ފުލުހުންގެ ހިދުމަތުގެ ބިލަށް އާންމުންގެ ހިޔާލު ހޯދުމަށް ހުޅުވާލައިފިއެވެ.

ރައްޔިތުންގެ މަޖިލީހުގެ އިދާރާ އިން ނެރުނު އިއުލާނެއްގައި ބުނެފައިވަނީ އާންމުންގެ ހިޔާލު ހޯދުމަށް ހުޅުވާލާފައިވާއިރު މި ބިލަށް އެއްވެސް ހިޔާލެއް ނުވަތަ ކޮމެންޓެއް ވާނަމަ މި ހިނގާ ޖޫން މަހުގެ 30 ވަނަ ދުވަހުގެ 14:00 ކޮމެޓީގެމެއިލްއެޑްރެސްއަށް ނުވަތަ މަޖިލީހުގެ އިދާރާއަށް ފޮނުވުމަށް އެދޭ ކަމަށެވެ.

ދިވެހި ފުލުހުންގެ ހިދުމަތުގެ ބިލުގެ މައިގަނޑު މަގްސަދަކީ ފުލުހުންގެ ހިދުމަތް ލާމަރުކަޒުކޮށް ހިންގުން ކަމަށް ސަރުކާރުގެ ފަރާތުން އެ ބިލް މަޖިލީހަށް ހުށައެޅުއްވި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވަނީ ވިދާޅުވެފައެވެ.

މި ބިލުގެ 7 ވަނަ މާއްދާގެ (ހ) ގައި ބަޔާންކޮށްފައިވާ ގޮތުން ފުލުހުންގެ ހިދުމަތް ދޭންވާނީ އެ ހިދުމަތެއް ދެވޭ ސަރަހައްދެއްގެ ރައްޔިތުންނާއި، ކައުންސިލްގެ މެންބަރުންނާއި، މަދަނީ ޖަމްއިއްޔާތަކާއި، ދައުލަތުގެ މުއައްސަސާތަކުގެ ބައިވެރިވުން ލިބޭނެފަދަ ގޮތަކަށެވެ. މިގޮތުން އެތަންތަނުން ދެވޭ ފުލުހުންގެ ހުދުމަތް ބައްޓަންކުރަންވާނީ ކޮމިއުނިޓީ ޕޮލިސިންގގެ ފަލްސަފާއި މައްޗަށް ކަމަށްވެސް ބިލުގައިވެއެވެ.

ފުލުހުންގެ ހިދުމަތުގެ ބިލުގައި ބުނެފައިވާ ގޮތުން، މި ބިލުގެ ބޭނުމަކީ ފުލުހުންގެ ހިދުމަތުގެ އެންމެހާ ކަންކަމަކީ ދިވެހި ޖުމްހޫރިއްޔާގެ ގާނޫނުއަސާސީ އާއި، ގާނޫނުއާސާސީ ގައި ބަޔާންކޮށްފައިވާ ދުސްތޫރީ ހަމަތަކާއި އިންސާނީ ހައްގުތަކަށް އިހުތިރާމާއެކު ގާނޫނުގެ ހުކޫމާތުގެ ތެރެއިން ދެވޭ ހިދުމަތެއްކަން ކަށަވަރުކުރުން ކަމަށެވެ. އަދި މިހާރު އަމަލު ކުރަމުންދާ ގާނޫނު ނަންބަރު 5/2008 (ފުލުހުންގެ ޤާނޫނު)ގެ ބަދަލުގައި އާ ގާނޫނެއް ތަޢާރަފުކޮށް، ފުލުހުންގެ ހިދުމަތް ގާއިމުކުރެވިފައިވާ ގޮތާއި، ފުލުހުންގެ ހިދުމަތް ފޯރުކޮށްދިނުމުގެ މައިގަނޑު އަސާސްތަކާއި އުސޫލުތަކާއި، ފުލުހުން ހިދުމަތުގެ މައިގަނޑު މަސްއޫލިއްޔަތުތަކާއި، ބާރުތަކާއި، އެ ހިދުމަތާގުޅޭ އެނޫންވެސް ކަންކަން އެ ގާނޫނު މެދުވެރިކޮށް އަލުން ކަނޑައެޅުން ކަމަށްވެސް ދިވެހި ފުލުހުންގެ ހިދުމަތުގެ ބިލުގައިވެއެވެ.