މާލޭގައި ޑެލިވަރީކުރުމަށް ފުލުހުން ދީފައިވާ ވެހިކަލް ޕާޓިމް ޤވާއިދާ ޚީލާފަށް ބޭނުންކުރުމާއި ގުޅިގެން 17 ޕާމިޓެއް ކެންސަލްކޮށްފައިވާ ކަމަށް ފުލުހުން ހާމަކޮށްފިއެވެ.

އާދީއްތަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެސިސްޓެންޓް ކޮމިޝަނަރ އޮފް ޕޮލިސް އިސްމާއިލް ނަވީން ވިދާޅުވީ ހުއްދަ ދީފައިވާ ބޭނުމާއި ޚިލާފަށް ޕަރމިޓްތައް ބޭނުންކުރުމުގެ ސަބަބުން 17 ފަރާތެއްގެ ޕަރމިޓް ކެންސަލް ކުރެވިފައިވާ ކަމަށެވެ.

އެގޮތުން ވެހިކަލް ޕާމިޓް ކެންސަލް ކުރެވިފައިވަނީ ހުއްދަ ދެވިފައިވާ ކެޓަގަރީ ނޫން ވެހިކަލް ދުއްވައިގެން ނުވަތަ ލައިސަންސް ނެތް ފަރާތެއް ވެހިކަލް އޮޕަރޭޓްކޮށްގެން ކަމަށެވެ. އަދި ވެހިކަލްއަށް ޕާމިޓެއް ދޫކުރިކަމުގައި ވިޔަސް، އެ ވެހިކަލެއް ބޭނުންކުރަންވާނީ ހުއްދަ ދެވިފައި އަދި ޤާނޫނީ އިމުގެ ތެރެއިން ކަމަށް ނަވީން އިލްތިމާސް ކުރެއްވިއެވެ.

ނަވީން ވަނީ މިއީ ދަތި އުނދަގޫ ދަނޑިވަޅެއްކަމަށް ވިދާޅުވެ، މި ދަނޑިވަޅުގައި ރައްޔިތުން އެކަކު އަނެކަށް އަޅާލާ އޯގާތެރިވުމަށް އިލްތިމާސްކުރައްވާފައެވެ.

ނަވީން ވިދާޅުވީ ފުލުހުންގެ އެހީތެރިކަން ބޭނުންވެއްޖެނަމަ ނުވަތަ އެހެން ފަރާތެއްގެ އެހީތެރިކަން ބޭނުންވެއްޖެނަމަ ފުލުހުންގެ ހޮޓްލައިންތަކައް ގުޅުއްވައިގެން އެ މަޢުލޫމާތު ހިއްސާ ކުރުމަށް އެދޭ ކަމަށެވެ.

އަދި ޝޮޕިންގ ޕަރމިޓް ލިބުމުން އެ ފަރާތަކަށް ކަނޑައަޅާފައި ހުންނަ ޒޯނެއްގައި އުޅުން މުހިންމު ކަމަށާއި، ގެއިން ނުކުންނަވާއިރު އެކަނި ނުކުންނެވި ނަމަވެސް ފިހާރަތައް ކައިރީގައި ބޮނޑިވާ މަންޒަރު ފެންނަ ކަމަށް ނަވީން ވިދާޅުވިއެވެ. އަދި ކުރިއަށް އޮތްތަނުގައި ފިހާރަތަކަށް ވަޑައިގަންނަވާ އިރުވެސް، އެ ފިހާރައެއް ދޮށުގައި އިޖުތުމަޢީ އަދި ޖިސްމާނީ ގައިދުރުކުރުމުގައި އަމިއްލައަށް އެކަން ކުރެއްވުމަކީ ވަރަށް މުހިންމު ކަމެއްކަން ނަވީން ފާހަގަ ކުރެއްވިއެވެ.