ކޮވިޑް-19 އާއި ގުޅިގެން މާލެ ސަރަހައްދުގައި އިއުލާންކޮށްފައިވާ ލޮކްޑައުންއަށް ލުއިތަކެއް ދީ ބުދަ ދުވަސް (މިއަދު) އިން ފެށިގެން ވިޔަފާރި ކުރުމަށް ފިހާރަތައް ހެނދުނު 9:00ން ރޭގަނޑު 10:00ށް އަދި ސައިހޮޓާ، ކެންޓީން، ކެފޭ، ރެސްޓޯރަންޓް، ކެފެޓީރިއާ ފަދަ ތަންތަން ފަތިހު 5:00ން ރޭގަނޑު 10:00ށް ހުޅުވާފައި ބެހެއްޓޭނެ ކަމަށް އިކޮނަމިކް މިނިސްޓްރީން އަންގައިފިއެވެ.

ލޮކްޑައުންއަށް ލުއި ދިނުމުގެ 3 ވަނަ މަރުހަލާގައި އަމަލުކުރާނެ ގޮތްތައް އާންމު ކޮށްފައިވާއިރު އިކޮނޮމިކް މިނިސްޓްރީން ބުނީ ޢާންމު ޞިއްހަތު ރައްކާތެރި ކުރުމުގެ ޤާނޫނުގެ ދަށުން ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުލާނު ކޮށްފައިވާ މުއްދަތުގައި، މިހާތަނަށް ޢަމަލު ކުރަމުން އައި އުސޫލަށް، ހެލްތް ޕްރޮޓެކްޝަން އެޖެންސީން ލުއި ދިނުމަށް ނިންމުމާއި ގުޅިގެން، 01 ޖުލައި 2020ން ފެށިގެން، މާލެ، ހުޅުމާލެ އަދި ވިލިމާލޭގައި ހިންގާ، ސައިހޮޓާ، ކެންޓީން، ކެފޭ، ރެސްޓޯރަންޓް، ކެފެޓީރިއާ ފަދަ ތަންތަން ކަސްޓަމަރުންނަށް ހުޅުވާލައިގެން ޚިދުމަތް ދެވޭނެ ގަޑި އަކީ، ފަތިހު 5:00ން ރޭގަނޑު 10:00ށް ކަމަށެވެ. އަދި ފިހާރަތައް ހުޅުވާފައި ބެހެއްޓޭނެ ގަޑި އަކީ ހެނދުނު 9:00ން ރޭގަނޑު 10:00ށް ކަމަށެވެ.

މީގެ އިތުރުން ކަސްޓަމަރުންނަށް ހުޅުވާލައިގެން، ވިޔަފާރި ކުރާ ފަރާތްތަކާއި، ޑެލިވަރީ ޚިދުމަތް ފޯރުކޮށްދޭ ހުރިހާ ފަރާތްތަކުންވެސް، ހެލްތް ޕްރޮޓެކްޝަން އެޖެންސީން ކަނޑައަޅާ އުޞޫލުތަކާއި އެއްގޮތަށް ޢަމަލުކުރުމަށް ވަނީ އެދިފައެވެ. އަދި ކަނޑައަޅާފައިވާ ގަޑިތަކުގައި، އިތުރު ހުއްދައެއް ނުނަގައި ވިޔަފާރިކުރެވޭނެ ކަމަށް ވެސް އިކޮނަމިކް މިނިސްޓްރީން ބުނެއެވެ.

އެޗްޕީއޭ އިން ބުނީ ސައިހޮޓާ، ކެފޭ، ރެސްޓޯރަންޓް ފަދަ ތަންތަނުން ޑެލިވަރީ، ހެނދުނު 9:00ން ރޭގަނޑު 11:00ށް އަދި ޓޭކްއަވޭ ޚިދުމަތް ދިނުން ކުރިއެކޭ ވެސް އެއްފަދައިން ކުރިޔަށް ގެންދެވޭނެ ކަމަށެވެ. އަދި ބުދަ ދުވަހުން ފެށިގެން ސައިހޮޓާ، ކެފޭ، ރެސްޓޯރަންޓް ފަދަ ތަންތަނުގެ އެތެރޭގައި ތިބެގެން ކެއިން ބުއިމުގެ ޚިދުމަތް ހެނދުނު 9:00ން ރޭގަނޑު 10:00ށް ދިނުމަށް ހުޅުވާލުމާއި، ސައިހޮޓާ، ކެފޭ، ރެސްޓޯރަންޓް ފަދަ ތަންތަން ހިންގުމުގައި ޢަމަލުކުރަން ޖެހޭނީ އެޗްޕީއޭ އިން ކަނޑައަޅާފައިވާ އުޞޫލާ އެއްގޮތަށް ކަމަށެވެ.

ސައިހޮޓާ، ކެފޭ، ރެސްޓޯރަންޓްތަކުގެ ޚިދުމަތް ދިނުމުގައި އެއްފަހާރާ އެތަނަކަށް ވަދެވޭނެ މީހުންގެ ޢަދަދު ފެންނަ ގޮތަށް ދޮރުމަތީގައި ބެހެއްޓުމުގެ އިތުރުން 3 ފޫޓުގެ ގައިދުރުކަން ހިފެހެއްޓޭ މިންވަރަށް މީހުންނަށް ތިބެވޭ ގޮތަށް އެތަންތަނުގެ އެތެރޭގެ އިންތިޒާމް ހަމަޖެއްސުމަށް ވަނީ އަންގާފައެވެ. އަދި އެތެރޭގައި ޚިދުމަތް ހޯދާއިރު މާސްކް އެޅުން ވަނީ މަޖުބޫރު ކޮށްފައެވެ.