ސިވިލް ކޯޓުގެ އިސްގާޒީ އަލްއުސްތާޛު ޢަބްދުﷲ އަލީއާއި އިތުރު 3 މެޖިސްޓްރޭޓެއްގެ ސުލޫކީ މައްސަލަތަކެއް ޖުޑީޝަލް ސަރވިސް ކޮމިޝަން (ޖޭއެސްސީ) އިން ތަހުޤީޤު ކުރަން ނިންމައިފިއެވެ.

ބުދަ ދުވަހު ޖޭއެސްސީން ނެރުނު ބަޔާނެއްގައި ބުނީ، ސިވިލް ކޯޓުގެ އިސްޤާޟީ އަލްއުސްތާޛު ޢަބްދު ﷲ ޢަލީ، ސިވިލް ކޯޓަށް ހުށަހެޅިފައިވާ މައްސަލައެއްގައި ދަޢުވާކުރާ ފަރާތުގެ ބަދަލުގައި ކޯޓަށް ޙާޟިރުވުމަށް ޢައްޔަނު ކޮށްފައިވާ ފަރާތް ކޯޓަށް ހާޟިރު ނުކޮށް މައްސަލަ ބާތިލު ކޮށްފައިވާ ކަމަށް ބުނާ މައްސަލައެއް ތަހުޤީޤު ކުރުމަށް ނިންމާފައިވާ ކަމަށެވެ.

އޭގެ އިތުރުން، 3 މެޖިސްޓްރޭޓެއްގެ މައްސަލަ ތަހުޤީޤު ކުރަމުންދާއިރު، ގއ.ކޮނޑޭ މެޖިސްޓްރޭޓް ކޯޓްގެ އިސްމެޖިސްޓްރޭޓް އަލްއުސްތާޛް މުޙައްމަދު އިބްރާހީމް، ޝަރުޢީ ދާއިރާގެ މުވައްޒަފުންގެ ޤަވާއިދުގައި ބަޔާން ކުރާފަދަ އާއިލީ ގުޅުން އޮންނަ ފަރާތެއް، އެކޯޓުގެ އެޑްމިނިސްޓްރޭޓިވް އޮފިސަރގެ މަޤާމަށް ހަމަޖެއްސުމުގައި އިހުމާލުވިކަމަށް ތުހުމަތު ކުރެވޭ މައްސަލައެއްވެސް ހިމެނެއެވެ.

ޖޭއެސްސީން ބުނީ، ފުވައްމުލަކު މެޖިސްޓްރޭޓް ކޯޓްގެ މެޖިސްޓްރޭޓް އަލްއުސްތާޛު މުލްޙާ ޢަލީގެ މައްޗަށްވެސް ގިނަ ތުހުމަތުތަކެއް ކުރެވިފައިވާ ކަމަށެވެ. އެގޮތުން ކޯޓުގައި ހިނގާ މައްސަލަތަކުގައި ޝާމިލްވާ އެކި ފަރާތްތަކާއެކު ފަނޑިޔާރަކު ބާއްވައިގެން ނުވާނެ ގުޅުން ބާއްވާކަމުގެ ތުހުމަތާއި، ޖިންސީ ގޯނާގެ މައްސަލައެއްގައި އެހެން މެޖިސްޓްރޭޓަކު ބަންދު މުއްދަތު ޖަހާފައި ވަނިކޮށް އެ ބަންދު އަމުރު މުރާޖަޢާކޮށް ގޮތް ނިންމިކަމަށް ބުނެވޭ މައްސަލައަކާއި، އާއިލީ ވިޔަފާރީގައި ޢަމަލީ ގޮތުން ބައިވެރިވާކަމަށް ބުނެ ހުށަހަޅާފައިވާ މައްސަލައަކާއި، ފުލުހުންގެ އިދާރާއިން ހިންގި ތަހުޤީޤަކަށް ހުރަސްއަޅައި ހެކި ނައްތާލަން މަސައްކަތްކޮށް ފަނޑިޔާރެއްގެ ޢަމަލުތައް ބަހައްޓައިގެން ނުވާނެ ފަދަ ގޮތަށް ޢަމަލު ކުރިކަމަށް ބުނާ މައްސަލައެއް ހުށައެޅިފައިވާ ކަމަށް ޖޭއެސްސީން ބުނެއެވެ.

އޭގެ އިތުރުން، ހުޅުމާލެ މެޖިސްޓްރޭޓް ކޯޓުގެ އިސް މެޖިސްޓްރޭޓް ސިޔާމާ މުޙައްމަދު، މީހަކު ބަންދުގައި ބެހެއްޓުމާމެދު ގޮތް ނިންމިއިރު، ހަޤީޤަތާ ޚިލާފަށް އަދި ޒިންމާދާރުކަން ކުޑަގޮތެއްގައި ލިބިފައިވާ މައުލޫމާތު އޮޅޭގޮތަށް ޢަމަލުކުރި ކަމަށް ބުނެ ހުށަހެޅިފައިވާ މައްސަލައެއްވެސް ތަހުޤީޤު ކުރުމަށް ޖޭއެސްސީން ވަނީ ނިންމާފައެވެ.

ޖޭއެސްސީން ބުނީ، މި މައްސަލަތައް ތަޙުޤީޤު ކުރާނެ ކޮމިޓީތައް ބުދަ ދުވަހު ބޭއްވުނު ކޮމިޝަނުގެ މި އަހަރުގެ 42 ވަނަ ބައްދަލުވުމުގައި ކޮމިޝަނުން ކަނޑައަޅާފައިވާ ކަމަށެވެ. އަދި މި ބައްދަލުވުމުގައި ކޮމިޝަންގެ 7 މެމްބަރުންވެސް ބައިވެވަޑައިގެންނެވި ކަމަށް ޖޭއެސްސީން ބުނެއެވެ.