ރާއްޖެއިން އިތުރު 61 މީހުން ކޮވިޑް-19 އަށް ޕޮޒިޓިވްވެއްޖެއެވެ.

ބުދަ ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ބުނީ، ރާއްޖެއިން އިތުރު 61 މީހަކު ކޮވިޑް-19 އަށް ޕޮޒިޓިވްވެފައިވާ ކަަމަށާއި، އޭގެ ތެރޭގައި 44 ދިވެހިންވެސް ހިމެނޭ ކަމަށެވެ.

އޭގެ އިތުރުން، ބަންގްލަދޭޝްއަށް ނިސްބަތްވާ 15 މީހަކާއި، އިންޑިއާއަށް ނިސްބަތްވާ 2 މީހަކު ހިމެނޭ ކަމަށްވެސް އެޗްޕީއޭއިން މައުލޫމާތުދެއެވެ. އެއާއެކު ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު ވަނީ 3567ށް އަރާފައެވެ.

ބުދަ ދުވަހު އިތުރު 7 މީހަކު ބަލިން ރަނގަޅުވެފައިވާއިރު، ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ ޖުމުލަ އަދަދު ވަނީ 2554ށް އަރާފައެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 983 އެވެ.

އެޗްޕީއޭއިން ވަނީ މިވަގުތު މާލޭ ސަރަޙައްދުގެ އިތުރުން އަތޮޅު ތެރެއިން އެކްޓިވް ކޭސްތައް ފެނިފައިވާ ރަށްތަކުގެ ލިސްޓުވެސް އާންމުކޮށްފައެވެ. އޭގެ ތެރޭގައި ރާއްޖޭގެ ބައެއް ރިސޯޓުތައްވެސް ހިމެނެއެވެ.