ރައްޔިތުންގެ މަޖިލީހަށް ހުށަހަޅާ ބިލުތަކަށް ޢާންމުންގެ ޚިޔާލު ހޯދުމަށް މަޖިލީހުގެ އިދާރާގައި ބައްދަލުވުންތަކެއް ބާއްވަން ނިންމާފައިވާއިރު، ފުރަތަމަ ބައްދަލުވުމުގައި މަޝްވަރާ ކުރާނީ މިނިމަމް ވޭޖް ކަނޑައެޅުމާ ގުޅޭގޮތުންކަމަށް މަޖިލިސް އިދާރާއިން ބުނެފިއެވެ.

މަޖިލިސް އިދާރާއިން އެހެން ބުނެފައިވާއިރު، ރައްޔިތުންގެ މަޖިލީހަށް ހުށަހަޅާ ބިލުތަކަށް ޢާންމުންގެ ޚިޔާލު ހޯދުމަށް މަޖިލީހުގެ އިދާރާގައި ބައްދަލުވުންތަކެއް ބޭއްވުމުގެ ވިސްނުންފުޅު ގެންގުޅުއްވާކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުވެސް ވަނީ ވިދާޅުވެފައެވެ.

އެގޮތުން ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ މަޖިލީހުގެ ޤަވާއިދުގައި ކޮންމެ ބިލަކާއި ގުޅޭގޮތުންވެސް ޢާންމުންގެ މަޝްވަރާ އަށް އެބިލެއް ހުޅުވާލެވޭނެކަމަށް ބުނެފައިވާކަމަށެވެ. މިދިޔަ ހަފުތާގައި ޢާންމު ކޮމިޓީގެ މުޤައްރިރާއި މަޖިލީހުގެ އަމީން ޢާންމާއި، ކައުންސެލަރ ޖެނެރަލާއެކުގައި، ޢާންމުންނަށް މިފުރުޞަތު މިހާރަށް ވުރެ ފުޅާކޮށް ހުޅުވާލުމާ ގުޅޭގޮތުން މަޝްވަރާކުރެއްވި ކަމަށް ރައީސް ނަޝީދު ވިދާޅުވި އެވެ.

އެކާމާ ގުޅޭގޮތުން މަޖިލިސް އިދާރާއިން ބުނީ، މި ސިލްސިލާގެ ދަށުން ބާއްވާ ފުރަތަމަ ބައްދަލުވުން އޮންނާނީ މިހިނގާ މާރޗު މަހުގެ 4 ވަނަ ދުވަހުގެ ރޭ 20:15 އިން 22:30 އަށް ކަމަށާއި، މި ބައްދަލުވުމުގައި މަޝްވަރާ ކުރާނީ މިނިމަމް ވޭޖް ކަނޑައެޅުމާ ގުޅޭގޮތުން ކަމަށެވެ.

މި ބައްދަލުވުން ބޭއްވުމަށް ހަމަޖެހިފައިވަނީ ރައްޔިތުންގެ މަޖިލީހުގެ އިދާރާގެ އައު އިމާރާތުގެ 4 ވަނަ ފްލޯގައި ކަަމަށް މަޖިލިސް އިދާރާއިން މައުލޫމާތުދެއެވެ.