ކޮވިޑް-19 އާއި ގުޅިގެން ޑްރަގް ކޯޓުގެ ޢަމުރު ޙަވާލު ކުރުމުގެ ޚިދުމަތާއި އެހެނިހެން ބައެއް ޚިދުމަތްތައް އޮންލައިންކޮށް ލިބޭނެ އިންތިޒާމު ހަމަޖައްސައިފިއެވެ.
ޑްރަގް ކޯޓުން ބުނީ، މިދުވަސްވަރު ދުނިޔޭގައި ހަލުވިކަމާއިއެކު ފެތުރެމުންދާ ކޮވިޑް-19ގެ ސަބަބުން ޑްރަގް ކޯޓުގެ މުވައްޒަފުންނާއި ޑްރަގް ކޯޓުގެ އިޚްތިޞާޞް ހިނގާ އެންމެހާ ފަރާތްތަކުގެ ރައްކާތެރިކަމަށްޓަކައި ޑްރަގް ކޯޓުން ނެރޭ ޢަމުރުތައް އޮންލައިންކޮށް ފަސޭހައިން ލިބޭނެ އިންތިޒާމު މިހާރު ވަނީ ހަމަޖައްސާފަ ކަމަށެވެ.
ޑްރަގް ކޯޓުން ބުނީ، އޮންލައިން ޕޯޓަލެއް މެދުވެރިކޮށް މި ޚިދުމަތް ލިބިގެންދާއިރު، ޕޯރޓަލް ފަރުމާކޮށް ޑިވެލޮޕްކޮށްފައިވަނީ މޯލްޑިވިސް ކޮމްޕިއުޓަރ ސޮސައިޓީގެ އެހީތެރިކަމާއެކު ޑްރަގް ކޯޓުގެ އިރުޝާދުގެ ދަށުންކަމަށެވެ.
މީގެއިތުރުން ޑްރަގް ކޯޓުން ބުނީ، މިޕޯރޓަލް ގެ ޚިދުމަތް ހޯދުމަށް ޑްރަގް ކޯޓުގެ އިޚްތިޞާޞް ހިނގާ އެންމެހާ ފަރާތްތަކުން ކޯޓުގެ ވެބްސައިޓްގެ ކޯޓު އަމުރު ޕޯރޓަލް ގައި ރަޖިސްޓްރީވާން ޖެހޭނެ ކަމަށެވެ. އަދި މީގެ އިތުރުން މި ޕޯރޓަލްގައި ރަޖިސްޓްރިވެފައިވާ ފަރާތްތަކަށް ޢަމުރެއް ނެރޭ ވަގުތުން އެ ފަރާތަކަށް އެސްއެމްއެސް އެލަރޓް ނޮޓިފިކޭޝަން ލިބޭނެ ކަމަށްވެސް ޑްރަގް ކޯޓުން ބުނެއެވެ.
ކޯޓުން ފޯރުކޮށްދޭންޖެހޭ އެހެނިހެން ޚިދުމަތްތައް ދިނުމުގެ ގޮތުން، ކޮންމެހެން ކޯޓަށް ހުށަހަޅަންޖެހޭ މައްސަލައެއް ނުވަތަ ޚިދުމަތާއި ގުޅޭކަންކަން ކޯޓަށް ހުށަހެޅުމުގެ އިންތިޒާމު ވެސް ހަމަޖެހިފައިވާ ކަމަށް ޑްރަގް ކޯޓުން ބުނެއެވެ.
