އަންނަ މުޙައްރަމު މަސް ނިމުމުގެ ކުރިން މުދަލު ޒަކާތް ބެހުމަށް މަސައްކަތް ކުރަމުންދާކަމަށް އިސްލާމިކް މިނިސްޓަރ ޑރ. އަހުމަދު ޒާހިރު ވިދާޅުވެއްޖެއެވެ.
ބުރާސްފަތި ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން މިނިސްޓަރ ވަނީ ފަޤީރުންގެ ދަފްތަރު މުރާޖައާ ކުރުމާގުޅޭ އެންމެ ފަހުގެ މައުލޫމާތު ހިއްސާކުރައްވާފައެވެ. އެގޮތުން މިނިސްޓަރ ވިދާޅުވީ، ފަޤީރުންގެ ދަފްތަރާ ގުޅޭ މައްސަލަތަކެއް ފިތުރު ޒަކާތް ބެހި އިރުގައިވެސް ދިމާވި ކަމަށެވެ. އަދި މިވަގުތުގެ ޙާލަތަށް ބަލައި މިނިސްޓްރީންވެސް ލިސްޓް އައު ކުރުމަށް ބޭނުންވެ، އެ މަސައްކަތް ފަށާފައިވާ ކަމަށް މިނިސްޓަރ ވިދާޅުވިއެވެ.
މިނިސްޓްރީން ވަނީ މިހާރު އެކުލަވާލައިފައިވާ ދަފްތަރުގައި ރަޖިސްޓްރީވުމަށް ފޯމު ހުށަހެޅުމުގެ ފުރުސަތު ޖުލައި މަހުގެ 6 ވަނަ ދުވަހުން ފެށިގެން ޖުލައި މަހުގެ 23 ވަނަ ދުވަހަށް ހުޅުވާލާފައެވެ. އެހެންނަމަވެސް ލޮކްޑައުންގެ ޙާލަތާއި ގުޅިގެން ބައެއް ދަތިތަކެއް ހުރިނަމަވެސް، ޢީދު ބަންދު ނިމި ހަފްތާއެއްގެ ތެރޭގައި އަތޮޅުތެރޭގެ ފޯމުތައް ލިބޭނެ ކަމަށް ބެލެވޭ ކަމަށާއި، އެއާއެކު ދަފްތަރު މުރާޖައާކޮށް އަޕްޑޭޓް ކުރައްވާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، އެ މަސައްކަތްތައް ކުރުމަށްފަހު، އަންނަ މުޙައްރަމު މަހުގެ (މީލާދީން 18 ސެޕްޓެމްބަރު) ނިޔަލަށް މުދަލު ޒަކާތް އެއްކޮށް ބަހާ ނިންމާލުމުގެ މަސައްކަތް މިނިސްޓްރީން ކުރަމުންދާ ކަމަށެވެ.
މިމަހުގެ 6ން ފެށިގެން އަޅުގަނޑުމެން ހުޅުވާލިން ލިސްޓަށް އިތުރުވާން ބޭނުންވާ ފަރާތްތަކަށް އެ ފުރުސަތު އަޅުގަނޑުމެން ހުޅުވާލިން، އެގޮތަށް މަސައްކަތް ކުރަމުންގޮސް އެންމެ ފަހު ދުވަހާއި ހިސާބަށް އައިއިރު އަޅުގަނޑުމެން ފޯމު ބަލައިގަންނަން ތިބި ކުދިންތެރެއިން ކޮންމެސް އެއް ކުއްޖަކު ޕޮޒިޓިވްވެގެން އަޅުގަނޑުމެންނަށް އެ މަސައްކަތް ކޮންމެސް ވަރަކަށް މަޑުޖެހިފައި މިއޮތީ، އަޅުގަނޑުމެން މި މަސައްކަތް ކުރަނީ އިރާދުކުރެއްވިއްޔާ ލިސްޓް އަޕްޑޭޓް ކޮށްފައި މުޙައްރަމު މަސް ފެށެންވާއިރަށް ނޫނީ މުޙައްރަމު މަހުގެ ނިޔަލަށް މުދަލު ޒަކާތް ބެހޭތޯއިސްލާމިކް މިނިސްޓަރ ޑރ. އަހުމަދު ޒާހިރު
ކަނޑައެޅިފައިވާ އުސޫލުތަކާ ހިލާފަށް އަވަސް އަރުވާލައިގެން، ހަމަހަމަކަން ގެއްލޭގޮތަށް ފަގީރުންގެ ލިސްޓަށް ބަދަލު ގެނައުމަކީ އިންސާފުވެރި ގޮތެއް ނޫން ކަމަށް އިސްލާމިކް މިނިސްޓްރީން މީގެ ކުރިންވެސް ވަނީ ބުނެފައެވެ.
