ރާއްޖޭގައި މިފަހުން ހިންގާފައިވާ އެންމެ ބޮޑު ޙިޔާނާތް ކަމަށްވާ އެމްއެމްޕީއާރްސީގެ ޙިޔާނާތުގެ މައްސަލަ ތަހުޤީޤު ކުރުމުގައި އެމްއެމްޕީއާރްސީ ފައިސާ ލިބިފައިވާ އެއްވެސް ފުލުހަކު ބައިވެރިނުވާނެ ކަމަށް ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވެއްޖެއެވެ.
ބުރާސްފަތި ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ސީޕީ ހަމީދު ވިދާޅުވީ، އެމްއެމްޕީއާރްސީގެ ޙިޔާނާތުގެ ފައިސާ އެކި ސިފަ ސިފައިގައި ލިބިފައިވާ ކަމުގެ ހެއްކާއި ޤަރީނާ ލިބިފައިވާ 5 ފުލުހަކު ހިމެނޭއިރު، އެ ހުރިހާ ފުލުހުންވެސް މަސައްކަތުން އެކަހެރި ކުރެވިފައިވާ ކަމަށެވެ. އަދި އެމްއެމްޕީއާރްސީ ޙިޔާނާތުގައި މަސްލަހަތު ހިމެނޭ އެއްވެސް ފުލުހަކު މި މައްސަލަ ތަހުޤީޤު ކުރުމުގައި ބައިވެރި ނުވާނެ ކަމަށް ސީޕީ ވިދާޅުވިއެވެ.
ޖިނާއީ އިޖުރާއަތުގެ ޤާނޫނުގެ ދަށުން ބާރު ލިބިގެން އެންޓި ކޮރަޕްޝަން ކޮމިޝަން (އޭސީސީ)އާއި، ރިޔާސީ ކޮމިޝަނާއި ފުލުހުން ގުޅިގެން މި މައްސަލައިގެ ޖޮއިންޓް އިންވެސްޓިގޭޝަން ކުރިއަށް ގެންދާކަން ފާހަގަ ކުރައްވައި ސީޕީ ވިދާޅުވީ، އެމްއެމްޕީއާރްސީ ޙިޔާނާތުގައި ފުލުހުންގެ މައްޗަށް ތުހުމަތު ކުރެވޭ މައްސަލަތަކުގެ ތަހުޤީޤުގައި ފުލުހުން ބައިވެރިނުވާނެ ކަމަށެވެ. އަދި އެ ތަހުޤީޤުތައް ހިންގާނީ އޭސީސީއާއި އެސެޓް ރިކަވަރީ ކޮމިޝަނުން ކަމަށް ސީޕީ ވިދާޅުވިއެވެ.
އެމްއެމްޕީއާރްސީ މައްސަލައިގެ ތަހުޤީޤުގައި އެއްވެސް ދައުރެއް އަދާކުރާ ފުލުހެއް ނުހިމެނޭނެ އެ މައްސަލައިގައި އިންޓްރެސްޓެއް އޮތް، ނުވަތަ އެ ފައިސާގައި އެއްވެސް ވަރަކަށް ޖެހިފައި ހުރިކަމަށް އަޅުގަނޑުމެން ތުހުމަތުކުރާ ފުލުހަކު، އެއީ އެއް ކަންތައް، ދެވަނަ ކަމަކީ ފުލުހުންގެ ތެރޭގައިވެސް އެބަ ހިމެނޭ އެކި ރޭންކްތަކަށް ނިސްބަތްވާ ފުލުހުން، އަޅުގަނޑުމެންނަށް މިހާތަނަށް ފެނިފައިވާ ހެކި ޤަރީނާ އަދި ލިބިފައިވާ މައުލޫމާތުތަކުގެ މައްޗަށް ބަލާއިރު، އެ ފައިސާ ކޮންމެސް އެއް ސިފައެއްގައި ލިބިފައިވާ ފުލުހުން، އެހެންވީމާ އެކަންކަމުގެ ތަހުޤީޤު، އެމްއެމްޕީއާރްސީގެ ތަހުޤީޤު މި ފާއިތުވި ގާތްގަނޑަކަށް ދޮޅު އަހަރެއްހާ ދުވަހުން ފެށިގެން އަލުން ކުރަން ފަށާފައި މިވަނީ ޖޮއިންޓް އިންވެސްޓިގޭޝަން އެރޭންޖްމަންޓެއްގެ ތެރެއިން، އެއީ އެންޓި ކޮރަޕްޝަން ކޮމިޝަނާއި، ޕޮލިސް ސަރިވިސް އަދި ރިޔާސީ ކޮމިޝަން ގުޅިގެން، ޖިނާއީ އިޖުރާއަތުގެ ޤާނޫނުން ބާރު ލިބިގެން، އެހެންވީމާ ފުލުހުން ހިމެނޭ މައްސަލަތަކުގައި އަޅުގަނޑުމެން ނިންމާފައިވާނީ ފުލުހުންގެ މުއައްސަސާ އެ ތަހުޤީޤުގައި ނުހިމެނި ދެން މަސައްކަތް ކުރަމުން އަންނަ ދެ މުއައްސަސާގެ ޓީމުތަކުން އެކަންކަން ބަލަން،ސީޕީ މުޙައްމަދު ހަމީދު
އެމްއެމްޕީއާރުސީގެ މައްސަލައާއި ގުޅޭގޮތުން ހިނގަމުންދާ ތަހުޤީގުގައި، އެމްއެމްޕީއާރުސީގެ ފައިސާ ލިބިފައިވާ ފުލުހުންގެ ވަޒީފާގައި މި ވަގުތު ތިބި ފަސް މުވައްޒަފެއްގެ ޖިނާއީ އަދި އިދާރީ ތަހުގީގު ހިނގަމުންދާތީ ވަޒީފާގެ މައްސޫލިއްޔަތުން ދުުރުކުރެވިފައިވާކަން ފުލުުހުން މީގެ ކުރިން ހާމަކޮށްފައިވެއެވެ.
އެމްއެމްޕީއާރުސީ ހިޔާނާތުގެ މައްސަލައާ ގުޅޭ ފަސް ފުލުހަކު ވަޒީފާގެ މައްސޫލިއްޔަތުން އެކަހެރިކޮށްފައިވާ އިރު, އެމްއެމްޕީއާރުސީގެ ޚިޔާނާތުގެ ލިސްޓުގައި ސިޔާސީ ބެފުޅުންނާއި ހުރިހާ ޕާޓީތަކަށް ނިސްބަތްވާ މެންބަރުންވެސް ހިމެނޭކަމަށް ދާދިފަހުން ޕްރޮސެކިއުޓަރ ޖެނެރަލް ހުސައިން ޝަމީމް ވަނީ ވިދާޅުވެފައެވެ.
