ޖިނާއީ އިޖުރާއަތުގެ ޤާނޫނުގެ ދަށުން ހިއުމަން ރައިޓްސް ކޮމިޝަން (އެޗްއާރްސީއެމް )އިން ހަދަންޖެހޭ ޤަވާއިދު 30 ދުވަސްތެރޭ ހެދުމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް އެ ކޮމިޝަނަށް އަންގަވައިފިއެވެ.

އެކަމާ ގުޅޭގޮތުން ޕީޖީ އޮފީހުން ބުނީ، މިއީ ޖިނާއީ އިޖުރާއަތުގެ ޤާނޫނުގެ 211 ވަނަ މާއްދާގެ (ހ) ގައި ޤާނޫނު ތަންފީޛްކުރާ އިދާރާތަކުން ހަދަންޖެހޭކަމަށް ބަޔާންކުރާ ގަވާއިދެއް ކަމަށެވެ. އަދި މި ޤަވާއިދު ހިއުމަން ރައިޓްސް ކޮމިޝަނުން އެކުލަވާލާފައި ނުވާކަން ޕީޖީ އޮފީހުން ވަނީ ފާހަގަ ކޮށްފައެވެ.

ޖިނާއީ އިޖުރާއަތުގެ ޤާނޫނުގެ 211 ވަނަ މާއްދާގައި ބަޔާންކޮށްފައިވާގޮތުން ޤާނޫނުގެ ދަށުން ތަހުޤީޤު ކުރުމާ ގުޅޭ ކަންކަމުގައި ޤަވާއިދުތައް ހަދާނީ ޤާނޫނު ތަންފީޒުކުރާ އިދާރާތަކުންނެވެ.

ޕީޖީ އޮފީހުން ބުނީ، ޤާނޫނުއަސާސީގެ 223 ވަނަ މާއްދާގެ (ރ) އިން ޕްރޮސިކިއުޓަރ ޖެނެރަލްއަށް ލިބިދޭ ބާރުގެ ދަށުން، އެ ގަވާއިދު 30 (ތިރީސް) ދުވަހުގެ ތެރޭގައި އެކުލަވާލައި، ދިވެހި ސަރުކާރުގެ ޖެޒެޓްގައި ޝާއިޢުކުރުމަށް އާދިއްތަ ދުވަހު އެ ކޮމިޝަނަށް އަންގާފައިވާ ކަމަށެވެ.

އެޗްއާރްސީއެމްގެ މެމްބަރުން ވަކިކުރަން މަޖިލީހަށް މައްސައެއްވެސް ވަނީ ހުށައަޅާފައެވެ. އެގޮތުން އެ ކޮމިޝަނަށް ގާނޫނުން މަތިކުރެވިފައިވާ ޒިންމާ އަދާނުކުރާ ކަމަށް ރައްޔިތުންގެ މަޖިލީހުގެ ގިނަ މެމްބަރުންތަކެއްވެސް ވަނީ ވިދާޅުވެފަ އެވެ.