މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ޓެކްސް ބަޔާން ހުށަހެޅުމާއި ފައިސާދެއްކުމުގެ ސުންގަޑިއަކީ މިހިނގާ އޭޕްރީލް މަހުގެ 13 ވަނަ ދުވަސް ކަމަށް އެ އިދާރާއިން ބުނެފިއެވެ.

ބުރާސްފަތި ދުވަހު މީރާއިން ނެރުނު ބަޔާނެއްގައި ބުނީ، އަންނަ ހަފްތާގައި ސަރުކާރުގެ އޮފީސްތައް ނުހުޅުވާގޮތަށް ނިންމެވި ކަމުގައިވިޔަސް، ކޮންމެހެން ދޭންޖެހޭ ޚިދުމަތެއް ނުވަތަ ކޮންމެހެން ކުރަންޖެހޭ މަސައްކަތެއް އޮފީސް ހުޅުވައިގެން ވީހާވެސް މަދު މުވައްޒަފުން ނެރެގެން ކުރުމަށް ނިންމާފައިވާ ކަމަށެވެ. އެގޮތުން 13، 14 އަދި 10 އެޕްރީލް 2020 ގައި ޚިދުމަތް ދިނުމަށްޓަކައި ރަސްމީކޮށް އެ އޮތޯރިޓީ ހުޅުވާނެ ކަމަށާއި، ޓެކްސް ބަޔާން ހުށަހެޅުމާއި ފައިސާދެއްކުމުގެ އައު ސުންގަޑިއަކީ 13 އެޕްރީލް 2020 ކަމަށް ބަޔާނުގައި ބުނެފައިވެއެވެ.

އޭގެއިތުރުން، މީރާ ކަނެކްޓް އެކައުންޓް ދޫކޮށްފައިވާ ފަރާތްތަކުން ޓެކްސް ބަޔާން ހުށަހަޅަންވާނީ މީރާ ކަނެކްޓް މެދުވެރިކޮށް އޮންލައިންކޮށް ކަމަށާއި، ޓެކުހާއި އެހެނިހެން ފައިސާ އޮންލައިންކޮށް ދައްކަންޖެހޭ ފަރާތްތަކުން ފައިސާ ދައްކަންވާނީ އޮންލައިންކޮށްނުވަތަ އެމް.އާރ.ޓީ.ޖީ.އެސް މެދުވެރިކޮށް ކަމަށް ބުނެފައިވެއެވެ. އަދި ކުންފުނީގެ އަހަރީ ފީ، އެއްގަމު އުޅަނދާއިކަނޑު އުޅަނދުގެ އަހަރީ ފީ، ޓްރެފިކާ ގުޅޭ ޖޫރިމަނާ، އެއަރޕޯޓް ސެކިއުރިޓީ ފާސް، ވީސާ ފީ، އަދި މުދަލު ޒަކާތް މީރާގެ އޮންލައިން ޚިދުމަތް ވާރުޕޭ މެދުވެރިކޮށް އޮންލައިންކޮށް ދެއްކޭނެ ކަމަށާއި، އޮންލައިންކޮށް ދެއްކުމުގެ އިންތިޒާމު ހަމަޖެހިފައިނުވާ ފައިސާ ކައުންޓަރުން ބަލައިގަންނާނެ ކަމަށް ބުނެފައިވެއެވެ.

އޭގެ އިތުރުން، ރެވެނިއު ސްޓޭމްޕް ދިނުމުގެ ޚިދުމަތް ކައުންޓަރުން ލިބޭނެކަމަށްވެސް މީރާއިން ބުނެއެވެ.

މީރާއިން ބުނީ، ޓެކްސްޕެޔަރ ސަރވިސް ސެންޓަރުން ޚިދުމަތް ދިނުމަށް ހަމަޖެހިފައިވަނީ 9:00 އިން 13:00 އާ ދެމެދު މީރާ މޮބައިލް އެޕްލިކޭޝަން ނުވަތަ ކިއުބީ މެދުވެރިކޮށް އޮންލައިންކޮށް ޓޯކަން ނަގާ ފަރާތްތަކަށާއި، 1415 މެދުވެރިކޮށް އެޕޮއިންޓްމަންޓް ހަދާ ފަރާތްތަކަށް ކަމަށެވެ.