ކޮވިޑް-19 އާ ގުޅިގެން، އިތުރު ހަތަރު ރަށަކާއި ރިސޯޓެއް މޮނިޓަރިންގެ ހާލަތަށް ގެންގޮސްފި އެވެ.
ނޭޝަނަލް އިމަޖެންސީ އޮޕަރޭޝަން ސެންޓަރު (އެންއައިއޯސީ) އިން މިއަދު ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާން މަބުރޫކް އަޒީޒް ވިދާޅުވީ އިތުރު ހަތަރު ރަށަކާއި ރިސޯޓެއް މޮނިޓަރިންގެ ހާލަތަށް އަންގާރަ ދުވަހު ގެނެސްފައިވާ ކަމަށެވެ.
އަންގާރަ ދުވަހު މޮނިޓަރިންގެ ހާލަތަށް ގެނައި ތަންތަން:
- ކ. ތުލުސްދޫ
- ކ. ކުޑަވިލިނގިލި
- ބ. ފުޅަދޫ
- ދ. ކުދަހުވަދޫ
- ތުޅާގިރި އައިލެންޑް ރިސޯޓު
މަބްރޫކް ވިދާޅުވީ މޮނިޓަރިންގެ ހާލަތަށް ގެނައި ބައެއް ތަންތަން އާންމު ހާލަތަކަށް ގެނެސްފައިވާ ކަމަށެވެ. އެގޮތުން އާންމު ހާލަތަށް ގެނެސްފައިވަނީ ހދ. ނޮޅިވަރަމް، ރ. މުރަވަންދޫ އަދި ރ. ބޮޑުފުއްޓެވެ.
މީގެ ކުރިން މޮނިޓަރިންގެ ހާލަތަށް ގެނެސްފައިވާ ތަންތަނަކީ:
- ގްރޭޓާ މާލެ އޭރިއާ
- ކ. ގުރައިދޫ
- ހއ. މާރެންދޫ
- ހދ. ވައިކަރަދޫ
- ހދ. ހިރިމަރަދޫ
- ހއ. ހޯރަފުށި
- ހއ. ތުރާކުނު
- ހއ. އިހަވަންދޫ
- ހއ. އުލިގަމު
- ޖޯލި މޯލްޑިވްސް
- މޯލްޑިވިއާނާ ސަފާރީ
ހޯމަ ދުވަހުގެ ރޭ ދަންވަރު ޕޮޒިޓިވްވި 2 މީހުންނާއި، އަންގާރަ ދުވަހުގެ ހެނދުނު ޕޮޒިޓިވްވި 13 މީހުންނާއި، މެންދުރު ޕޮޒިޓިވް 1 މީހަކާއި، ހަވީރު ޕޮޒިޓިވްވި 1 އާއެކު އަންގާރަ ދުވަހު ޕޮޒިޓިވްވި މީހުންގެ އަދަދު ވަނީ 17ށް އަރާފައެވެ.
ހޯމަ ދުވަހު އެކަނި 15 މީހަކު ކޮވިޑް-19 އަށް ޕޮޒިޓިވްވެފައިވާ އިރު، އާދީއްތަ ދުވަހު ޕޮޒިޓިވްވި މީހުންގެ އަދަދު އުޅެނީ 17 ގައެވެ. މިއާއެކު ރާއްޖޭގައި ޕޮޒިޓިވްވި މީހުންގެ އަދަދު ވަނީ 84ށް އަރާފައެވެ. އަދި މާލޭގައި ޕޮޒިޓިވްވި މީހުންގެ އަދަދު ވަނީ 64ށް އަރާފައެވެ.
