ކޮވިޑް-19 އާ ގުޅިގެން ކުރަމުންދާ މަސައްކަތްތަކުގެ ތެރެއިން ރާއްޖޭގެ އަލުން ޢާންމު ޙާލަތަށް ރުޖޫޢަވުމަށް ކުރަންޖެހޭ ކަންކަން ވިލަރެސް ކުރުމަށް ޚާއްޞަ ކޮމިޓީއެއް ރައީސުލްޖުމްހޫރިއްޔާ އުފައްދަވައިފިއެވެ.

އެކަމާ ގުޅޭގޮތުން ރައީސް އޮފީހުން ނެރުނު ބަޔާނެއްގައި ބުނީ، ކޮވިޑް-19 ރާއްޖޭގައި ފެތުރުން ހުއްޓުވުމަށް ކުރުމަށް އަޅާފައިވާ ފިޔަވަޅުތަކުގެ ސަބަބުން އިޤްތިޞާދަށް ކުރިމަތިވެފައިވާ މަޑުޖެހުމާއެކު، ވިޔަފާރިތަކަށާއި އަދި ޢާންމު ރައްޔިތުންގެ ދިރިއުޅުމާ ޢާމްދަނީއަށް ބޮޑެތި އަސަރުތަކެއް ކޮށްފައިވާ ކަމަށެވެ.

އެގޮތުން މިދަތިތަކާ ގުޅިގެން ދިމާވާނެ އިޖުތިމާޢީ މައްސަލަތަކަށް ޙައްލުތަކެއް ހޯދުމަށްޓަކައި، ޤައުމީ ފެންވަރުގައި ކުރާނެ މަސައްކަތްތައް ރާވާ، ވިލަރެސްކޮށް، ހިންގާނެ ނިޒާމެއް ޤާއިމު ކުރުމުގެ ގޮތުން، "ނޭޝަނަލް ޓާސްކްފޯރސް އޮން ރެސިލިއަންސް ބިލްޑިންގް އެންޑް އިކޮނޮމިކް ރިކަވަރީ" ގެ ނަމުގައި މި ޓާސްކްފޯސް އުފެއްދެވުމަށް އޭޕްރިލް 13 ވަނަ ދުވަހު ބޭވި ވަޒީރުންގެ މަޖިލީހުގެ ބައްދަލުވުމުގައި ރައީސުލްޖުމްހޫރިއްޔާ ނިންމަވާފައިވާކަމަށް ރައީސް އޮފީހުން ބުނެއެވެ.

ރައީސް އޮފީހުން ބުނީ، މި ޓާސްކްފޯސްގެ މަޤްޞަދަކީ މިހާރު ދިމާވެފައިވާ ޙާލަތުން، އިޤްތިޞަދީ އަވަސް ރިކަވަރީ އަކަށް ވާޞިލުވެ، އިޤްތިޞާދީ ދުވެލި އާރާސްތުކުރުމަށް ސަރުކާރާއި، ޕްރައިވެޓް ސެކްޓަރާއި، ސިވިލް ސޮސައިޓީ އަދި ދައުލަތުގެ އެކި މުއައްސަސާތަކުގެ ބައިވެރިވުމާއެކު މަސައްކަތްކުރުން ކަމަށެވެ.

ރައީސުލްޖުމްހޫރިއްޔާގެ ބެއްލެވުމުގެ ދަށުން ހިންގާ މި ޓާސްކްފޯހުގެ މަސައްކަތް 3 މަސައްކަތު ގްރޫޕަކަށް ބަހާލައިގެން ކުރިއަށްގެންދިއުމަށް ނިންމާފައިވާއިރު، އޭގެ ތެރޭގައި ހިމެނެނީ ވަރކިންގް ގްރޫޕް އޮން ފައިނޭންސް، ވަރކިންގް ގްރޫޕް އޮން އިކޮނޮމިކް ރިކަވަރީ އަދި ވަރކިންގް ގްރޫޕް އޮން ސޯޝަލް ސެކްޓަރެވެ.

އެގޮތުން ފައިނޭންސް ވަރކިންގް ގްރޫޕްގެ މައިގަނޑު މަސައްކަތަކީ ކޮވިޑް-19 އާއި ގުޅިގެން ކުރަންޖެހޭ އިތުރު ޚަރަދުތަކާއި ޢާމްދަނީ އަށް އަންނާނެ ބަދަލުތައް ދެނެގަނެ، ބަޖެޓު ހިންގުމަށް ބޭނުންވާނެ ފައިސާގެ މިންވަރުތައް ދެނެގަތުމެވެ. އަދި މި ފައިސާ ހޯދުމަށް، މަސައްކަތް ކުރުމުގެ އިތުރުން، ސަރުކާރަށް ނަގާފައިވާ ބޭރުގެ ދަރަނި އަދާކުރުމުގައި ލުއިގޮތްތަކެއް ހޯދުމަށް މަޝްވަރާތައް ކުރިއަށް ގެންދިއުންވެސް މި ގްރޫޕުގެ މަސައްކަތްތަކުގެ ތެރޭގައި ހިމެނެއެވެ.

އޭގެ އިތުރުން، އިކޮނިމިކް ރިކަވަރީ ވަރކިންގް ގްރޫޕްގެ މައިގަނޑު މަސައްކަތަކީ ސްޓިމިއުލަސް ޕެކޭޖުތައް ތަޢާރަފުކޮށް ހިންގުން ކަމަށާއި، ފަތުރުވެރިކަމާ އަދި އެހެނިހެން ދާއިރާތައް ހުޅުވާލުމުގައި ނިންމަންޖެހޭ ނިންމުންތައް ތަންފީޒުކުރުން ކަމަށް ރައީސް އޮފީހުން ބުނެފައިވެއެވެ.

އޭގެ އިތުރުން، ސޯޝަލް ސެކްޓަރ ގްރޫޕުގެ މަސައްކަތްތަކުގެ ތެރޭގައި ވަޒީފާ ގެއްލުމާ، ޢާމްދަނީ ލިބުން ހުއްޓުމާ ގުޅިގެން ނަފްސާނީ ދުޅަހެޔޮކަމަށް ކޮށްފާނެ އަސަރުތަކާއި، ބިދޭސީ މަސައްކަތްތެރިންގެ ދިރިއުޅުމުގެ ޙާލަތު މިހާރަށް ވުރެ ރަނގަޅު ޙާލަތަކަށް ގެނައުމަށް ކުރަންޖެހޭ މަސައްކަތް ކުރުން ފަދަ ކަންކަން ހިމެނިފައިވެއެވެ.