ފަސްމަސް ދުވަސް ވަންދެން ޖައްމޫ ކަޝްމީރުން އިންޓަރނެޓުގެ ޚިދުމަތް މެދު ކަނޑާލާފައި އޮތުމަށްފަހު ބައެއް ޞަރަޙައްދުތަކަށް އިންޓަރނެޓްގެ ޚިދުމަތް އަލުން ދީފިއެވެ.
އިންޑިއާގެ މައި ސަރުކާރުން ބުނެފައިވަނީ ޖައްމޫ ކަޝްމީރުގެ ބައެއް ޞަރަޙައްދުތަކުން އިންޓަރނެޓް ބްލޮކް ކޮށްފައި އޮތުމަށް ފަހު މިހާރު އަލުން އެ ޚިދުމަތް ދީފައިވާ ކަމަށެވެ. އިންޑިއާ ސަރުކާރުން އިންޓަރނެޓުގެ ޚިދުމަތް އަލުން ދޭން ފަށާފައިވަނީ ހިންދޫން ގިނައިން އުޅޭ ޖައްމޫގެ ބައެއް ޞަރަޙައްދުތަކަށެވެ. ނަމަވެސް މުސްލިމުންގެ އާބާދީ ބޮޑު ކަޝްމީރަށް އަދިވެސް އިންޓަރނެޓުގެ ޚިދުމަތް ދޫކޮށްފައެއް ނުވެއެވެ.
އެ ޞަރަޙައްދުން އިންޓަރނެޓުގެ ޚިދުމަތް މެދު ކަނޑާލާފައިވަނީ މިދިޔަ އަހަރުގެ އޮގަސްޓް މަހުގެ 4 ވަނަ ދުވަހުއެވެ. އަދި މިއީ ޤާނޫނު ނެގެހެއްޓުމަށްޓަކައި ކުރި ކަމެއް ކަމަށް އިންޑިއާ ސަރުކާރުން ވަނީ ބުނެފައެވެ.
އިންޑިއާގެ ސުޕްރީމް ކޯޓުން މިދިޔަ ހަފުތާގައި ވަނީ ކަޝްމީރުން އިންޓަނެޓް ކަނޑާލާފައިވަނީ ޤާނޫނާ ޚިލާފަށް ކަމަށް ބުނެ އަލުން އެ މައްސަލަ މުރާޖަޢާ ކުރުމަށް މައި ސަރުކާރުގެ މައްޗަށް ޢަމުރެއް ނެރެފައެވެ.
ކަޝްމީރުގެ އިންޓަނެޓްގެ ޚިދުމަތް ކަނޑާލީ އިންޑިއާގެ ސަރުކާރުން އެ ޞަރަޙައްދަށް ދަތިކުރުމުގެ ފިޔަވަޅު އެޅުމުގެ ގޮތުންނެވެ. އިންޓަނެޓްގެ ޚިދުމަތް ކަނޑާލީ އިންޓެނެޓް މެދުވެރިކޮށް މުޢާމަލާތްކޮށްގެން ޓެރަރިސްޓް ޙަމަލާ ދިނުމަށް ރާވާ ކަމަށް ތުހުމަތުކޮށްފައެވެ.
