ކުރީގެ ޓޫރިޒަމް މިނިސްޓަރު އަލީ ވަހީދު ފުލުހަށް ހާޒިރުވުމަށް އަންގައިފިއެވެ.
"ރާއްޖެއެމްވީ"އަށް އެނގިފައިވާ ގޮތުގައި އަލީ ވަހީދު ފުލުހަށް ހާޒިރުވާން އަންގާފައިވަނީ އާދީއްތަ ދުވަހުގެރޭ 20:30 ށެވެ.
އަލީ ވަހީދު އާދީއްތަ ދުވަހުގެރޭ ފުލުހަށް ހާޒިރުކުރާއިރު، އޭނާ ދިރިއުޅުއްވާ ގެއަށް އާދިއްތަ ދުވަހު ފުލުހުން ވަނީ ވަދެފައެވެ. އަދި އޭރު ފުލުހުން އެ ގެއަށް ވަދެފައިވަނީ އަލީ ވަހީދުގެ ޕާސްޕޯޓް ހިފަހައްޓާ، ކޯޓު އަމުރު ހަވާލު ކުރުމަށް ކަމަށް އެނގިފައިވެއެވެ.
މިދިޔަ އާދިއްތަ ދުވަހު ފުލުހުންގެ މީޑިއާއިން ބުނީ، އަލީ ވަހީދުގެ މައްޗަށް ކުރެވޭ ތުހުމަތުތަކާއި ގުޅިގެން ތަހުގީގަށް، އަލީ ވަހީދު ގެންގުޅުވި އިލެކްޓްރޯނިކް ބައެއް ތަކެތި ފުލުހުންގެ ބެލުމުގެ ދަށަށް ގެންގޮސް، ހެކި ހޯދުމުގެ ކަންކަން ކުރިއަށް ގެންދާ ކަމަށެވެ. ފުލުހުން ގެންދިޔައީ ސީދާ ކޮން ތަކެެއްޗެއް ކަމެއް ވިދާޅެއް ނުވެއެވެ.
އެކަމަކު "ރާއްޖެއެމްވީ" އަށް އެނގިފައިވާ ގޮތުގައި، ކޯޓު އަމުރެއްގެ ދަށުން ގެންގޮސްފައިވަނީ، އަލީ ވަހީދުގެ ފޯނާއި ލެޕްޓޮޕެވެ.
އަލީ ވަހީދު ޓޫރިޒަމް މިނިސްޓްރަަކަމުން ވަކިކޮށްފައި ވަނީ އެ މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި ކަމުގެ ތުހުމަތުތަކާއި ގުޅިގެންނެވެ. އަލީ ވަހީދަށް ތުހުމަތުތައް ކުރި މުވައްޒަފުން ބުނާ ގޮތުން، އެ މުވައްޒަފުންނަށް ޖިންސީ ގޯނާކުރާތާ ގިނަ ދުވަސްތަކެއް ވަނީ ވެފައެވެ.
ޖިންސީ ގޯނާ ކޮށްފައިވަނީ މިނިސްޓްރީގެ ދަތުރުތަކުގައި ރިސޯޓުތަކަށް ގެންގޮސްގެން ކަމަށްވެސް މިނިސްޓްރީގެ މުވައްޒަފުން ބުނެއެވެ. އެކަންތައްތައް ތަހައްމަލު ނުކުރެެވިގެން އެވާހަކަ ރައީސް ޞާލިޙާ ހިއްސާ ކުރެއްވުމުން އެމަނިކުފާނު ކީރިތި ކުރެއްވި ކަމަށް ޓޫރިޒަމް މިނިސްޓްރީގެ އޮފިޝަލަކު ވަނީ ވިދާޅުވެފައެވެ.
އެކަމާއި ގުޅިގެން އަލީ ވަހީދު ވިދާޅުވެފައިވަނީ ހަގީގަތް ފަހުން ހާމަވާނެ ކަމަށެވެ.
