ކޮވިޑް-19 އަށް ޝައްކުކުރެވިގެން މީރު އައިލެންޑް ރިސޯޓުން ޓެސްޓުކުރި ހުރިހާ ސާމްޕަލްތައް ނެގެޓިވްވެއްޖެ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

އާދިއްތަ ދުވަހުގެރޭ އެޗްޕީއޭއިން ކުރި ޓްވީޓެއްގައި ބުނީ، ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން މީރު އައިލަންޑް ރިސޯޓުން ނެގި 12 ސާމްޕަލްގެ ނަތީޖާ ނެގެޓިވް ވެފައިވާ ކަމަށެވެ. އަދި އެ ރަށްތަކުން މޮނިޓަރިންގްގެ ހާލަތު އުވާލެވިފައިވާކަމަށް އެޗްޕީއޭއިން ބުނެއެވެ.

ރާއްޖެއިން މިހާތަނަށް 13 މީހަކު ކޮވިޑް-19 އަށް ޕޮޒިޓިވްވެފައިވާއިރު، އޭގެ ތެރޭގައި ހިމެނެނީ ކުރެއްދޫ އައިލެންޑް ރިސޯޓުން ޕޮޒިޓިވްވި 5 މީހަކާއި، ބަތަލާ އައިލެންޑް ރިސޯޓުން ޕޮޒިޓިވްވި 2 މީހަކާއި، ކުރަމަތި އައިލެންޑް ރިސޯޓުން ޕޮޒިޓިވްވި 2 މީހަކާއި، އަނަންތާރާ ދިގު ރިސޯޓުން ޕޮޒިޓިވްވި 2 މީހެއްގެ އިތުރުން އައިލެންޑް ސަފާރީ 1 އިން ޕޮޒިޓިވްވި 2 މީހުންނެވެ.