މަސައްކަތް ކުރަމުން އަންނަ ލޯފާމް ތެރޭގައި މަރުވެފައި އޮއްވައި ފެނުނު ޤާނޫނީ ވަކީލެއް ކަމަށްވާ އަލްއުސްތާޛު ޢަބްދުލް ވައްޙާބު ޢަބްދުލް ޤާދިރުގެ އާއިލާއަށް ދިވެހިރާއްޖޭގެ ބާރ ކައުންސިލުން ތައުޒިޔާ ކިޔައިފިއެވެ.
ބާރ ކައުންސިލުން ތައުޒިޔާ ކިޔައި އާންމުކުރި މެސެޖުގައި ބުނެފައިވަނީ، އަލްމަރުޙޫމް އަލްއުސްތާޛު ޢަބްދުލް ވައްޙާބު ޢަބްދުލް ޤާދިރުގެ އާއިލާއަށް ބާރ ކައުންސިލުގެ އެގްޒެކެޓިވް ކޮމިޓީއާއި ޢާންމު މެމްބަރުންގެ ނަމުގައި ތަޢުޒިޔާ ދަންނަވާ ކަމަށެވެ. އަދި އާއިލާއަށް ކެތްތެރިކަން ދެއްވުމަށް އެދޭކަމަށްވެސް މެސެޖުގައި ބުނެފައިވެއެވެ.
ރާއްޖެ.އެމްވީއަށް މައުލޫމާތު ދިން ފަރާތަކުން ބުނީ، ވަކީލު މަރުވެފައި އޮއްވާ ފެނުނީ މާލޭގައި އޭނާ މަސައްކަތް ކުރަމުން އަންނަ ލޯފާމް ތެރެއިން ކަމަށެވެ.
މި މީހާގެ މަރާއި ގުޅިގެން ފުލުހުން މިހާތަނަށް އެއްވެސް އެއްޗެއް ހާމަކޮށްފަ އެއް ނުވެ އެވެ.
އޭނާ ވަނީ މީގެ ކުރިން ޕްރޮސެކިއުޓަރ ޖެނެރަލް (ޕީޖީ) އޮފީހުގައިވެސް މަސައްކަތް ކޮށްފައެވެ. އަދި ވަކީލެއްގެ ގޮތުގައި މަސައްކަތް ކުރަމުން އަންނަތާ ފަސް އަހަރެއްހާ ދުވަސް ވެފައިވެއެވެ.
