ރާއްޖޭގެ އެންމެ ކާމިޔާބު އެއް ޕްރޮޑަކްޝަން ހައުސް ކަމަށްވާ ޑާރކްރެއިން އެންޓަޓައިންމެންޓް (ޑީއާރްއީ) އިން އުފައްދާ ފިލްމު " ބަޅިނދު" ގެ ޓީޒާ ދައްކާލައިފިއެވެ.

ހޯމަދުވަހު މި ޓީޒާ ދައްކާލާފައިވާއިރު ޓީޒާއިން ފެނިގެންދަނީ ސިހުރު ހާހޫރު ހެދުމަށްބޭނުން ކުރާ އަކުރުތަކެއް ލިޔެފައި ހުރި ދޮލަނގެކެވެ.

ބަޅިނދު މި ފިލްމަކީ ބިރުވެރި ޙާދިސާއެއްގެ މައްޗަށް ބިނާކޮށް ހަދާ ފިލްމެކެވެ. ފިލްމުގެ ކާސްޓުންގެ ތެރޭގައި މައިގަނޑު ގޮތެއްގައި ހިމެނެނީ ޓިކްޓޮކްގެ ތަރިންނެވެ. ފިލްމުގެ ކާސްޓުންގެ ތެރޭގައި، އާޝާ، ޝެރާ، ޖުމައްޔަލް އަދި ސޭންޑީގެ އިތުރުން ޖުމާލް ހިމެނެއެވެ.

ފިލްމާއި ބެހޭ ގޮތުން ރާއްޖެ. އެމްވީއާ ވާހަކަ ދައްކަމުން ޑާކްރެއިންގެ ޕްރޮޑިއުސަރ މުޙައްމަދު އަލީ (މޮގާ) ބުނީ، ކުރިން ނިންމާފައި އޮތީ ''ނޮވެންބަރ''އާ އެކު ބަޅިނދުގެ ޝޫޓިން ފެށުމަށް ކަމަށެވެ.

އެކަމަކު ދެ ފިލްމު އެއްކޮށް ޝޫޓް ކުރުމަކީ އެހާ ފަސޭހަކަމަކަށް ނުވާތީ މި ފިލްމުގެ ޝޫޓިން ފަސްކުރީ ކަމަށެވެ. މޮގާ ބުނީ، އެ ފިލްމުގެ މަސައްކަތް ދެ މަސް ދުވަހުގެ ތެރޭގައި ނިންމާލެވޭނެ ކަމަށެވެ.

ހޫދް އިބްރާޙިމް ލިޔެ، އަޙްމަދު ސިނާން ޑައިރެކްޓް ކޮށްފައިވާ މި ފިލްމަކީ ޑާކްރެއިންގެ 14 ވަނަ ފިލްމެވެ.