މޯލްޑިވްސް ވޯޓަރ އެންޑް ސެވަރޭޖް ކޮމްޕެނީ ޕްރައިވެޓް ލިމިޓެޑް (އެމްޑަބްލިއުއެސްސީ) ގެ މުވައްޒަފަކު ނަމާދު ކުރަނިކޮށް ޝޫޓްކޮށްފައިވާ ވީޑިއޯގެ މައްސަލަ ބަލަމުންދާ ކަމަށް އެ ކުންފުނީގެ މެނޭޖިން ޑިރެކްޓަރ ހަސަން ޝާހު ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ޝާހު ވިދާޅުވީ ސަމާސާއަކަށް ނަމަވެސް މީހަކު ނަމާދު ކުރަނިކޮށް، އެމީހާއަށް ޖެއްސުންކޮށް، ވީޑިއޯ ޝޫޓް ކުރުމަކީ އެއްވެސް ހާލެއްގައި ބަލައިގަންނާނެ ކަމަށް ނޫން ކަމަށާއި އެކަން ކުށްވެރި ކުރާ ކަމަށެވެ. އަދި މިހާރު ކުންފުނީގެ ހިއުމަން ރިސޯސަސް ޑީޕާޓްމަންޓުން އެ ކަންތައް ހިނގައި ދިޔަ ގޮތް ތަހުޤީޤު ކުރަމުންދާ ކަމަށް ވެސް ޝާހު ވިދާޅުވިއެވެ.
މި ވީޑިއޯ އިން ފެންނަ ގޮތުގައި އެމްޑަބްލިއުއެސްސީގެ މުވައްޒަފު ނަމާދު ކުރަން ހުންނަނިކޮށް ބަޔަކު މީހުން އޭނާގެ ވީޑިއޯއެއް ޝޫޓް ކުރަމުންދެއެވެ. އަދި ވީޑިއޯ އިން ފެންނަ ގޮތުގައި އެމީހާ ނަމާދު ކުރަމުންދާ ވަރަކަށް ވީޑިއޯ ޝޫޓް ކުރި މީހާ އެކި ޒާތްޒާތުގެ އެއްޗެހިތައް ކިޔަމުންދެއެވެ. އަދި އެމީހާއަށް ނަމާދު ނުކުރެވިގެން އެންމެ ފަހުން ނަމާދު ކުރުން ހުއްޓާލައެވެ.
މި ވީޑިއޯ ހަލުވި ކަމާއެކު ސޯޝަލް މީޑިއާގެ އެކި ޕްލެޓްފޯމްތަކުގައި ދައުރުވަމުންދާއިރު ގިނަ ބަޔަކު ވަނީ މިކަން ކުށްވެރިކޮށްފައެވެ. އަދި ސަމާސާއަކަށް ނަމަވެސް މިފަދަ ކަންތައްތައް ކުރުމަކީ އެދެވިގެންވާ ކަމެއް ނޫން ކަމަށް އެ ފަރާތްތަކުން ދަނީ ބުނަމުންނެވެ.
