އިތުރު 26 މީހަކު ކޮވިޑް-19ށް ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އެޖެންސީން ބުނީ ޕޮޒިޓިވްވި މީހުންގެ ތެރޭގައި ހިމެނެނީ 3 ދިވެހިންނާއި، ބަންގުލަދޭޝްގެ 16 މީހަކާއި، ނޭޕާލުގެ 3 މީހެއްގެ އިތުރުން އިންޑިއާގެ 3 މީހެއް އަދި ލަންކާ މީހެއް ކަމަށެވެ.

މިއާއެކު ރާއްޖޭގައި ޕޮޒިޓިވްވި ކޭސްތަކުގެ އަދަދު ވަނީ 2120ށް އަރާފައެވެ. ރާއްޖޭގައި ކޮވިޑަށް ފަރުވާ ދެމުން އަންނަނީ 433 މީހުންނެވެ. މިހާތަނަށް 1677 މީހަކު ވަނީ ބަލިން ފަސޭހަވެފައެވެ. އެހެންކަމުން މި ހިނގަމުންދާ 24 ގަޑި އިރު ތެރޭގައި ބަލިން ރަނގަޅުވީ އިތުރު 7 މީހެކެވެ.

ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ނެޝަނަލް އިމަރޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒު ވިދާޅުވީ 1048 ސާމްޕަލްގެ ނަތީޖާ ބުދަ ދުވަހު ލިބިފައިވާ ކަމަށާއި، ސާމްޕަލް ނެގުނު މީހުންނަށް އެ މައުލޫމާތު ދިނުމުގެ މަސައްކަތް ކުރިއަށްދާ ކަމަށެވެ. އަދި 467 މީހަކަށް ނަތީޖާ މިހާތަނަށް އަންގާފައިވާ އިރު، ގުޅުމުން ފޯނަށް ޖަވަބު ނުދީ 44 މީހަކު އެބަތިބި ކަމަށެވެ. އަދި ދީފައިވަ ނަންބަރަށް ނުގުޅޭ 2 މީހަކާއި، ފޯނު ކަނޑާލާފައިވާ 4 މީހެއް އެބަތިބި ކަމަށެވެ. މަބްރޫކް ވިދާޅުވީ ބާކީ މީހުންނަށް ގުޅުމުގެ މަސައްކަތް ކުރަމުންދާ ކަމަށެވެ.

މަބްރޫކް ވިދާޅުވީ ކޭސްތަކާއި ގުޅިގެން ކޮންޓެކްޓް ޓްރޭސިންގ ހެދުމުގެ މަަސައްކަތް ކުރިއަށްދާ އިރު، ކޭސްތަކާއި ގުޅިގެން މިހާތަނަށް 754 ތަނެއް ވަނީ މޮނިޓަރިންގެ ހާލަތަށް ގެނެސްފައިވާ ކަމަށެވެ. އަދި ޕޮޒިޓިވް ކޭސްތަކާއި ގުޅިގެން ހާއްސަ ސަމާލުކަމެއް ދިނުމަށް 13 މީހަކު ތިބިކަން ފާހަގަ ކުރެވޭ ކަމަށާއި، އެގޮތުން ޓްރީޓޮޕް ހޮސްޕިޓަލު ވަރޑުގައި 4 މީހަކާއިި، އައިސީޔޫގައި 1 މީހަކު އެބަތިބި ކަމަށެވެ. މީގެ އިތުރުން ހުޅުމާލެ މެޑިކަލް ފެސިލިޓީގައި 8 މީހަކު އެބަތިބި ކަމަށް މަބްރޫކް ވިދާޅުވިއެވެ.

އެޗްޕީއޭގެ އެންމެ ފަހުގެ މައުލޫމަތުތައް ދައްކާގޮތުން އައިސޮލޭޝަންގައި 281 މީހަކު އެބަތިއްބެވެ. އަދި ޓްރާންސިޓް ކަރަންޓީންގައި 517 މީހަކާއި، ކޮންޓެކްޓް ޓްރޭސިންގެ ތެރެއިން ފަހަގަ ކުރެވުނު މީހުންގެ ތެރެއިން 318 މީހަކު ކަރަންޓީންގައި އެބަތިބި ކަމަށެވެ.

މީގެ އިތުރުން 132 މީހަކު ކަރަންޓީންގެ މުއްދަތު ހަމަވުމުން ދޫކޮށްލަފައިވާ ކަމަށެވެ. އަދި އިތުރު 172 މީހަކު ކަރަންޓީނުން ދޫކޮށްލުމަށް ސާމްޕަލް ނަގާފައިވާ ކަމަށެވެ.