ކޮވިޑް-19 އިން ރައްކާތެރިވުމުގެ ގޮތުން މާސްކް އެޅުން މަޖުބޫރުކުރަން ޖެހިދާނެ ކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެއެވެ.
ބުދަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ، މާސްކް އެޅުން މަޖުބޫރު ނުކުރެވޭނެ ސަބަބެއް މިވަގުތު ނެތް ކަމަށާއި، މާސްކް އެޅުން މަޖުބޫރު ކުރަން މިހާރުވެސް ވިސްނަވަމުން ގެންދަވާ ކަމަށެވެ. އަދި މާސްކް އެޅުމަށް މިހާރުވެސް ގައިޑްލައިންތަކެއް އެކަށަ އެޅިފައިވާކަމަށް މިނިސްޓަރ ވިދާޅުވިއެވެ.
މާސްކް އެޅުން މަޖުބޫރު ނުކުރަންވީ ސަބަބެއް މިވަގުތަށް އޮތް ކަމަކަށް ނުދެކެން އަޅުގަނޑު، އެހެންވީމާ އަޅުގަނޑުމެން މާސްކް އެޅުން މަޖުބޫރު ކުރަން އެބަ ވިސްނަން މިހާރުވެސް، މާސްކް އެޅުން މަޖުބޫރުވެސް ކުރެވިދާނެ އަޅުގަނޑުމެންނަށް، މާސްކް އެޅުން މަޖުބޫރު ކުރުމާއި، މާސްކް އަޅަން މިހާރު އެންގިފައި ހުރި އެންގުންތަކާއި ގައިޑްލައިންތަކާ އުސޫލެއްގެ ގޮތުން ތަފާތެއް ނެތް،ހެލްތް މިނިސްޓަރ އަބްދުﷲ އަމީން
މިނިސްޓަރ އިތުރަށް ވިދާޅުވީ، މާސްކް އެޅުން މަޖުބޫރު ކުރަން ނުޖެހޭ ޙާލަތެއް މިވަގުތު އޮތް ކަމަށް އަމިއްލަފުޅަށްވެސް ޤަބޫލު ނުކުރެއްވޭ ކަމަށެވެ. އަދި އެކަމުގެ މަޝްވަރާތައްވެސް ކުރައްވާނެ ކަމަށް މިނިސްޓަރ ވިދާޅުވިއެވެ.
ޕްރޮގްރާމްގައި އިތުރަށް ވާހަކަ ދައްކަވަމުން މިނިސްޓަރ ވަނީ ދެވަނަ ވޭވްއަކަށް ތައްޔާރުވުމާ ގުޅޭގޮތުންވެސް ވާހަކަ ދައްކަވާފައެވެ. އެގޮތުން ދެވަނަ ވޭވްއަކަށް ތައްޔާރުވާއިރުވެސް ބަލަނީ ވަކި "އިންޑިކޭޓަރސް" ތަކަކަށް ކަން ފާހަގަ ކުރައްވައި މިނިސްޓަރ ވިދާޅުވީ، ހޮސްޕިޓަލުގައި އެޑްމިޓް ކުރެވޭ މިންވަރާއި، ފަރުވާދޭ މިންވަރަށް ބަލައިގެން އެކަން ދުރާލާ ދެނެގަނެވިދާނެ ކަމަށެވެ. އަދި ދެވަނަ ވޭވްއަކަށް ތައްޔާރުވުމަށް އަޅަންޖެހޭ ފިޔަވަޅުތައް އެ އިންޑިކޭޓަރސްތަކަށް ބެލުމަށްފަހު އަޅުއްވަމުން ގެންދަވާނެ ކަމަށް ވިދާޅުވިއެވެ.
