ރާއްޖޭގައި ކޮވިޑް-19 ކޮންޓްރޯލް ކުރެވިފައި ނުވާއިރު، އަދިވެސް މިތިއްބެވީ ބަލިމަޑުކަމުގެ ތެރޭގައި ކަމަށާއި، މިވަގުތަކީ އެއްވުން ބާއްވަންވީ ވަގުތު ނޫން ކަމަށް އެސިސްޓެންޓް ކޮމިޝަނަރ އޮފް ޕޮލިސް ޑރ. ޢަބްދުﷲ ފައިރޫޝް ވިދާޅުވެއްޖެއެވެ.

ފައިރޫޝް މިހެން ވިދާޅުވެފައިވަނީ ސިޔާސީ، އިގުތިސާދީ އަދި އިޖްތިމާއީ ގޮތުން ރައްޔިތުން ބާރުވެރިކުރުވުމުގެ ނަމުގައި ހަރަކާތްތައް ހިންގަމުން އަންނަ "ނަވާނަވައި" މޫވްމެންޓުން ރައްޔިތުންގެ މަޖިލިސް އިދާރާ ސަރަޙައްދުގައި މުޒާހަރާ ކޮށްފައިވަނިކޮށެވެ.

ފައިރޫޝް ކުރެއްވި ޓްވީޓެއްގައި ވިދާޅުވީ އަދިވެސް މިތިއްބެވީ ބަލިމަޑުކަމެއްގެ ތެރޭގައި ކަމަށާއި، މިއީ އެއްވުންތައް ބާއްވަންވީ ވަގުތު ނޫން ކަމަށެވެ. އަދި 3 މީހުންނަށް ވުރެ އިތުރުވާގޮތަށް އެއްނުވުމަށް ފައިރޫޝް ވަނީ އެދިވަޑައިގެންފައެވެ. އަދި ހިޔާލު ފާޅުކުރައްވާ ނަމަ، މާލޭގެ މަގުމައްޗަށް ނުކުމެއް އެއްވުން ނުބާއްވާ އެހެން ގޮތެއް ހޯއްދެވުމަށް ފައިރޫޝް ވަނީ އެދިވަޑައިގެންފައެވެ.

ހޯމަ ދުވަހުގެ ހެނދުނު 08:30ގައި މަޖިލިސް އިދާރާ ގޭގެ ކުރިމަތީގައި ނަވާނަވައިން ބޭއްވި މުޒާހަރާގެ ބައިވެރިން މަޖިލިސް ސަރަޙައްދުން ދުރުކޮށް، ފުލުހުން ވަނީ އެ ސަރަޙައްދުގައި ހަރަކާތްތެރިވެފައެވެ. އެއާއެކު މުޒާހަރާގެ ބައިވެރިން ވަނީ މަޖިލިސް އިދާރާ ކުރިމަތީގައި އޮންނަ ގޯޅި (އިންޑިއާ އެމްބަސީ ކުރިމަތީގައި) ފުލުހުން ކޯރޑަން ކޮށްފައިވާ ހިސާބުގައި މުޒާހަރާ ކުރިއަށް ގެންގޮސްފައެވެ.

ގާތްގަނޑަކަށް 10 ބައިވެރިން މުޒާހަރާގައި ބައިވެރިވެފައިވާއިރު، ކޮވިޑް-19ގެ ސަބަބުން ވަޒީފާ ގެއްލި، ދިރިއުޅޭ ތަނުން ނުކުންނަން މަޖުބޫރުވެފައިވާ މީހުން ޙައްޤުތައް ކަށަވަރު ކޮށްދިނުމަށް މަޖިލީހުން މަސައްކަތް ނުކުރާ ކަމަށް ބުނެ، މުޒާހަރާގެ ބައިވެރިން ވަނީ އެކަމުގެ ކަންބޮޑުވުން ފާޅުކޮށްފައެވެ.

ލޮކްޑައުންއަށް ލުއިތަކެއް ދީފައިވީ ނަމަވެސް، ސިއްހީ ކުއްލި ނުރައްކަލުގެ ހާލަތުގެ ދަށުން މާލެ ސަރަހައްދުގައި 3 މީހުންނަށް ވުރެ އިތުރަށް އެއްތަނަކަށް އެއްވުމަކީ މަނާ ކަމެކެވެ. އަދި އިޖްތިމައީ ގައިދުރުކަން ބެހެއްޓުމާއި، ޒަރޫރީ ބޭއްނުމެއްގައި މެނުވީ ބޭރަށް ނުކުމެ ނޫޅުމަށް ހެލްތް ޕްރޮޓެކްޝަން އެޖެންސީން ވަނީ އިލްތިމާސްކޮށްފައެވެ.