ނިއުމަތްތައް ބީވެގެންދަނީ ނިއުމަތް ދެއްވި ފަރާތް އޮޅި، އެ ފަރާތަށް ޝުކުރުވެރި ނުވުމުން ކަމަށް ހުކުރު ޚުތުބާގައި ބުނެފިއެވެ.
"ނިއުމަތަށް ޝުކުރު ކުރުން" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ މާތްﷲ އަށް ތަޤްވާވެރިވުމުގައި އެކަލާނގެ ނިއުމަތްތަކަށް ސިއްރާއި ފާޅުގައި ޝުކުރުވެރިވާން ޖެހޭ ކަމަށެވެ. ޝުކުރުވެރިވުމަކީ އަމަންއަމާންކަމާއި ހަމަޖެހުމުގެ އަސާސް ކަމަށާއި އެއީ މާތްﷲ ގެ ރުހިވޮޑިގަތުމާއި ރިޒްގް ތަނަވަސްވުމުގެ ސަބަބެއް ކަމަށް ވެސް ޚުތުބާގައިވެއެވެ.
މާތްﷲ ދެއްވާ ނިއުމަތްތަކަށް ޝުކުރުވެރިވުމަކީ އެ ނިއުމަތްތައް ދެމިއޮންނާނެ ޖާމިނުވުމެއްކަން ފާހަގަކޮށް ޚުތުބާގައި ބުނީ އެކަލާނގެ ކޯފާއިން ސަލާމަތްކޮށްދެއްވާނެ ކަމުގައެވެ. އަދި ޝުކުރު ކުރާ މީހުންނަށް މާތްﷲ ނިއުމަތްތައް އިތުރުކުރައްވާނެ ކަމަށް ވެސް ޚުތުބާގައި ފާހަގަކޮށްފައިވެއެވެ.
"އަދި ތިޔަބައިމީހުންގެ ވެރިރަސްކަލާނގެ އެންގެވި ހިނދު ހަނދުމަ ކުރާށެވެ! ތިޔަބައިމީހުން ޝުކުރުކޮށްފިނަމަ ހަމަކަށަވަރުން ތިމަން ރަސްކަލާނގެ ތިޔަބައިމީހުންނަށް އިތުރުކޮށްދެއްވާ ހުށީމެވެ. އަދި ތިޔަބައިމީހުން (ޝުކުރުނުކޮށް) ކާފިރުވެއްޖެނަމަ (ދަންނާށެވެ!) ހަމަކަށަވަރުން ތިމަންރަސްކަލާނގެ އަޒާބު ގަދަފަދަވެގެންވާކަން ކަށަވަރެވެ."މާތްﷲ ވަހީކުރައްވާފައިވާ ބަސްފުޅެއްގައި މާނަ
ނިއުމަތްތަކަށް ޝުކުރުވެރިނުވުމަކީ ނިއުމަތް ނެތި ހިނގައިދާނެ ކަމެއް ކަމަށާއި ތަނަވަސްކަން ދަތިކަމަށް ބަދަލުކުރައްވާ، ފާގަތިކަން ތަދުމަޑުކަމަށް ބަދަލު ކުރައްވާނެ ކަމެއް ކަމަށް ވެސް ޚުތުބާގައިވެއެވެ.
މާތްﷲ ގެ ނިއުމަތްތަކަކީ ގުނައި އަދަދު ކުރެވޭނެ އެއްޗެއް ނޫންކަން ފާހަގަކޮށް ޚުތުބާގައި ބުނީ މާތްﷲގެ ނިއުމަތތައް ގުނާނަމަ އެ ނިއުމަތްތައް އަދަދު ނުކުރެވޭނެ ކަަމަށާއި އިންސާނުންނަކީ އަނިޔާވެރިވުން ބޮޑު ޝުކުރުކުރުން ނެތް މީހެއް ކަމުގައި އެކަލާނގެ ވަހީކުރައްވާފައިވާ ކަމަށެވެ.
މީސްތަކުން ފަރުވާ ކުޑަކުރާ ދެ ނިއުމަތެއްވެއެވެ. އެއީ ސިއްހަތާއި ހުސް ވަގުތު ކަމަށް ވެސް ޚުތުބާގައި ބުންޏެވެ.
މި ހާލަތުގެ މައްޗަށް އަލިއަޅުވާލާ ޚުތުބާ ބުނީ ކޮވިޑް-19 ގެ ސަބަބުން އެނގިގެން ދިޔައީ އިންސާނާގެ އާރެއް ބާރެއް ނެތް ކަމެވެ. މާތްﷲ އަށް ބިރުވެތިވެ ދީނުގައި ހިފެހެއްޓުން މުހިންމު ކަމަށާއި މާތްﷲ އަށް ޝުކުރު ކުރުމަކީ އިސްލާމްދީނުގެ ޝިއާރެކެވެ.
މާތްﷲ ދެއްވި ގިނަގުނަ ނިއުމަތްތަކުގެ ތެރެއިން އެންމެ ބޮޑު ނިއުމަތަކީ އިސްލާމްކަމުގެ ނިއުމަތްކަމަށް ޚުތުބާގައި ވަނީ ބުނެފައެވެ.
ރާއްޖެ ހިމެނޭ ސަރަހައްދުތަކުގައި މިއަދު ހުކުރު ނަމާދުކޮށްފައިވާއިރު މިއީ މާލެ ލޮކްޑައުން ކުރިފަހުން ޖަމާއަތުގައި ކުރެވުނު ފުރަތަމަ ހުކުރު ނަމާދެވެ.
