މިދިޔަ އަހަރުގެ އޮގަސްޓް މަހުގެ ތެރޭގައި އޮޅުވާލައިގެން ރާއްޖެއަށް ވަގަށް އެތެރެކުރި ވެހިކަލްތަކުގެ މައްސަލައިގައި ޓްރާންސްޕޯޓު މިނިސްޓްރީގެ ބޮޑު ރޯލެއްވާ ކަމަށް ކަސްޓަމްސް އިން ބުނެފިއެވެ.
ރައްޖެޓީވީގެ ފަލަ ސުރުހީ ޕްރޮގްރާމުގައި ވަހަކަ ދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވީ ވަގަށް ވެހިކަލްތަކެއް އެތެރެ ކުރަން އުޅުނު މައްސަލަ އަކީ 2019 ވަނަ އަހަރު ހިންގި ބޮޑު ހާދިސާއެއް ކަމަށެވެ. އަދި މި މައްސަލައިގައި ކަސްޓަމްސްގެ 2 މުވައްޒަފަކު ވަޒީފާއިން ވަކިކޮށްފައިވާ ކަމަށެވެ.
މި މައްސަލައިގެ މައުލޫމާތު ހިއްސާ ކުރައްވަމުން ޝަރީފް ވިދާޅުވީ ޓްރާންސްޕޯޓްގެ ތެރޭގައި ވަރަށް ގިނަ ގޯސް ކަންތައްތަކެއް ހިނގާ ވާހަކަ ދާދި ފަހުން ޓްރާންސްޕޯޓް މިނިސްޓަރ ނަހުލާ ވިދާޅުވެފައިވާ ކަމަށާއި، ވަގަށް ވެހިކަލް އެތެރެކުރުމުގައި ވެސް ވަރަށް ބޮޑު ރޯލެއް ޓްރާންސްޕޯޓްގެ ތެރޭގައި ހިނގާފައި އެބައޮތް ކަމަށެވެ.
އެއީ ޓްރާންސްޕޯޓަށް ފޯޖް ޑޮކިއުމެންޓްތައް ހިފައިގެން މި ހުރިހާ އެއްޗެއް ރަޖިސްޓްރީ ކުރެވިފައި އެހުރީ. އަޅުގަނޑު މިދަންނަވަނީ ރާއްޖެއަށް މި ގެންނަނީ ކާރެއް. އެކަމަކު ކަސްޓަމަށް ޑިކްލެއަރ ކޮށްފާނެ ޕިކަޕެއް ގޮތަށް. އެހެންވެއްޖެއްޔާ އެއީ ޕިކަޕެއްތޯ ކާރެއްތޯ އިނގޭނީ އެކަމެއް ކްލިއަރ ކުރަން އެތަނަށް އެޓެންޑް ކުރާ ހުރިހާ މުއައްސަސާތަކަށް އެނގޭނީ. އެހެންވީމާ މި އެންމެން ގުޅިގެން ނޫނިއްޔާ މިކަމެއް ނުކުރެވޭނެ. ދެން ކަސްޓަމްސްއަށް ޕިކަޕަކަށް ޑިއުޓީ ދައްކައިގެން ޓްރާންސްޕޯޓަށް ކާރެއް ހުށަހެޅޭން އެއްވެސް ގޮތެއް ނޯންނާނެ ޓްރާންސްޕޯޓުގެ މުވައްޒަފުންތަކެއް އެކަމުގައި ބައިވެރި ނުވެ. ރަސްމީގޮތެއްގައި ހުށަނޭޅޭނެ. އެހެންވީމަ އެ ރަޖިސްޓްރީވުމުގައި އެބައުޅޭ ޓްރާންސްޕޯޓް ހިސާބުން ވެސް މައްސަލަތަކެއް،ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވީ
ޝަރީފް ވިދާޅުވީ މި މައްސަލަ އަދިވެސް ބަލަމުން ދާ ކަމަށާއި، މައްސަލަ ބަލާ ނުނިމެނީސް ހުރިހާ މައުލޫމާތެއް ހާމަ ނުކުރެވޭނެ ކަމަށެވެ.
މިދިޔަ އަހަރުގެ އޮކްޓޯބަރު މަހުގެ 22 ވަނަ ދުވަހު ރާއްޖެ ޓީވީގެ ފަށާއިރު ޕްރޮގްރާމުގައި ވާހަކަ ދައްކަވަމުން، ޓްރާންސްޕޯޓް މިނިސްޓްރީ ތެރެއިން ކުރާ ބައެއް މަސައްކަތްތަކުގައި ކޮރަޕްޝަނާއި ނާޖާއިޒް ފާއިދާ ނަގަމުންދާކަމަށް ދެކެމުންދާ ވާހަކަތަކާއި ގުޅިގެން ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވީ، އެ މިނިސްޓްރީ އަކީ ފެށުނީއްސުރެ މީހުން އިނގިލި ދިއްކުރަމުން އަދި ތުހުމަތުކުރަމުން އަންނަތަނެއް ކަމަށެވެ.
އަދި ތުހުމަތުގެ އިނގިލި ދިއްކުރަނީ އެތަނުގައި ދެރަ ކަންތައްތަކެއް [ކޮރަޕްޝަނާއި ނާޖާއިޒް ފާއިދާ ނެގުމުގެ ކަންކަން] ހިނގާފައިވާތީ ކަމަށް މިނިސްޓަރ ވިދާޅުވިއެވެ. އަދި މަގާމާ ހަވާލުވެވަޑައިގެންނެވި ފަހުން އެކަންކަން ހައްލުކުރެވޭނެ ގޮތަށް ހާއްސަ އިސްކަމެއް ދެއްވައިގެން މަސައްކަތް ކުރައްވަމުން ގެންދަވާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ވަރަށް ގިނަ ކަންތައްތަކެއް ރަނގަޅުކުރަމުން އަންނަ ކަމަށެވެ. އަދި މިކަންކަމަކީ ކުރިންސުރެ އޮންނަ ކަންތައްތަކެއް ކަމުން، ކަންކަން ރަނގަޅުކުރުމުގައި ދަތިތަކެއް ދިމާވާ ކަމަށެވެ.
އެއް ގަރާޖެއްގައި ގިނަ ވެހިކަލް ރަޖިސްޓްރީ ކުރާ މައްސަލައަކީ ޓްރާންސްޕޯޓު އޮތޯރިޓީ ހިމެނޭ ގޮތަށް ވަރަށް ބައިވަރު މީހުން ގުޅިގެން ހިންގާ ކަމެއް ކަމަށް މިނިސްޓަރ ވިދާޅުވިއެވެ. އަދި ހަމައެކަނި އެކަން ކުރާ އާންމު މީހާއަށް އަދަބު ދިނުމުގެ ބަދަލުގައި މުޅި މައްސަލައަށް ހައްލެއް ހޯއްދަވަން ބޭނުންފުޅުވާ ކަމަށް މިނިސްޓަރ ވިދާޅުވިއެވެ.
