މާލޭގައި ކޮވިޑް-19 ހަލުވިކަމާއެކު ފެތުރެމުންދާތީ ބިދޭސީންނާއި, ދިވެހިން ގިނައިން ދިރިއުޅޭ ތަންތަން ޢާންމުކޮށް ޗެކްކުރަމުންދާނެކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފިއެވެ.
ހޮނިހިރު ދުވަހު އެންއީއޯސީން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ޓެގް ޓީމްގައި ހިމެނިވަޑައިގަންނަވާ ޑރ. ޢަލީ ލަޠީފް ވިދާޅުވީ ކޮވިޑް-19 އަށް ޕޮޒިޓިވްވާ މީހުންގެ ނިޞްބަތް އިތުރުވަމުން އަންނަ އިރު ކޮންޓެކްޓްސް ގިނަވަމުންދާ ކަމަށެވެ.
ޑރ. ޢަލީ ލަޠީފް ވިދާޅުވީ ޕޮޒިޓިވްވާ މީހުން ގިނަވާންޖެހޭ ދެ ސަބަބެއްވާ ކަމަށެވެ. އޭގެ ތެރެއިން ފުރަތަމަ ސަބަބަކީ ޓެސްޓް ހަދާ މިންވަރު އިތުރުވުމުން ޕޮޒިޓިވްވާގޮތް އިތުރުވުން ކަމަށެވެ. މީގެ 3 ވަރަކަށް ދުވަސް ކުރިން ޕޮޒިޓިވްވި މީހުންގެ ޢަދަދު މަދުވިކަން ފާހަގަކުރެއްވިއެވެ. އަދި ޓެސްޓް ކިޓު މަދުވުމާއި ގުޅިގެން ހައި ރިސްކް މީހުންގެ ތެރެއިން ހަމައެކަނި ސިމްޕްޓަމެޓިކް މީހުންގެ ޓެސްޓް ހަދަން ނިންމާފައިވާކަމަށް ޑޮކްޓަރު ވިދާޅުވިއެވެ.
ނަމަވެސް އޭގެ އެއްދުވަސް ފަހުން އަޅުގަނޑުމެން އަނެއްކާ ވެސް ޓެސްޓް ކިޓު ލިބުމާއެކީގައި އިތުރަށް ޓެސްޓް ހަދަން ފެށިން. އިތުރަށް ޓެސްޓް ހަދަން ފަށައިފިއްޔާ ޕޮޒިޓިވްވުމުގެ ޗާންސް ބޮޑުވެގެންދާނެ. ދެވަނަ ކަމަކީ ކޮމިއުނިޓީ ސްޕްރެޑް އޮންނަންޔާ ޕޮޒިޓިވްވާ މީހުން ގިނަވާނެ. މި ދެކަންތައް މި އޮންނަނީ. ޓެސްޓް މަދުން ހަދާނަމަ ޕޮޒިޓިވްވާލެއް މަދުވާނެ. ޓެސްޓް ގިނައިން ހަދާނަމަ ޕޮޒިޓިވްވާލެއް ގިނަވާނެ،ޑރ. އަލީ ލަތީފް
ޑޮކްޓަރު ވިދާޅުވީ ގިނަ ޢަދަދެއްގެ ކޭސްތައް އަންނަން ފެށުމުން މިހާރު ނިންމާފައިވަނީ ގިނަ މީހުން ދިރިއުޅޭ ތަންތަން އެކްޓިވްކޮށް، މީހުންގެ ޓެސްޓް ހެދުން ކަމަށެވެ. އަދި އެންމެ ފަހުން ވެސް ގިނަ ޢަދަދެއްގެ މީހުން ޕޮޒިޓިވްވީ އެއްތަނެއްގައި ގިނަ ބަޔަކު ތިބުމުން ކަމަށް ޑރ. ޢަލީ ލަޠީފް ވިދާޅުވިއެވެ.
އަޅުގަނޑުމެން ނިންމާފައި މި އޮތް ގޮތަކީ ވަރަށް ގިނަ މީހުން ދިރިއުޅޭ ތަންތަން ޚާއްޞަކޮށް ބިދޭސީން ދިރިއުޅޭ ތަންތަނަށް އެކްޓިވްކޮށް ގޮސް އެމީހުންގެ ޓެސްޓް ހެދުން. އެންމެ ފަހުން އެހާ ގިނަ ޓެސްޓް ޕޮޒިޓިވްވެގެން މިދިޔައީ އެއްތަނެއްގައި ވަރަށް ގިނަ މީހުން އުޅޭ ގެއެއްގެ ޓެސްޓް ހެދުމުން. އެއިރު އަޅުގަނޑުމެން 120 މީހުންގެ ތެރެއިން ޓެސްޓް ހަދަން ނިންމީ 10 އިންސައްތަ މީހުންގެ. ނަމަވެސް އެތަނަށް ދިޔައިރު އެތަނުގައި އެބައުޅޭ ގާތްގަނޑަކަށް 17 ވަރަކަށް މީހުން ސިމްޕްޓަމެޓިކް މީހުން. އެއީ ރޯގާގެ އަސަރު ހުރި 17 މީހުން. ދެން އަޅުގަނޑުމެން ޓެސްޓް ހެދި އިރު، އެއީ 10 އިންސައްތައާއި 17 މީހުން ޓެސްޓް ކުރުމުން ފުދޭވަރަކަށް ގިނަ މީހުން ޕޮޒިޓިވްވި،ޑރ. އަލީ ލަތީފް
ޑޮކްޓަރު ވިދާޅުވީ މިހާރު ގަސްދުކޮށްފައި ވަނީ ރިސްކް ބޮޑު ތަންތަން ވެއްޖެއްޔާ އެތަންތަން އެކްޓިވްކޮށް، އެތަންތަނަށް ގޮސް ޓެސްޓް ހެދުން ކަމަށެވެ. އަދި ހަމަ އެގޮތަށް ދިވެހިން ވެސް ގިނައިން އުޅޭ ތަންތަން އެނގޭނަމަ އެތަންތަނަށް ގޮސް ޓެސްޓް ކުރާނެކަމަށެވެ.
މީގެ އިތުރުން މީހުން ގިނައިން އުޅޭ ތަނަކަށްވެފައި، އެތަނެއްގެ ތެރޭގައި އެއްވެސް މީހެއްގެ ބަލީގެ އަލާމާތެއް ހުރެއްޖެނަމަ އަވަހަށް އެޗްޕީއޭއަށް އެންގުމަށް ޑރ. ޢަލީ ލަޠީފް ވަނީ އިލްތިމާސްކުރައްވާފައެވެ. އަދި ޓީމެއް ފޮނުވާ ޓެސްޓް ހެދުމަށްފަހު ކަރަންޓީން ކުރަން ޖެހިއްޖެ ޙާލަތެއްގައި ކަރަންޓީންކޮށް އަދި އައިސޮލޭޓްކުރަން ޖެހިއްޖެ ޙާލަތެއްގައި އައިސޮލޭޓް ކުރެވޭނެ ކަމަށް ޑރ. ޢަލީ ލަޠީފް ވިދާޅުވިއެވެ. އަދި ރޯގާގެ އަސަރު ހުންނަކަމުގައިވާ ނަމަ އެޗްޕީއޭއަށް އެންގުން މުހިންމުކަމަށް ޑޮކްޓަރ ވިދާޅުވިއެވެ.
