންގ އެޕްގެ ބޭނުން ކުރުމުގެ މުހިންމުކަމުގެ މައްޗަށް ސައިންސްވެރިން ވަނީ ވާހަކަ ދައްކާފައެވެ. މި އެޕްގެ ބޭނުންކުރަނީ މަދު ބައެއް ކަމަށް ވެސް ސައިންސްވެރިން ވަނީ ފާހަގަކޮށްފައެވެ. އަދި މިއީ ކޮވިޑް ފެތުރުން ހުއްޓުވުމަށްޓަކައި އެޅޭނެ މުހިންމު އެއް ފިޔަވަޅުތަކަށް ސައިންސްވެރިން ވަނީ ފާހަގަކޮށްފައެވެ.

ހޯމަ ދުވަހު ފްރާންސްގެ ހެލްތް މިނިސްޓްރީގެ ޑާޓާތައް ދައްކާގޮތުން ފާއިތުވި 6 ދުވަހު، ދުވާލެއްގެ މައްޗަށް ހާހަކަށްވުރެ ގިނަ މީހުން އަންނަނީ ޕޮޒިޓިވްވަމުންނެވެ. އަދި މިއީ ވައިރަސް އެންމެ ހަލުވިކަމާއެކު އެގައުމުގެ ފެތުރެމުން އައިއިރު އެޕްރީލް މަހުގެ ތެރޭގައި ފެންނަމުން ދިޔަ މިންވަރާ އެއްވަރެއްގެ އަދަދުތަކެކެވެ. މީގެ އިތުރުން އައިސީޔޫގައި ފަރުވާ ދެމުން އަންނަ ފަރާތްތަކުގެ އަދަދު ވެސް އަންނަނީ އިތުރުވަމުންނެވެ.

މުޅި ދުނިޔޭގެ ނިސްބަތަށް ބަލާ އިރު، ފްރާންސް އޮތީ ލިސްޓުގެ 20 ވަނައިގައެވެ. އެގައުމުގައި މިހާތަނަށް 191،000ށް ވުރެ ގިނަ މީހުން ކޮވިޑް-19ށް ޕޮޒިޓިވްވެފައިވާ އިރު، 30 ހާހަށްވުރެ ގިނަ މީހުން ވަނީ މަރުވެފައެވެ. މިހާތަނަށް އެގައުމުގައި ބަލިން ރަނގަޅުވެފައިވަނީ 81،500 މީހުންނެވެ.