ފަތުރުވެރިކަމުގެ ސިނާޢަތް، ކޮވިޑާ-19 އިން އަރައިގަތުމަށް ތައްޔާރުވުމުގެ ގޮތުން، ޚާއްސަ ވެބިނާރ އެއް ބޭއްވުމަށް، މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ފަރާތުން ހަމަޖައްސައިފިއެވެ.

މި މަހުގެ 27 ވަނަ ދުވަހު ވެބިނަރއެއް ބާއްވަނީ، ކޮވިޑު19ގެ ޙާލަތުން އަރައިގަތުމަށްޓަކައި ، ދެން ކުރާން ހުރި ކަންކަމާމެދު، އަލުންވިސްނައި، އެޅެން އޮތް ފިޔަވަޅުތައް ދެނެގަނެގެން، ކުރިއަށް ދިއުމުގެ މަގުސަދުގައެވެ. މި ވެބިނާރަސް އެމް.އެމް.ޕީ.އާރުސީން ދީފައިވާ ޝިޢާރަކީ، "ރިއެކްޓް، ރީތިންކް، ރިކަވަރ، ސޮލިއުޝަ ޓު ދަ ކޮވިޑް-19 ކްރައިސިސް އެންޑް ދަ މޯލްޑިވިއަން ޓުއަރިޒަމް އިންޑަސްޓްރީ" އެވެ.

އެމްއެމްޕީއާރުސީން ހާމަކުރި ގޮތުގައި، ރާއްޖޭގެ ފަތުރުވެރިކަން މާކެޓްކުރާ ފަރާތްތަކަށް ޚާއްސަ ކޮށްގެން ތައްޔާރު ވަމުން އަންނަ، މި ވެބިނާރަކީ އޭޝިއާ ޕެސިފިކް ގެ ފަތުރުވެރިކަން ކުރިއެރުވުމަށް އިސްކޮށް މަސައްކަތްކުރާ ޖަމިއްޔާއެއް ކަމަށްވާ "ޕެސިފިކް އޭޝިއާ ޓެރެވަލް އެސޯސިއޭޝަން" (ޕާޓާ) އާއި ފަތުރުވެރިން ޗުއްޓީ ޕްލޭންކުރަން މަޢުލޫމާތު ހޯދާ އެންމެ ބޮޑު އެއް އޮންލައިން ޕްލެޓްފޯމް ކަމަށްވާ "ޓްރިޕް އެޑްވައިޒާ"އާއި ގުޅިގެން، ބާއްވާ ވެބިނާރެކެވެ.

މި ވެބިނާރުގެ ބައިވެރިންނާއި މުޚާތަބު ކުރައްވާނެ އެއް ބޭފުޅަކީ، މި ފަންނުގެ ތަޖުރިބާކާރެއް ކަމަށްވާ، އީ ޓޫރިޒަމް ޕްރަންޓިއަރސް ގެ ސީއީއޯ މރ. ދާމިއަން ކުކްއެވެ. އޭނާ އަކީ ސާސް އަދި އެބޯލާ ފަދަ ބަލިމަޑުކަމުގެ ކާރިސާ ތަކުން އަރައިގަތުމަށް ޓަކައި "ކްރައިސިސް މެނޭޖްމަންޓު" ރޮނގުން ގިނަގުނަ މަސައްކަތްތަކެއް ކުރައްވާފައިވާ ތަޖުރިބާކާރެކެވެ. މި ވެބިނާގައި ކޮވިޑް-19 އިން ފަތުރުވެރިކަމަށް ލިބޭ ގެއްލުންތަކުން އަރައިގަތުމަށް ކުރެވިދާނެ ކަންތައްތަކާ ގުޅޭގޮތުން ކުކްގެ ފަންނީ އަދި އިލްމީ ތަޖުރިބާ ބައިވެރިންނާ ޙިއްސާ ކުރައްވާނެއެވެ.

ކުކްގެ އިތުރުން މިވެބިނާރ ގައި ވާހަކަދެއްކެވުމަށް ހަމަޖެހިފައިވަނީ އެލްއެލްޕީއާރްސީ ގެ މެނޭޖިން ޑިރެކްޓަރ ތޮއްޔިބް\ު މުޙައްމަދާއި، ޕާޓާގެ ސީއީއޯ މާރިއޯ މާޑީ އާއި، ޓްރިޕްއެޑްވައިޒަރގެ ހެޑް އޮފް ޑެސްޓިނޭޝަން މާކެޓިންގ މިސް ސާރާ މެތިއުސް އާއި، ޓްރިޕްއެޑްވައިޒަރުގެ އޭޝިއާ ޕެސިފިކް ބިޒްނަސް ޑިވެލޮޕްމަންޓް މޭނޭޖަރ ލިއޯން ޗާއި، އަދި ޕާޓާގެ ކޮމިއުނިކޭޝަން އެންޑް އެކްސްޓާނަލް އެފެއާޒްގެ ޑައިރެކްޓަރ ޕޯލް ޕްރައުންކިންއެވެ.

ކޮވިޑް-19 ގެ ސަބަބުން ރާއްޖޭގެ ފަތުރުވެރިކަމުގެ ދާއިރާއަށް ވެސް ގިނަގުނަ ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައި އެމްއެމްޕީއާރްސީ އިން މި ވެބިނާ ބޭއްވުމުގެ އެންމެ ބޮޑު އެއް މަޤްސަދަކީ ކޮވިޑް-19 އިން ފަތުރުވެރިކަމަށް ލިބިފައިވާ ގެއްލުންތަކުން އަރައިގަނެ ރިކަވަރީ ފެށުމަށް އެންމެ ފުރިހަމަގޮތެއްގައި ތައްޔާރުވުމަށްޓަކައި ތަޖުރިބާކާރުންގެ އިރުޝާދުގެ އަލީގައި ރާއްޖޭގެ ފަތުރުވެރިކަމުގެ ސިނާޢަތުގެ ހުރިހާ ފަރާތްތަކަށް އެހީތެރިވުމެވެ.

އެމްއެމްޕީއާރުސީން ބުނީ ވެބިނާރ ގެ ފައިދާ ރާއްޖޭގެ ފަތުރުވެރިކަމުގެ ޙިއްސާ ކުރައްވާ ކުދިބޮޑު ހުރިހާ ފަރާތްތަކަށް ފޯރުކޮށްދިނުމަށްޓަކައި އެމްއެމްޕީއާރސީ ގެ މެމްބަރުން ނޫން ފަރާތްތަކަށްވެސް މި ވެބްނަރގައި ބައިވެރިވުމުގެ ފުރުޞަތު ހުޅުވާލުމަށް ނިންމާފައިވާ ކަމަށެވެ.