އަމިއްލަ އޮފީސްތައް ބަންދު ނުކުރި ނަމަވެސް އެތަންތަނުގައި މަސައްކަތްތައް ކުރިއަށް ގެންދަނީ ދެވޭ އިރުޝާދުތަކާ އެއްގޮތަށްތޯ ބަލަމުންދާ ކަމަށް ޑައިރެކްޓަރު ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ވިދާޅުވެއްޖެއެވެ.

ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މައިމޫނާ ވިދާޅުވީ ކޮވިޑް-19 ކޮންޓްރޯލް ކުރުމަށް ގިނަ މަސައްކަތްތައް ކުރަމުންދާ ކަމަށާއި، މިކަމުގައި އާންމު ރައްޔިތުންގެ އެއްބާރުލުން ބޭނުންވާ ކަމަށެވެ. އެގޮތުން ސަރުކާރު އޮފީސްތައް ބަންދުކުރެވި، ސްކޫލާއި، ކޮލެޖް، ޔުނިވާސިޓީތައް ބަންދުކުރެވިގެން ދިޔައީ ވެސް އާންމުންގެ ސަލާމަތާ ރައްކާތެރިކަމަށްޓަކައި ކަމަށެވެ.

ނަމަވެސް މިހާލަތުގައި ބައެއް އޮފީސްތަކުން މަސައްކަތް ކުރަންޖެހޭއިރު، ހުރިހާ ތަނެއްގައި ވެސް ރައްކާތެރިކަމުގެ ފިޔަވަޅުތައް އެޅިގެން ކަންކަން ކުރިއަށް ގެންދިއުމަށް އޭނާ އިލްތިމާސްކުރެއްވިއެވެ. އަދި ވިދާޅުވީ މަސައްކަތްތައް ކުރިއަށް ގެންދަންޖެހޭނީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އެންގުންތަކާ އެއްގޮތަށް ކަމަށެވެ.

މައިމޫނާ ވިދާޅުވީ މަސައްކަތް ކުރާ ތަންތަނުގެ ތަންތަނުގެ މަސައްކަތްތައް ކުރިއަށްދާ ގޮތާއި އެޅިފައިވާ ފިޔަވަޅުތައް ބަލަމުންދާ ކަމަށެވެ.

ކޮވިޑް-19އަށް ކަރަންޓީނުގައި ހުރި ދިވެއްސެއް ޕޮޒިޓިވްވެފައިވާތީ އެކަމަށް އިޝާރާތް ކުރައްވާ މައިމޫނާ ވިދާޅުވީ މިކަމުން ވެސް ކަރަންޓީނުގައި ތިބުމުގެ މުހިންމުކަން ހާމަވާ ކަމަށެވެ. އަދި ދުވަސްވަރު ބޭރަށް ނުނިކުމެ ގޭގައި ތިބުމަށް ތަކުރާރުކޮށް މައިމޫނާ ވަނީ އިލްތިމާސްކުރައްވާފައެވެ.

ރާއްޖޭގެ މިހާރުގެ ހާލަތަށް އަލިއަޅުއްވާލައްވާ ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވީ ދިވެއްސެއް މިވައިރަސްއަށް ޕޮޒިޓިވްވުމާއެކު ރާއްޖެއިން މިވައިރަސް ނައްތާލުމަށް ކުރާ މަސައްކަތްތައް އިތުރަށް ވަރުގަދަކުރެވޭނެ ކަމަށާއި، އިތުރު ފިޔަވަޅުތަކެއް އަޅާނެ ކަމަށެވެ. އަދި މިކަމާ ބެހޭ އިތުރު ތަފްސީލް ފަހުން އާންމުކުރާނެ ކަމަށް މަބްރޫކް ވިދާޅުވިއެވެ.