ރާއްޖޭގައި ކޮވިޑް-19 ފެތުރުން ހުއްޓުވުމަށް ކުރަމުންދާ މަސައްކަތްތަކުގެ ދަށުން މާސްކް އަދި ސެނިޓައިޒަރ އިން ނަގާ އިމްޕޯޓް ޑިއުޓީ ރައީސުލްޖުމްހޫރިއްޔާ މާފު ކޮށްދެއްވައިފިއެވެ.
ބުދަ ދުވަހު މޯލްޑިވްސް ކަސްޓަމްސް ސަރވިސަސް އިން ނެރުނު ބަޔާނެއްގައި ބުނީ، އާންމު ސިއްޙަތު ރައްކާތެރި ކުރުމުގެ ޤާނޫނުގެ ދަށުން ރާއްޖޭގައި ސިއްޙީ ކުއްލި ޙާލަތު އިއުލާނުކޮށްފައިވާއިރު، އެ މުއްދަތުގެ ތެރޭގައި ރާއްޖޭގެ ވިޔަފާރިތަކާއި އަމިއްލަ ފަރާތްތަކުން ރާއްޖެއަށް އިމްޕޯޓްކުރާ މާސްކް އަދި ސެނިޓައިޒަރ ގެ އިމްޕޯޓު ޑިއުޓީއާއި، ޕްރޮސެސިންގ ފީ ރައީސުލްޖުމްހޫރިއްޔާ މާފު ކޮށްދެއްވާފައިވާ ކަމަށެވެ.
ފާއިތުވި ދުވަސްތަކުގައި މާސްކް އަދި ސެނިޓައިޒަރަށް އޮތް ޑިމާންޑް ވަނީ ވަރަށް ބޮޑަށް އިތުރުވެފައިވާއިރު، މާސްކް އަދި ސެނިޓައިޒަރުގެ އިމްޕޯޓް ޑިއުޓީ މާފުކޮށްދެއްވާފައިވަނީ ދިވެހި ރާއްޖޭގެ އެކްސްޕޯޓް އިމްޕޯޓް ޤާނޫނުން ރައީސްއަށް ލިބިގެންވާ އިޙުތިޔާރުގެ ދަށުން އިމްޕޯޓް ޑިއުޓީ މާފު ކުރުމާއި، މާފު ކުރުމުގައި އަމަލު ކުރާނެ ގޮތުގެ އުސޫލުގެ ދަށުން ކަަމަށް ކަސްޓަމްސްގެ ބަޔާނުގައި ބުނެފައިވެއެވެ.
މި ހިނގާ މާރޗު މަހުގެ 12 ވަނަ ދުވަހު ރާއްޖޭގައި ސިއްޙީ ކުއްލި ޙާލަތު އިއުލާނުކޮށްފައިވާއިރު، ދުނިޔޭގެ ސިއްޙަތު ޖަމިއްޔާއިން ވަނީ މި ވައިރަސްއަކީ މުޅި ދުނިޔެއަށް ކުރިމަތިވެފައިވާ ރޯގާއެއްގެ ގޮތުގައި އިއުލާނުކޮށްފައެވެ.
