ގިނަ ޤައުމުތަކުން ފަތުރުވެރިން ރާއްޖެ އަންނަ ބޭނުންވާކަން ކަށަވަރުވާ ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެއެވެ.

ޓުރިއަރިޒަމް މިނިސްޓްރީ ވަގުތީ ގޮތުން ހިންގެވުން މިނިސްޓަރު ފައްޔާޒްއާ ހަވާލު ކުރެވިފައިވާއިރު ރާއްޖޭގެ ބޯޑަރުތައް އަލުން ހުޅުވުމާއި ގުޅިގެން އެކަމާއި ގުޅޭ މައުލޫމާތު ނޫސްވެރިންނަށް ހިއްސާ ކުރައްވަމުން މިނިސްޓަރު ފައްޔާޒް ވިދާޅުވީ ގިނަ ޤައުމުތަކުން ރާއްޖެ އަންނަ ފަތުރުވެރިން ބޭނުންވާކަން ކަށަވަރު ވެލައްވާ ކަމަށެވެ. އެގޮތުން ދާދި ފަހުން އިނގިރޭސިވިލާތުގައި ކުރި ސަރވޭއަކުން ވެސް 50 އިންސައްތަ މީހުން ދާން ބޭނުންވާ މަންޒިލެއްގެ ގޮތުގައި ގޮތުގައި ރާއްޖެ ހިމެނިގެން ދިޔަ ކަމަށް މިނިސްޓަރު ވިދާޅުވިއެވެ.

ރާއްޖެއަށް އިތުރު ފަތުރުވެރިން ގެނައުމަށްޓަކައި މިހާރު ވެސް ގިނަ މަސައްކަތްތަކެއް ކުރެވެމުންދާކަން ފާހަގަކުރައްވާ މިނިސްޓަރު ފައްޔާޒް ވިދާޅުވީ ރާއްޖެއަށް ޝެޑިއުލް ފްލައިޓްތައް ބޭއްވުމަށް މައިގަނޑު ގޮތެއްގައި އޮޕަރޭޓް ކުރަމުންދާ އެއަރލައިންތަކާއި ވާހަކަ ދެކެވެމުންދާ ކަމަށެވެ.

އެކި ޤައުމުތަކާއި ވާހަކަ ދައްކާއިރު ފަތުރުވެރިން ހޯދާ މައުލޫމާތަކީ ރާއްޖޭގައި ކޮވިޑް-19 ފެތުރިފައިވާ މިންވަރު ކަމަށާއި ރާއްޖެއިން އަޅާފައިވާ ރައްކާތެރިކަމުގެ ފިޔަވަޅުތަކުގެ މައުލޫމާތު ކަމަށް މިނިސްޓަރު ފައްޔާޒު ވިދާޅުވިއެވެ. އެގޮތުން ރިސޯޓުތަކުންނާއި އަދި އެހެނިހެން ތަންތަނުން ފަތުރުވެރިންނަށް ހިދުމަތް ފޯރުކޮށްދޭއިރު ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެކުލަވާލާފައިވާ ގައިޑްލައިނާ އެއްގޮތަށް އަމަލު ކުރެއްވުމަށް ފައްޔާޒު އެދިވަޑައިގެންނެވިއެވެ.

މި ހާލަތަކީ ވަރަށް ނާޒުކު ހާލަތެއް ކަމަށާއި ރާއްޖެއަށް ފަތުރުވެރިން ގެނައުމަށް މަސައްކަތް ކުރާއިރު މިކަން ބިިނާވެގެން ދަނީ ހަަމައެކަނި ރާއްޖޭގެ ކަންތައްތަކަށް ނޫން ކަމަށް ވެސް މިނިސްޓަރު ފާހަގަކުރެއްވިއެވެ.

މާރޗް މަހުގެ 27 ވަނަ ދުވަހު ރާއްޖޭގެ ބޯޑަރުތައް ވަނީ ބަންދުކޮށްފައެވެ. އަދި ތިން މަސް ފަހުން ބޯޑަރުތައް ބުދަ ދުވަހު ހުޅުވާފައިވާއިރު އެންމެ އެއަރޕޯޓަށް އެންމެ ފުރަތަމަ ޖައްސާފައިވަނީ ދޯހާގެ ފްލައިޓެކެެވެ. މި ފްލައިޓަށް "ވޯޓަރ ސެލިއުޓް" ދީފައިވާއިރު މި ފްލައިޓުން އައި ފަތުރުވެރިންނަށް މަރުހަބާ ކިޔުމަށް ޓްރާންސްޕޯޓް އައިޝަތު ނަހުލާއާއި އެމްއެމްޕީއާރްސީގެ މެނޭޖިން ޑިރެކްޓަރު ތޮއްޔިބު މުހައްމަދު ވަނީ އެއަރޕޯޓަށް ވަޑައިގަންނަވާފައެވެ. މިނިސްޓަރުން މި ފަތުރުވެރިންނަށް މަރުހަބާ ކިޔާފައިވަނީ ދުތުރުގައި ތިއްބަވައިގެން އަތުގެ އިޝާރާތުންނެވެ.

މިއަހަރު ނިންމެންވާއިރަށް 8 ލައްކަ ފަތުރުވެރިން ރާއްޖެ ގެނައުމަކީ ސަރުކާރުގެ އަމާޒެކެވެ.