ހޯމަ ދުވަހުން ފެށިގެން އިތުރު ލުއިތަކެއް ލިބުނު ނަމަވެސް ޒަރޫރީ ބޭނުމެއްގައި މެނުވީ ގެއިން ބޭރަށް ނުނުކުތުމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) އިން އިލްތިމާސްކޮށްފިއެވެ.
ހޮނިހިރު ދުވަހުގެ ރޭ ނެޝަނަލް އެމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތް މިނިސްޓްރީގެ އެސިސްޓަންޓް ޑިރެކްޓާ އައިމިނަތު ޝައިނާ އަބްދުﷲ ވިދާޅުވީ އާންމުކޮށް ހުޅުވާލެވިގެން އުސޫލެއްގެ ދަށުން ހުއްދަ ނުލާ ބޭރުގައި އުޅެން ހުޅުވާލެވުނުކަމުގައި ވީނަމަވެސް، އެދުމަކީ ޒަރޫރީ ބޭނުންތައް ފިޔަވައި ބޭރުގައި އުޅޭ އުޅުން މަދުކުރެއްވުން ކަމަށެވެ.
ދާ ކޮންމެ ތަނަކުން ދިމާވާ ތަންތަނުން އެކި މީހުންނާއި ބައްދަލުވާނެ. އެހެންވީމަ ވީހާވެސް މަދުކުރައްވާ އެމީހަކު އެ ދިމާވާ ކޮންޓެކްޓްތަކާއި އެމީހެއްގެ މޫވްމަންޓް. މި ލިބޭ ލުޔަކީ ކުރީގައި ޕާމިޓް ނަގައިގެން ބޭރަށް ނުކުމެގެން ޕާމިޓް އޮންނަ ދަތިތަކާއި، އުނދަގޫތައް ފުލުވުމަށްޓަކައި ދިން ލުޔެއް މިއީ. މި ފުރުސަތުގެ ބޭނުން ހިފާ އެގޮތަށް އަމަލުކޮށް ވީހާވެސް ބޮޑަށް ކަންކަމަށް ސަމާލުކަންދީގެން ބޭރުގައި އުޅޭ ވަގުތުތައް ގިނަ ނުކޮށް އުޅެވޭނެ އުސޫލަކަށް،ހެލްތް މިނިސްޓްރީގެ އެސިސްޓަންޓް ޑިރެކްޓާ އައިމިނަތު ޝައިނާ އަބްދުﷲ
މީގެ އިތުރުން އެއްވެ އުޅުމާއި ހަފްލާ ބޭއްވުމަށް މިއީ އެންމެ ރަނގަޅު ފުރުސަތެއް ނޫން ކަމަށާއި، އާއިލާ މީހުން ބައްދަލުވެ ޕާޓީ ބާއްވާ ނުވަތަ ދިމާވެލަން ނުވަތަ އިޖްތިމާއީ ގޮތުން ގައިދުރުކަން ނުބެހެއްޓޭ ފަދަ ހާލަތްތަކުގައި ބައްދަލުވާން ވެސް މިއީ އެންމެ ރަނގަޅު ފުރުސަތު ނޫން ކަމަށް ޝައިނާ ވިދާޅުވިއެވެ. އަދި މި ފުރުސަތުގައި ވީހާވެސް ބައްދަލުވުންތައް މަދުކޮށް 3 މީހުންނަށްވުރެ ގިނައިން އެއްވެ ނޫޅުމަށް ވަނީ އެދިވަޑައިގެންފައެވެ.
ޝައިނާ ވިދާޅުވީ ލުއިތަކެއް ދެވިގެން ދާއިރު ވަކި ކަންތައްތަކަކަށް ވަކި އުމުރު ފުރާތަކަށް ވަކި ގަޑިތަކެއް ކަނޑައަޅާފައިވާނެ ކަމަށެވެ. އަދި މިކަމުގެ މައިގަނޑު ބޭނުމަކީ މި އުމުރުފުރާތަކަށް ހާއްސަ ވަގުތުތަކެއްގައި އެބޭފުޅުންނަށް އެބޭފުޅުން ކުރަން ބޭނުންވާ ހަރަކާތެއް ކުރެވޭނެ އިންތިޒާމް އެއް އުމުރުފުރާއާއި އަނެއް އުމުރު ފުރާ މަސްހުނި ނުވާނެ އިންތިޒާމްތަކެއް ހަމަޖެހިފައި އޮތުން ކަމަށެވެ.
ގަޑިތަކެއް ކަނޑައެޅިފައި މިހުރީ ކުރިއަށް އޮތް 2 ހަފްތާއަށް. އެހެންކަމުން ކުރިއަށް އޮތްތަނުގައި އިތުރު ލުއިތަކެއް ގެނެވިގެންދާނެ. އެހެންނަމަވެސް ކުރިއަށް އޮތް 2 ހަފްތާގައި އުމުރުން ދުވަސްވީ މީހުން ނުކުތުމަށް ކަނޑައެޅިފައި އޮތް ވަގުތަކީ ފަތިހު 5:00ން ފެށިގެން ހެނދުނު 8:00 އާ ދޭތެރޭގައި. ކުޑަކުދިން ބެލެނިވެރިޔަކާއެކު ބޭރަށް ނުކުތުން އިނީ ހަވީރު 4:00ން 6:00ށް. އާންމު ތަންތަނުގައި ކަސްރަތުކުރަން ހުޅުވާލެވެނީ ހަވީރު 6:00ން ރޭގަނޑު 9:00ށް. ކަސްރަތު ކުރުން މާނަ ކުރަނީ އެކަކު އަމިއްލައަށް ކުރާ ކަސްރަތެއް ކުރުން ނުވަތަ ދުވަންދާން ހުއްދަ ދެވޭ ގޮތަށް. 3 މީހުންނަށް ވުރެ ގިނައިން އެއްވެ އުޅުމަކީ ހުއްދަ ކަމެއް ނޫން. ފުރުސަތުގެ ބޭނުން ހިފާއިރުގައި ނުވަތަ ކަސްރަތުކުރަން ވަޑައިގަންނަވާ އިރު އެކަނި ގޮސް ކަސްރަތު ކުރައްވާފައި ގެއަށް ވަޑައިގަތުމަށް އަޅުގަނޑުމެން އެދެނީ،ހެލްތް މިނިސްޓްރީގެ އެސިސްޓަންޓް ޑިރެކްޓާ އައިމިނަތު ޝައިނާ އަބްދުﷲ
ޝައިނާ ވިދާޅުވީ މާސްކް އެޅުން ލާޒިމް ކުރަނީ ބަންދު ތަންތަނަށް ވަންނަ އިރުގައި ކަމަށެވެ. އަދި ވިޔަފާރިތަކުން ހިދުމަތްދޭ ތަންތަނުގެ ހިދުމަތްދެވޭ ގަޑިތައް ވެސް ވާނީ ކަނޑައެޅިފައި ކަމަށާއި، އެއީ ހެނދުނު 9:00ން ރޭގަނޑު 9:00ށް ކަމަށެވެ. އަދި މިތަންތަނަށް ދިއުމުގައި ވެސް ކަނޑައެޅޭ ވަކި އުސޫލުތަކެއް އެބަހުރި ކަމަށާއި، އޭގެ ތެރޭގައި އެތަނަކަށް އެންމެ ގިނައިން ވަދެވޭނެ އަދަދާއި، ހިދުމަތްދޭ ތަންތަނުގެ ބޭރުގައި ފެންނަނެ ގޮތަށް ވަދެވޭނެ ނަންބަރު ފެންނަން އިންނަން ޖެހޭނެ ކަމަށެވެ.
އަދި އެތެރެއަށް ވަންނަ އިރުގައި ހޭންޑް ސެނިޓައިޒް ކުރެވެންޖެހޭނެ ކަންތައްތަކާއި މާސްކް އެޅުމާއި އެތެރޭގައި އަމަލުތައް ބަހައްޓަންވީ ގޮތާއި ވީހާވެސް މަދު ވަގުތެއް ފިހާރަތެރޭގައި ހޭދަ ކުރުމާއި، ގަންނަންދާ އެއްޗެއް ނުވަތަ ފުރިހަމަ ކުރަން ބޭނުންވާ ކަމެއް ފުރިހަމަ ކުރުމަށްފަހު ވީހާވެސް އަވަހަކަށް އަނބުރާ ގެއަށް ދިއުން މުހިންމު ކަމަށް ޝައިނާ ވިދާޅުވިއެވެ.
ހޯމަ ދުވަހުން ފެށިގެން 2 ހަފްތާއަސް އިތުރު ލުއިތަކެއް ދިނުމަށް ވަނީ ނިންމާފައެވެ. އަދި މި މަސް ނިމުމުން މިހާރު ދީފައިވާ ލުއިތަކުގެ އިތުރުން، އިތުރު ލުއިތަކެއް ދިނުމަށް ވެސް ނިންމާފައިވާނެ ކަމަށް ޝައިނާ ވިދާޅުވިއެވެ.
