"ސްޓެލްކޯ ރަށްފެހި" ޕްރޮގްރާމްގެ ފޮނި މީރުކަން މި ލޮކްޑައުންގެ ތެރޭގައި ތިން ރަށަކުން ލިބިއްޖެއެވެ.

ރަށްފެހި ޕްރޮގްރާމަކީ މުޅި ރާއްޖެ ފެހި ކުރުމަށްޓަކައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފައްޓަވާ ދެއްވާފައިވާ ޕްރޮގްރާމެކެވެ. މި ޕްރޮގްރާމްގައި ބައިވެރިވުމުގެ ގޮތުން ސްޓެލްކޯއިން ވަނީ މިދިޔަ 2019 ވަނަ އަހަރާއި މިއަހަރު ވެސް "ސްޓެލްކޯ ރަށްފެހި" ގެ ނަމުގައި ގަސް އިންދުމުގެ ޕްރޮގްރާމްތަކެއް ހިންގާފައެވެ.

ސްޓެލްކޯއިން ބުނީ މި ޕްރޮގްރާމްގައި އިންދާފައިވާ ބައެއް ގަސްތަކުން ތިމާވެއްޓަށް ފައިދާ ލިބުމުގެ އިތުރުން، މިހާރު މޭވާ ލިބެން ފަށާފައިވާ ކަމަށެވެ. އެގޮތުން މިލޮކްޑައުންގެ ތެރޭގައި މި ޕްރޮގްރާމްގެ ދަށުން ތިލަފުށީ އިންޖީނުގޭގައި އިންދާފައިވާ ބައެއް ގަސްތަކުން ވަނީ މޭވާ ލިބިފައެވެ. އޭގެ ތެރޭގައި ދޮންކެޔޮ، އަނބު، ޖަނބުރޯލު އަދި ކުންނާރުގެ ހިމެނެއެވެ.

ތިލަފުށީގެ އިތުރުން މިއަހަރު ތެރޭގައި އއ. ފެރިދޫ އިންޖީނުގޭގައި މި ޕްރޮގްރާމްގެ ދަށުން އިންދި ބައެއް ގަސްތަކުން ވެސް ވަނީ މޭވާ ލިބިފައެވެ. އޭގެ ތެރޭގައި ދަނޑި އަލުވި، ކުންނާރު، މިރުހުގެ އިތުރުން ކަރަޔާއި މުރަނގަތޮޅި ހިމެނެއެވެ. މީގެ އިތުރުން އދ. މަހިބަދޫއިން ވަނީ ކޮޕީ ފަތާއި، ޖަނބުރޯލު އަދި އަނބުގެ އިތުރުން، އިތުރު ބާވަތްތަކެއް ވެސް ލިބިފައެވެ.

"ސްޓެލްކޯ ރަށްފެހި" ޕްރޮގްރާމްގެ ދަށުން އެ ކުންފުނިން ހިދުމަތްދޭ 35 ރަށުގައި މިދިޔަ އަހަރު 2000 ގަސް އަދި މިއަހަރު 3000 ގަސް ވަނީ އިންދާފައެވެ.