އިރު ކޭތަ (އަނގޮޓި ކޭތަ) ރާއްޖެއަށް ހިފައިފިއެވެ.
"ރިންގް އޮފް ފަޔަރ" ގެ ނަން ދެވިފައިވާ މި ކޭތައަކީ މި އަހަރު ހިފި ފުރަތަމަ އިރުކޭތައެވެ.
ރާއްޖެއަށް އަނގޮޓި ކޭތައިގެ ގޮތުގައި މަންޒަރެއް ނުފެންނާނެއެވެ. ރާއްޖެއަށް މިކޭތަ ފެނިފައިވަނީ ކުޑަ މިންވަރަކަށެވެ. އެއީ ފަޅި ކޭތައެއްގެ ގޮތަށެވެ.
ރާއްޖެއަށް ކޭތަ ހިފަން ފެށީ ރާއްޖޭގެ ގަޑިން ހެނދުނު 8:45 ހާއިރު ނަމަވެސް ކޭތައިގެ ހިޔަނި ރާއްޖެއަށް އަރަން ފެށީ އޭގެ 45 ވަރަކަށް މިނިޓް ފަހުން ގާތްގަނޑަކަށް 9:30 ހާއިރުއެވެ. ރާއްޖެއަށް ކޭތަ އެންމެ ބޮޑަށް ހިފާފައި ހުރީ ހެނދުނު 10:51 ގައެވެ.
އިސްލާމިކް މިނިސްޓްރީން ބުނީ އިރުކޭތަ ވީއްލާނީ މެންދުރު 12:14 ގައި ކަމަށާއި، މި ކޭތަޔަކީ ހަމަލޮލަށް ފެންނާނެ ކޭތައެއް ކަމަށެވެ. އަދި ކޭތަ އެންމެ ސާފުކޮށް ފެންނާނީ އެކްސްރޭ ޝީޓު ފަދަ ހުރަހެއް ބޭނުން ކޮށްގެން މިނިސްޓްރީން ބުނެއެވެ.
މިފަދަ އަނގޮޓި ކޭތައެއް ދެން ފެންނާނެ ކަމަށް ބެލެނީ 2032 ވަނަ އަހަރުއެވެ.
